Kanlɛ 8

1Te Na'ayenɛ yele Moses yeti, 2Yele Aron yeti, A han ze'ele butolela zɛ'ɛlehe bayopɔe la, bo nyaŋɛ nɛɛra bugum zɛ'ɛhega la n suge zen'an la nɛŋan. 3Te Aron enŋɛ bala, a dekɛ butolela ze'ele bo tontɔɔ zɛ'ɛlehe zuo Na'ayenɛ n bo Moses nɔɔrɛ se'em la. 4Ban maalɛ butolela zɛ'ɛlega la se'em n wana. A kɔ'ɔn dɛna la sanlema ma'an te ba dekɛ yagom a zen'an n ze' teŋa la ta paɛ a zuin. Ba maalɛ zɛ'ɛlega wa me wo Na'ayenɛ n pa'alɛ Moses se'em la. 5Te Na'ayenɛ yele Moses yeti, 6Yehe Levi buuri la, Israeldoma la poan, la ho sɔ ba. 7Ho han yeti ho pee ba, ho wan enŋɛ se'em n wana, dekɛ ko'om sebo n duuhere la, la ho miihe ba zuo ge bahɛ te ba kɔɔnhɛ kɔnbe seto woo n boe ba inŋai, ge pee ba lɔgɔrɔ, Ban wan pee ba mɛhe se'em n bala. 8Bahɛ te ba tara lɔletalɛ la ka ki bɔ'a bo'olom la, n de ki' somɔ zom te ba nɛm bɛ la kaam la na, ge te ho le bahɛ te ba tare lɔlega kayema na pa'ahɛ, te kaŋa dɛna yelebe'ero kaanbegɔ bo'olom. 9Te ho tare Levi buuri la wa'an Sogorɛ la poan na, la Israeldoma la zan'an. 10Ho dekɛ Levi buuri wa ze'ele Na'ayenɛ nɛŋan, te Israeldoma la dekɛ ba nu'uhe pagelɛ ba zuo kan' bo ba. 11Aron n wan dekɛ Levi buuri la pa'alɛ Na'ayenɛ wo Israeldoma n dekɛ ba bo'olom te ba pa'alɛ en la, te ba ta'an maahom te ba tom Na'ayenɛ tooma la. 12Levi buuri la n degehɛ ba nu'uhe pagelɛ lɔlehe la zuto ba'ahɛ, ko' lɔle sɛka n de be'em bo'olom la bo Na'ayenɛ, ge kayema la me dela nyɔ'an bo'ohom. Bala te ba maalɛ be'em duuhego bo Levi buuri la. 13Bahɛ te Levi buuri la ze'ele Aron la a kɔma la nɛŋan, te ho dekɛ ba pa'alɛ Na'ayenɛ wo yan ne dekɛ ya bo'olom pa'alɛ en se'em ge bo en la. 14Sɔrɔɔ kona poan te ho wan yehe Levi buuri Israeldoma la poan ze'ele, Levi buuri la dela mama bonɔ. 15Ho han sɔ ge duuhe Levi buuri la ba'ahɛ, ge dekɛ ba pa'alɛ mam wo bo'olom te ya ne zɛnkɛ pa'alɛ mam se'em la, ba ta'an kena Sogorɛ la poan tona ba tooma n de se'em. 16Bama dela Israeldoma se'a n son te ba dekɛ ba mune mune bo mam. Mam mɛŋa n ganhɛ ba bo n mɛŋa te bama tee dɛna Israeldoma wo pɔka bideeŋa n de bodibila. 17Israeldoma bondɔɔ deeŋa woo, a de nɛra, bii duŋa dela mam bonɔ. Mam n yuun ko Mizraim teŋa bideeŋa woo la, n yuun bahɛ Israeldoma bideenhe la bo la n mɛŋa. 18N tee dekɛ la Levi buuri ze'ele Israeldoma bideenhe la na'arɛ. 19Israeldoma la poan zan'an, n dekɛ la Levidoma wa bo Aron la a dayɔɔhe te ba tona Sogorɛ la poan tooma, te ba ze'ele Israeldoma zan'an na'arɛ poan la te ba duuhe be'em bɔ'ɔra Israeldoma zan'an, te namehego da paɛ ba, ban keŋɛ lɛm Saraa la. 20Te Moses la Aron la Israeldoma la zan'an enŋɛ Levi buuri la wo Na'ayenɛ n bo Moses a nɔɔrɛ se'em la. 21Te Levi buuri wa sɔ ba mɛŋa ge pee ba futo. Te Aron zɛnkɛ ba pa'alɛ ba Na'ayenɛ nɛŋa ge maalɛ be'em duuhego te ba ka tare dɛngerɔ. 22Bala woo n daa ta ba'ahɛ la, Levi buuri wa wa'an Sogorɛ la poan na tona ba tooma n de se'em. Aron, la a dayɔɔhe la n de sɛba n pa'ale ba ban wan tona se'em. Ba ete Levi buuri wa me wo Na'ayenɛ n bo Moses a nɔɔrɛ la se'em la. 23Na'ayenɛ yele Moses yeti, 24Levi buuri la n wan enŋɛ se'em, te boraa sɛka woo n paɛ yuuma pihiyi', la anuu beene yɛ'ɛha ta'an wa'ana tona Sogorɛ la poan, 25ge ba han ta paɛ yuuma pihinuu, ba bahɛ ge da le tona. 26Ba ta'an soŋɛ ba sɔɔnrɔ la te ba tona ba Sogorɛ tooma, ge bama mɛŋa da le tole nɛŋa tona tooma. Hon n wan bo Levi buuri wa tooma se'em n bala.

will be added

X\