Filipi 1

1Mam Paul la Timoti sɛba n de Yesu Krista yamehe la n golehɛ gɔŋɔ wa. To golehɛ bɔ'ɔra la yamam sɛba zan'an n de Yenɛ nɛreba, bɔna Filipi teŋa poan la sɛba n de ya zuodoma Yesu sore dɔlɔga poan, la ya sɛba n tone bɔ'ɔra ya lagaŋɔ la. 2To Sɔ Yenɛ la Na'ayenɛ Yesu Krista wan eŋɛ ya som ge bahɛ ya te ya tara la popeelom. 3Mam ne bo Yenɛ fara mɛ saŋa woo te n ne soha bɔ'ɔra ya. 4N ne han soha bɔ'ɔra ya n ne soha mɛ la sunma'ahom. 5Se'ere n sɔe la, yan soŋɛ mam pin'ileŋɔ poan na te n mɔɔlɛ yelesoma la wa paɛ zina wa. 6Bala, n tare n potɛn'ɛrɛ poan te Yenɛ se'em n pin'ilom toonsonɛ dena wa ya zen'en wa wan bahɛ dɛ te de bɔna bala tara tara ta paɛ Krista Yesu lebega daarɛ na. 7Te n kɔ'ɔn tɛnra ya yele mɛ n suunre wa. Bala, la dela ma'an bo mam te n tɛn'ɛha ya yele. Se'ere n sɔe la, ya lagom soŋɛ mam mɛ n tone wa te Yenɛ dekɛ bo mam wa poan, se'em ma'an te n wan bɔna pakadeen la, la mam wa bɔna fai tɔgɔra pɔ'ɔra yelesoma la. 8Ge Yenɛ mi' soŋa soŋa te n tɔgɔre yelemɛŋɛrɛ la mam yeti n nɔŋɛ ya wo Krista Yesu n nɔŋɛ to se'em la. 9Bala, n po'ohere te ya nɔŋerɛ la wan kɔ'ɔn zɔ'ɔra pa'aha. Ya me wan zo'e la yam la bɔkerɛ soŋa soŋa, 10la ya ta'an eta sɛla n de ma'an. Bala te ya kan tona be'em ge kan tara zɛrɛgɛ Krista daarɛ la, 11ya wan perɛ la tontɔɔ vom wɔla n ze'ete Yesu Krista poan na la te la tare pɛnka la na'ahegɔ na bo Yenɛ. 12N sɔɔnrɔ, n bote ya baŋɛ mɛ te mam n daa nyɛ' yelese'a la daa kɔ'ɔn soŋɛ mɛ te yelesoma tooma la tole nɛŋa. 13Dene poan, pɛɛntɛɛnreba la zan'an la sɛba woo n boe kalam wa mi' te n bo pakadeen wa la mam de Krista yameŋa la zuo. 14Ge mam boe pakadeen la bahɛ mɛ te Na'ayenɛ la dɔlɔga la nyɛ sunkanberɛ Yesu sore dɔlɔga la poan, mɔɔla yelesoma la la boraanɛ. 15Ge nɛreba basɛba me mɔɔla Krista yɛla bɔ'ɔra nɛreba nyuunre la zaba zuo. Ge sɛba me mɔɔlɛ dɛ yɛhera la ba suunre poan nɔŋerɛ zuo. 16Ba mi' te Yenɛ n dekɛ toonɛ la bo mam te n tɔgɛ po'e yelesoma la. 17Ge sɛba la me ka mɔɔlɛ Krista yɛla yɛhera la ba sunya poan. Ge ba ete dɛ la nyika zuo. Ba tɛn'ɛhe te ba han eta bala, ba wan maan bahɛ te yɛla zo'e zo'e paɛ mam pakadeen la. 18Ge la ka tare yele. N tare popeelom la Krista yele te ba dekɛ mɔɔlɛ te sɔrɔɔ seko woo poan. Nɛreba mɔɔlɛ dɛ ma'an bii ba ka mɔɔlɛ dɛ ma'an, mam wan kelom tara popeelom la dɛ. 19Se'ere n sɔe la, mam mi' te ya po'ohegɔ zuo la Yesu Krista Sea soŋorɛ poan ba wan bahɛ mam. 20Ge yelese'ere n boe mam suunren te mam gura wa dela mam kan malom zɔ' vi' te n kan tom toonse'ere n de n tone. Ge saŋa woo, pon sɔna nananawa, mam kan zɔta dabeem. Ge mam iŋa wa zan'an, wan tara na'ahegɔ kena Krista zen'en, n vom bii n kum. 21Te mam zen'an, vom dela Krista denɛ. Ge la han le dɛna la n ki', bala n de Yesu Krista denɛ gana zan'an. 22Ge n han nyaŋɛ vɔna, dena n bahere mam te n tona toonse'ere n tare vɔnrɛ. La han dɛna bala, mam yi kan baŋɛ vom n nyane bii hon ki' n nyane. 23Ba zan'an dela yelesonɛ. Ge mam bote n ki' mɛ la n bɔna la Yesu Krista. Te dena n de sɛla n gane zan'an. 24Ge yamam zuo la de ninmɔ'ɔrɛ te n vɔna. 25Dena wa dela yelemɛŋɛrɛ. Bala, n mi' te n wan vɔna bɔna la ya la n soŋɛ ya te ya maan sɛ' ze'ele Yesu sore dɔlɔga la poan ge tara popeelom la yan nam n se'em la. 26Te bala, te ba han ta bahɛ mam te n lebena te n bɔna la ya, ya wan nyɛ' sore malom pa'ahɛ, ge dekɛ mam ŋmɛ' ya nyɔn'ɔn la ya bɔŋa n ane se'em la Yesu Krista. 27Ge sɛla n de ninmɔ'ɔrɛ dela ya bahɛ te ya bɔŋa ana wo Krista yelesoma n bote ya bɔna se'em la. Te bala, te n han wan nyaŋɛ wa'ana behɛ ya bii, n kan nyaŋɛ wa'ana, n wona la n toba te ya kɔ'ɔn sɛ' ze'ele mɛ la suunre deyena. Ge me tara la potɛn'ɛrɛ lagom zegera te ya mɔɔlɛ Yesu yɛla bo nɛreba. 28Da tare ya dabeem la ya diŋdoma la, kpe'em ya mɛ saŋa woo. Wana n wan pa'alɛ te bama wan koŋɛ ge te yamam nyaŋɛ. Se'ere n sɔe la Yenɛ n bo'ore nyaŋerɛ. 29Se'ere n sɔe la, Yenɛ bo sore mɛ dagɛ la ya nam Yesu ma'an ge ya lagom namehe a zuo. 30Nananawa, ya nya wan ta'an lagom la mam te to zabe. Zabe denɛ n bala te ya daa nyɛ' te n zabera dabeha n tole ha la, ge te ya le wom te n kelom zabera wa.

will be added

X\