Kanlɛ 9

1Te Na'ayenɛ yele Moses Sinai pɔgɔtia teŋa la poan, ban ze'ele Mizraim teŋa poan yehena, ba yuuma ayi' ŋmarega pɔhega daarɛ. 2A yeti, Bahɛ te Israeldoma dɛ'ɛna Azootole De'eŋɔ wa, ko de'eŋɔ saŋa la poan. 3Ya dɛ'ɛna kɔ ŋmarekana wa ka ŋmarepeelega poan dabeha pia la anaahe daarɛ, la ya dɔla ko malema la zan'an. 4Te Moses daa yele Israeldoma la te ba di Azootole De'eŋɔ la, 5te ba daa di ko de'eŋɔ la pɔgɔtia la poan ha. 6Ge sɛba ka nyaŋɛ di Azootole De'eŋɔ la. Se'ere n sɔe la kum n ganlom ba. Bala, ba wa'an la Moses, la Aron zen'an na daan denɛ mea daarɛ, 7yele Moses yeti, Tomam ganlom mɛ, ge bene n wan bahɛ te tomam kan lagom dekɛ te bo'olom bo Na'ayenɛ la te Israeldoma la de'eŋɔ wa saŋa wa poan? 8Te Moses lebehe yele ba yeti, Gure ya te n ɛ Na'ayenɛ potɛn'ɛrɛ, n de se'em doohe ya poan. 9Te Na'ayenɛ yele Moses yeti, 10Yele Israeldoma wa yeti, ba buuri la poan, yamam bii ya yaahe han ta ganlom yɛhera la en kalom kum, bii a keŋɛ la zen'an te Azootole dabaherɛ la daarɛ, a ta'an lagom di Na'ayenɛ Azootole De'eŋɔ la. 11Ba dɛ'ɛna kɔ yuunɛ woo ŋmarehe seyi' ka ŋmarepeelega poan dabeha pia la anaahe daarɛ. Yire woo ko' pebila la ba obe ko nɛnɔ la boroboro se'ere n ka tare mi'ihom ge la ba dekɛ bon tereha booɛ boroboro la la ba obe. 12Ba da gee nɛnɔ la ze'ele te to yelegɛ beere, bii ba ŋma' ko kɔnba. Ba han dɛ'ɛna Azootole De'eŋɔ la, ba dɔla ko malema la zan'an. 13Ge nɛra se'em me n ka ganlom a mɛŋa, ge me ka keŋɛ zen'an ge zagahɛ la de'em Azootole De'eŋɔ la, ba ŋmaɛ en Israeldoma la poan bahɛ. Se'ere n sɔe la, a ka dekɛ Na'ayenɛ bo'olom la bo en lan son ne te a bo en se'em ma'an la. Nɛre ena daana wan di a mɛŋa yelebe'ero taalɛ. 14Se'em n de saana ge zin'an la ya han bɔta te a lagom di Azootole De'eŋɔ la sontii a doohe ko sore, la ko malema la n de se'em la. Malema se'a te yamam mɛŋa dɔla la, aŋa mea, te ya wan dekɛ bo saana la me. 15Daanse'ere daarɛ te ba daa tin' Sogorɛ ba'ahɛ la. Zaanɔɔrɛ tara tara la bolika, saŋgbanɛ se'ere n pin' Sogorɛ la ane wo bugum la. 16De kɔ'ɔn kelom ana la bala, saŋgbanɛ la daa pin' ko la bala, ge yenɛ han man'ɛn, saŋgbanɛ la ne ana mɛ wo bugum la. 17Saŋgbanɛ la ne han bahɛ Sogorɛ zɛnkɛ de mɛŋa zom saazuo, Israeldoma la ne pɔhɛ la kenɛ te de le ta sige na te ba yee bilam. 18Na'ayenɛ n ne bo ba nɔɔrɛ te ba keŋɛ, te a ne le bo ba nɔɔrɛ te ba ze'ele. Saŋgbanɛ han ne daa bɔna la Sogorɛ, Israeldoma la boe la bala ba kan keŋɛ. 19Saŋgbanɛ la ne han daa pin' Sogorɛ la yuura, Israeldoma wa daa ne man'ɛn la ba mɛhe, ge nana Na'ayenɛ n bo ba nɔse'ere la, ge ka pɛnregera te ba keŋɛ nɛŋa. 20Saŋsɛka ne daa bɔna te saŋgbanɛ la pin' Sogorɛ la dabeha fiin wa. Na'ayenɛ han bo ba nɔɔrɛ, ba ze'ele, te a han le bo ba nɔɔrɛ, ba keŋɛ. 21Saŋsɛka ne daa bɔna te saŋgbanɛ la ne pin' Sogorɛ la zanɔɔrɛ tara tara la bolika, te saŋgbanɛ la han ne pilige bolika, ba ne daa pɔhɛ la kenɛ. La han pon dɛna bolika bii yu'uŋɔ, te saŋgbanɛ la pilige, ba ne daa pɔhɛ la kenɛ. 22Saŋgbanɛ la me han daa pin' toolom yire la yɛ'ɛha dabeha ayi' bii ŋmarega bii yuunɛ, Israeldoma la boe la bala ba kan keŋɛ, ge saŋbanɛ la pilige, ba ne daa pɔhɛ la kenɛ. 23Na'ayenɛ n ne daa bo nɔɔrɛ te ba ze'ele, Na'ayenɛ n ne le bo ba nɔɔrɛ te ba kena. Ba yuun nane Na'ayenɛ n bo'ore a nɔɔrɛ se'em dɔla Moses poan la mɛ zan'an.

will be added

X\