Kanlɛ 6

1Te Na'ayenɛ yele Moses yeti, 2Yele Israeldoma zan'an yeti, boraa bii pɔka han pɔ' nɔɔrɛ te a yehe a mɛŋa bo mam Na'ayenɛ, dɛna Nazar. 3A da nyuura daam n mɔle, bii daam kpe'eŋo, a daana da nyu' sɛla n mi'e, bii tɔkɔrɛ. A da nyu' tiihe wɔla daam, bii a dita tiihe wɔla man'aha bii wɔla kɛ'ɛhe. 4Enŋa n bɔkɛ a mɛŋa ze'ele la, a vom dabeha woo poan, a da dita ban dekɛ tia wɔla maalɛ sɛla, a da di tia la mɛŋa wɔla, bii obe ka biile. 5Yuuma se'a woo poan te a pɔ' nɔɔrɛ te a bɔkɛ a mɛŋa a tɔka, baraga da kalom a zuo. A dɛna Na'ayenɛ ma'an denɛ gura saŋsɛka te dabeha se'a te a bɔkɛ a mɛŋa a tɔka bo Na'ayenɛ la ta paɛ. A bahɛ te a zuo zonto wɔgɛ yula na. 6Saŋsɛka te a bɔkɛ a mɛŋa a tɔka bo Na'ayenɛ la woo poan, a da lɛna kum. 7A mɛŋa sɔ bii ma, a keema, bii a tanya han pon ki, a da ganlom a mɛŋa bama zuo. A zuo zonto la n de a danlehom. 8Saŋsɛka te a bɔkɛ a mɛŋa tɔka bo Na'ayenɛ la woo, a dela Na'ayenɛ toolom bonɔ. 9Ge nɛra han kɔ'ɔn ki a nɛŋan, a ganlom a zonto la n de Na'ayenɛ toolom bonɔ la mɛ n bala, a kɛ a zonto la peere daarɛ la n de dabeha ayopɔe daarɛ la bahɛ. 10Dabeha a nii daarɛ la, a tare dayɛma ayi', bii nadoma dayɛma ayi' wa'an malemadaana zen'an na, Sogorɛ la nɔɔrɛn na. 11Malemadaana la wan dekɛ ayema kaanbɛ te la dɛna be'em kaanbegɔ, ge dekɛ ayema me kaanbɛ te la dɛna nyɔ'an bo'olom te la dɛna a be'em duuhego la n lɛm kum ganlom la. De daarɛ mea te a wan le dekɛ a zuo la bo Na'ayenɛ. 12A wan le dekɛ a mɛŋa le bo Na'ayenɛ, ta paɛ saŋsɛka te a bɔkɛ a mɛŋa a tɔka bo Na'ayenɛ la, ge me wan tara pedibiga n de yuunɛ na te ka dɛna tuure bo'olom. Dabeha se'a woo te a pon bɔkɛ a mɛŋa a tɔka bo la ka le pa'ahɛ. Se'ere n sɔe la a poan te a ganlom ka poan mɛ. 13Se'em n yehe a mɛhe bo mam dɛna Nazar n wan dɔla pa'alegɔ se'ere. Saŋsɛka te a bɔkɛ a mɛŋa a tɔka bo Na'ayenɛ la han ta tole, ba wan tare en wa'an Sogorɛ la nɔɔrɛn wa. 14Bilam te a wan dekɛ a bo'olom la bo Na'ayenɛ, bo dɛna yuunɛ pedibiga te sɛla ka enŋɛ ka te koŋɔ dɛna nyɔ'an bo'olom, ge tara yuunɛ pesa'arɛ n de yuunɛ te sɛla ka enŋɛ ka te koŋɔ dɛna be'em kaanbegɔ, la peraa te sɛla ka enŋɛ ka, te kaŋa dɛna sunma'ahom bo'olom, 15ge tara pi'ɔ n perɛ la boroboro n ka tare mi'ihom te be dekɛ zom somɔ maalɛ la kaam boroboro la boroboro bonpegehe la kaam ge tara boom la daam bo'olom la pa'ahɛ. 16Te malemadaana la dekɛ lɔgɔrɔ la paɛ Na'ayenɛ nɛŋan, kaanbɛ be'em bo'olom la, la nyɔ'an bo'olom la. 17A me wan dekɛ boroboro se'a n ka tare mi'ihom la paɛ Na'ayenɛ nɛŋan, ge kaanbɛ peraa la me te kaŋa dɛna sunma'ahom bo'olom bo Na'ayenɛ la boom la daam bo'olom la zan'an. 18Se'em n bɔkɛ a mɛŋa a tɔka bo Na'ayenɛ dɛna Nazar la wan siie a zonto la Sogorɛ la nɔɔrɛn wa, te a daa dekɛ bo Na'ayenɛ la, vaɛ to nyɔ' bugum sebo n dite sunma'ahom bo'olom kaanbegɔ la poan, 19ge te malemadaana la, dekɛ peraa la bɔkɔ en pon dɔgɛ, enŋɛ a nu'uhen, ge loe boroboro la n ka tare mi'ihom la deyena la boroboro bonpegehe n ka tare mi'ihom la deyena pi'ɔ la poan bo en. 20Malemadaana la wan zɛnkɛ ba pa'alɛ Na'ayenɛ, te ka lebege toolom bonɔ, dɛna malemadaana la denɛ. Nyɔn'ɔn la la gbɛya la zan'an wan lagom zɛnkɛ pa'alɛ Na'ayenɛ. Bala han ba'ahɛ Nazar la ta'an nyu' daam. 21Pa'alegɔ seko n boe bo se'em n bɔkɛ a mɛŋa a tɔka bo Na'ayenɛ dɛna Nazar pɔ' nɔɔrɛ te a bo bo'olom wo n bɔkɛ a mɛŋa a tɔka bo Na'ayenɛ te la sona te a bo se'em la, la sɛla woo te a mɛŋa wan ta'an bo pa'ahɛ la. La dela pɛnregerɛ te a enŋɛ sɛla woo doohe la enŋa n yehe a mɛŋa bo Na'ayenɛ se'em la. 22Te Na'ayenɛ yele Moses yeti, 23Yele Aron, la a dayɔɔhe la yeti, ban wan kan'ara se'em bɔ'ɔra Israeldoma dela, 24Na'ayenɛ wan maalɛ hɔ, ge tara hɔ. 25Na'ayenɛ wan nɛɛ a mɛŋa bo ho, ge zo'ohɛ hɔ. 26Na'ayenɛ wan ŋmɛregɛ a nɛŋa tɔ hɔ, ge bo ho sunma'ahom. 27Ban wan yi'ira mam yu'urɛ bɔ'ɔra Israeldoma wa se'em n bala, te en kan'ara baha ba zuo.

will be added

X\