Filipi 2

1Ya bɔŋa Krista sore dɔlɔga la poan wan bahɛ ya te ya nyɛ' paŋa ge te a nɔŋɔlom la bahɛ ya te ya tara popeelom. Ya han tara la nɔyenɛ la Sea la ge me tara nɛreba giinle ge zɔta ninbɔn'ɔn bɔ'ɔra taaba, 2n yeti ya la ninmɔ'ɔrɛ wa te ya tara la tɛn'ɛn koŋɔ la ya bahɛ mam te n popeelom perɛ. Tare ya nɔŋɔlom bɔ'ɔra taaba ge tara nɔyenɛ la tɛn'ɛhegɔ koyena. 3Da bahɛ ya te ya eta la sɛla n de nyika bonɔ bii ya pa'alɛ ya mɛhe te ya ta'an ŋmɛ' ya nyɔn'ɔnrɔ. Ge sirihe ya mɛhe bɔ'ɔra taaba ge tɛn'ɛhe ya daarɛ woo te sɛba gane ya. 4Gee me da kɔ'ɔn behere ya soŋora la ya mɛhe ma'an yele ge behere ya la ya soŋora la taaba yɛla. 5Tare ya bɔŋsɛka te Krista Yesu bɔna la. 6Te a yɛla woo daa kɔ'ɔn dɛna la Yenɛ. Ge a daa ka tɛn'ɛhere te pɛnregerɛ poan a wan teregɛ zona la Yenɛ. 7Ge bala mea zan'an, a mɛŋa potɛn'ɛrɛ poan a daa dekɛ sɛla woo te a tara la bahɛ, ge ana wo yameŋa la. Ba daa dɔgɛ en te a dɛna la asaala. 8A daa de se'em n daa sirihe a mɛŋa ge daa nana Yenɛ te ba daa tare en keŋɛ ta ko', te a ki' punpuuredɔɔ zuo la. 9Te dena wa zuo te Yenɛ daa tebegɛ en ge daa bo en yu'urɛ se'ere n gane yu'ura zan'an. 10Dene poan, Yesu yu'urɛ poan, sɛla woo n boe saazuo ha, la teŋa, la teŋa poan poan ha wan dɔnbelɛ a nɛŋa na'aha en. 11Ge nɛra woo wan yeti Krista n de Na'ayenɛ. Te dena wan dɛna pɛnka bo to Sɔ Yenɛ. 12Bala, n zɔ'sonɔ wa, n mi' te mam n daa boe la ya la, ya daa nane mam. Ge, la de ninmɔ'ɔrɛ te ya ton nana mam nananawa mam pon ka le bɔna la ya wa. Bala, de ya sɛba n wan zɔta dabeem la Yenɛ la ya ta'an tom nyɛ' ya faanrɛ. 13Se'ere n sɔe la, Yenɛ boe la ya daarɛ woo ya tooma poan, te a bahɛ ya te ya bɔta la ya ta'an nana n bote se'em la. 14Sɛla woo te ya yeti ya eŋɛ, da nyɔne ya taaba bii ŋmɛ'ɛra nɔkpe'ene de zuo. 15Bala wan bahɛ te ya tara dɛngerɔ, ka tara ganleŋɔ, ge dɛna Yenɛ yelemɛŋɛrɛ kɔma sɛba n boe nɛrepotɔpa la toonbe'erodoma zen'enhe la. Nɛɛre ya wo ŋmarebibihe n boe saŋgbanɛ zuo la bo ba, 16wo yan mɔɔlɛ yelesoma n tare vom kena na la bo ba. Te ya han eŋɛ bala, n wan nyɛ' sore ta'an ŋmɛ' n nyɔn'ɔn ya zuo Krista dabaherɛ daarɛ la. Se'ere n sɔe la, la wan pa'alɛ te n zeka la woo la n tooma la ka bahɛ yoo. 17La han dɛna mam vom ka'ɛ wo daam kaanbegɔ bo'olom, te la bahɛ te yan nam Yesu se'em la zo'e, mam poore wan pee ge te n nyeena la ya. 18Bala mea, yamam mɛ poore pee ge te ya nyeena la mam. 19Ge la han dɛna la Na'ayenɛ Yesu potɛn'ɛrɛ, la kan yuue la mam wan bahɛ te Timoti wa'an ya zen'en na. Te bala te n wan malom nyɛ' popeelom pa'ahɛ a han yele mam ya yɛla. 20Te Timoti ma'an n de se'em n ane wo mam wa tɛnra ya yɛla. 21Te nɛra woo kɔ'ɔn zegera la a mɛŋa ma'an yele. Ge dagɛ la yelese'a n de Yesu Krista yɛla. 22Ge ya mɛhe mi' Timoti n tom pa'alɛ a tooma n ane se'em. Ge te enŋa la mam lagom tom wo bia la a sɔ la te to po'e yelesoma la se'em. 23Dene poan, n han ta baŋɛ la wan ta ana mam se'em, n wan tom en te a wa'an ya zen'an na. 24Ge n nam Na'ayenɛ te la kan yuue la mam mɛŋa wan wa'an na behɛ ya. 25La nare me te n tom Epaproditus se'em te ya daa tom en n zen'en te a soŋɛ mam te a lebe ya zen'en na. Enŋa la mam n daa lagom bɔna kalam tona ge a me daa kpeŋera a mɛŋa. 26A dela se'em n kɔ'ɔn keta te a nyɛ' ya zan'an. La me daam en la yamam n daa wom te a bɛn'ɛnre la. 27La dela yelemɛŋɛrɛ te a daa bɛn' mɛ ge a ki'. Ge Yenɛ daa zɔ' a ninbɔn'ɔn. Ge dagɛ la enŋa ma'an te a daa zɔ' ninbɔn'ɔn bo la, ge a daa zɔ' bo la mam me mɛ, te dena wa daa bahɛ mam te n ka nyɛ' sunsagaŋɔ pa'ahɛ. 28Bala, n kɔ'ɔn bɔta mɛ te n bahɛ en te a lebe na. Te bala te ya han nyɛ' en, ya wan le tara popeelom ge a yele ka le daan mam me. 29To'e ya en soŋa soŋa la popeelom wo to sɔɔn Na'ayenɛ poan la. Bo'ore ya nɛrebama taaba woo na'ahegɔ wo enŋa la. 30Se'ere n sɔe la, a daa pɔnhɛ a vom ge daa gee la fiin wa la, a ki' Krista tooma zuo. A daa eŋɛ dena wa te a soŋɛ mam la soŋse'ere te yamam mɛhe daa kan ta'an soŋɛ mam la.

will be added

X\