Obadia 1

1Obadia n nyɛ liligere se'ere n wana. Daana Na'ayenɛ n yele Edom yele se'em n wana. To wom sɔɔleŋa Na'ayenɛ zen'an. Na'ayenɛ tom la a bitonoŋa teŋhe wa zuo na, te a wa'ana yeti, Ihege ya te to keŋɛ ta zabɛ la en. 2Behɛ, a wan eŋɛ hɔ te ho lebege teŋbila teŋhe wa woo poan, te nɛra kan bɔta hɔ. 3Ho nyɔn'ɔn ŋmɛ'a la n pan'ahɛ hɔ. Hom se'emdaana n daa kɛn'ɛre tanhe yogorɛn la kuŋkuma zuto la. Ho yele ho mɛŋa yeti, Ane n wan ta'an bahɛ te mam sigi teŋa? 4Ho han pon wan ta'an ɛngera wo tuguho, tɛ'ɛra ho tegero saazuo ha wo ŋmarebibihe la, n wan daregɛ hɔ bilam ha bahɛ na. Na'ayenɛ n yele. 5Nayigehe han wa'an ho zen'an na bii faanreba n wa'an ho zen'an yu'uŋɔ na, ba wan sagom ne hɔ. Ba kan zone la ban bote sɛla ma'an? Sɛba n kɛɛre dia ho va'amen, ba wan bahɛ basɛba te nɛreba yi'ihe. 6Ba wan fan' hom Esau gaŋɛ bala. Ba wan fan' ho lɔgɔsonɔ seto woo n sogɛ. 7Ho naɛ la sɛba la wan sa'ɛ hɔ ho teŋa la poan ta bahɛ beene zuo. Sɛba n daa ka tare daaŋɔ la hɔ la n wan tuluge zabɛ la hɔ nya faanra ho wa. Ho zɔdoma sɛba n daa dite la ho la n bala dekɛ bɛnregɔ biŋe ho wa. 8Na'ayenɛ yeti, De daarɛ n wan sagom se'em woo n de yamdaana bɔna Edom teŋa poan bahɛ, n wan sagom bɔkerɛ daana woo Esau teŋa zoore la zuo. 9Teman teŋa wa, dabeem wan kɛn' ho pɛɛntɛɛnre ba la zan'an. Ba wan kɔrom se'em woo n boe Esau teŋa poan la bahɛ. 10Hom daa ihege suunre la ho sɔɔn Yakob la zuo, nyanɛ wan di ho. Ba wan sagom hɔ te ho pon kan kilom nɛra. 11Daanse'ere daarɛ te ho daa zin'an vɔ'ɔha ge beha te saama wa'ana vaara a lɔgɔrɔ yɛ'a la. Ba fan' Yerusalem tɔnta ge te ho zin'an ge beha la. Ho daan lagom dɛna la diŋdaana la ayema. 12La ka ane soŋa te ho zagahɛ ho sɔɔn a namehegɔ daarɛ. Ho poorɛ daa ka sone de pee la Yuda nɛreba la sagaŋɔ daarɛ la, bii ho daa ŋmɛ'ɛra ho nyɔn'ɔn ba daaŋɔ dabeha la poan. 13La daa ka nare ne ho me lagom nɛ ne mam nɛreba nayahe la poan ba sunsagaŋɔ dabeha la dabeha la poan. La daa ka nare ne ya behɛ ba yoo ba nɔyalegerɛ dabeha la poan, bii ho daa lagom fan' ba lɔgɔrɔ. 14Ho me daa ka nare ne ho keŋɛ ta zɛ'a sɔrɔɔ yagoma zuo gin'ira a nɛresɛba n zote la, bii ho yongɛ ba ta bo ba diŋdaana la. 15Na'ayenɛ n tare dabaherɛ se'ere gura teŋa woo la pɔnre. Hom n eŋɛ se'em bo ho tadaana la, bala mea te ba wan eŋɛ hom me. Ho mɛŋa be'em la wan tuluge sige ho zuo na. 16Wo hom n daa nyuure se'em mam fa'a zoore wa zuo la, bala mea te teŋhe me wan wa'ana nyu'. Ba wan nyu' malom nyu' wo ba nan ka tabelɛ nyu' me la. 17Ge faanrɛ wan bɔna Na'ayenɛ zoore wa zuo. De wan dɛna fa'a, te Yakob yire wan sɔe de lɔgɔrɔ la sɔna. 18Yakob yire wan dɛna bugum, te Yosef yire dɛna bugum peelom. Esau yire wan dɛna mɔɔ, te ba taɛ dɛ di te nɛre beeliho kan gee Esau buuri la poan. Na'ayenɛ yele se'em n bala. 19Nɛresɛba n boe Negev poan la n wan sɔe Esau zɔya la, te nɛresɛba n kɛn'ɛre zɔya tilain la wan sɔe Pilistidoma teŋa la. Ba wan sɔe Epraim la Samaria teŋhe, te Benyamin to'e Gilead teŋa. 20Israeldoma sɛba n zɔ ta bɔna Kanaan teŋa la wan to'e teŋa la ta paɛ Zarepat teŋa, te sɛba me n ze'ele Yerusalem zɔ ta bɔna Separad teŋa poan la me wan sɔe Negev la teŋhe la zan'an tara. 21Faanrɛ wan zom paɛ Yenɛ zoore la zuo, la de to'e Esau bɔŋa zen'an la beha, te sɔ'ɔlom la dɛna Na'ayenɛ sɔ'ɔlom.

will be added

X\