Filipi 3

1Ba'ahegɔ poan, n sɔɔnrɔ de ya sɛba n tare popeelom la ya bɔŋa Na'ayenɛ sore dɔlɔga la poan. Te la dagɛ daaŋɔ bo mam te n le yele ya yɛ'ɛha sɛla te n pon te'ele golehɛ bo ya. La me wan dɛna la yamam soŋorɛ te ya le wom de. 2Mini ya baahe la, mini ya toonfɛn'ɛhadoma la, la sɛba n bote ya ŋma la. 3La dela tomam n ton tona Yenɛ tooma la ge dagɛ bama. Se'ere n sɔe la, Yenɛ Sea la n bahɛ tɔ te to po'oha en ge me tara popeelom la to bɔŋa Krista Yesu sore dɔlɔga la poan. Te to ka nam yɔ'ɔra ŋmaa la bii kiha la. 4Mam wa ta'an dekɛ ne n mɛŋa delom ne yele aŋa. Ya se'em han tɛn'ɛhɛ te enŋa wan ta'an dɛla malema ana wa, mam tare sore gana bala. 5Se'ere n sɔe la, ban daa dɔgɛ mam la dabeha anii n daa paɛ la ba daa ŋma' mam. N me dela Israel buuri, yehe Benyaminbiihe poan na. Mam dela Hebru ziim. Ge n me dɔla la pa'alegɔ la te Pariseedoma dɔla la. 6La daa nyie mam te n daa doohe namehɛ sɛba n dole Yesu sore la. Han le dɛna la nɛra n nane pa'alegɔ la, mam ye dela se'em n daa ka tue a poan. 7Ge yele ana zan'an te mam daa dekɛ te ba tare yɔɔrɛ bo mam la. Nananawa, mam dekɛ ba bahɛ mɛ Krista zuo. 8Ge dagɛ la yele ana ma'an te mam dekɛ bahɛ, ge yɛla zan'an mam dekɛ bahɛ mɛ. Se'ere n sɔe la, mi'ilom sebo te n mina yɛhera n Na'ayenɛ Krista Yesu zen'en la tare yɔɔrɛ gana zan'an. Te enŋa zuo te mam dekɛ yɛla woo bahɛ ge behɛ te ba dɛna yoo te n ta'an paɛ Krista zen'en, 9te mam la enŋa lagom bɔna bɔŋyeŋɔ poan. Te nananawa, mam mɛŋa kan ta'an dɛna tontɔɔdaana la mam te n dole pa'alegɔ la zuo. Ge n nya dela tontɔɔdaana yɛhera la mam nam Krista la zuo. Tontɔɔ dena taaba te Yenɛ bahera te nɛra tara yɛhera la n nam Yesu se'em la. 10Te sɛla woo te mam bɔta dela n baŋɛ Krista ge la n mina paŋsɛka n daa bahɛ en te a vo'e a kum poan la. N me bote n lagom namehɛ la en, ge lagom ana wo enŋa a kum la poan, 11ge tara n potɛn'ɛrɛ poan te mam mɛŋa me wan vo'e n kum la poan. 12Ge mam kɔ'ɔn ka dekɛ dɛ te mam diŋ nyaŋɛ bii mam diŋ dɛna la tontɔɔ nɛra. Ge mam kelom bɔna bini zegera mɛ te n paɛ yɔɔrɛ se'ere te Krista Yesu pon nyaŋɛ dɛ bo mam la. 13Bala, n sɔɔnrɔ, mam seren ka tɛn'ɛhɛ te mam diŋ nyaŋ di' dɛ. Ge sɛla te ma eŋɛ dela n tamɛ sɛla n boe n pooren ge la n teregɛ n mɛŋa la n paa sɛla n boe n nɛŋa ha. 14Dene poan, mam kɔ'ɔn zɔta la tontɔɔ te n paɛ ba'ahegɔ zen'an la la n ta'an nyaŋɛ di dɛ ge nyɛ' yɔɔrɛ. Yɔɔrɛ la n wana: Yenɛ wan bahɛ mam te n keŋɛ saazuo ha ta bɔna la en, Krista Yesu zuo. 15Bala, tomam sɛba zan'an n zo'e suunre poan Yesu sore dɔlɔga poan la, la dela to bɔna bɔŋkaŋa mea. Ge ya sɛba me han tara la potɛn'ɛrɛ deyema, Yenɛ wan bahɛ te ya baŋɛ dɛna wa soŋa soŋa. 16Ge la de se'ere woo bahɛ ya te to kpeŋe to mɛhe bɔna wo ton boe se'em wa la. 17N sɔɔnrɔ, dole ya mam n ete se'em la, ge dole ya nɛresɛba n tone wo tomam n tone se'em la. 18Te n pon yele ya dena wa tagalom ge le malom yɛta ya la nintam wa. Te nɛreba zo'e zo'e bɔŋa poan n bahɛ ba te ba dɛna diŋdoma la Krista, se'em n daa ki' punpuuredɔɔ zuo la. 19Ba dela sɛba n yeti ba nyɛ' sagaŋɔ. Ba ka tone bɔ'ɔra Na'ayenɛ. Ba bote la teŋa wa zuo lɔgɔrɔ ma'an. Ba dela sɛba n tare popeelom bo sɛla n dene ba tara vi'. 20Te tomam dela Yenɛ Sɔ'ɔlom la nɛreba ge te to me nya kɔ'ɔn gura la Na'ayenɛ Yesu Krista se'em n de to Faanra la ze'ele Yenɛ zen'en la lebena. 21Te a han lebena, a wan bahɛ te to iŋsɛka n de sɛla n bahɛ te to kiira wan ta'an lebege ana wo a mɛŋa iŋnyaleŋa la n ane se'em la. A wan eŋɛ dena wa yɛhera la paŋsɛka te a tara bahera te sɛla woo bɔna n bote de se'em la.

will be added

X\