Kanlɛ 4

1Te Na'ayenɛ yele Moses la Aron yeti, 2Kanlɛ Kohat buuri wa sɛba n de Levi buuri la yizuo yizuo, la deo deo. 3Kanlɛ borase'ehe woo n de yuuma pihitan' yɛ'a yuuma pihinuu, tona Sogorɛ wa poan la. 4Kohat buuri wa toonɛ Sogorɛ la poan dela, ba behera toolom lɔgɔrɔ la. 5Tiiheŋɔ la han ne ta yeti ko yeregɛ, Aron la a dayɔɔhe la n wan kɛn' Sogorɛ la poan ta lorehe tama se'a woo n dekɛ pin' lebehe na la, dekɛ a pɔnbɛ nɔbiŋere daka la. 6Dekɛ ko' nahɔ ganɛ pin' ka, dekɛ tanɛ n de sɔbele pɔɔnhegɔ pin' ka saazuo na, nya dekɛ dɔɔseto n tare ziira ka la tuhe ka yogoro la poan. 7Dekɛ tanɛ n de sɔbele pɔɔnhegɔ pin' tebole se'ere te toolom boroboro paga de zuo la, nya vaɛ toolom lapɛrehe la laabibihe la kaanbegɔ laahe la kiŋkiihe se'ehe n tara tona daam kaanbegɔ tooma la yagelɛ de zuo, pa'ahɛ la boroboro la. 8Ba dekɛ tanɛ mɔlega pin' lɔgɔtona wa, nya dekɛ ko'naahɔ ganɛ pin', ge dekɛ dɔɔseto n tare ziira dɛ la tuhe de yogoro la poan. 9Ba dekɛ tanɛ n de sɔbele pɔɔnhegɔ pin' bugum zɛ'ɛhega la, te ba tara bugum sugeta ka zuo la, la butoleladoma la, la se mi'inhe, se laahe, la se laahe se'ehe te ka kaam bɔna se poan la zan'an. 10Ba dekɛ lɔgɔtona wa woo pɔnbɛ ko'naahɔ ganɛ poan, dekɛ enŋɛ bonziila poan. 11Ko'ɛnka daka la me, ba dekɛ tanɛ sɔbele pɔɔnhegɔ pɔnbɛ ka, dekɛ ko'naahɔ ganɛ pɔnbɛ pa'ahɛ, ge dekɛ dɔɔseto n tare ziira ka la tuhe ka yogoro la poan. 12Ba degehɛ lɔgɔseto woo n tara deo la poan zan'an pɔnbɛ la tanɛ n de sɔbele pɔɔnhegɔ, dekɛ ko'naahɔ ganɛ pɔnbɛ pa'ahɛ, dekɛ enŋɛ bonziila poan. 13Ba ne vaɛ tampegelom la n boe kaanbegɔ daka la poan la, ge dekɛ tanɛ mɔlɔgɔ pin' ka. 14Ba dekɛ lɔgɔseto woo n tara tona daka la poan tooma la, saya, kuto seto n tara degeha nɛnɔ, la vaahe, la laahe se'ehe n tara miiha la enŋɛ nyɔgom daka wa poan, dekɛ ko'naahɔ ganɛ pɔnbɛ, ge dekɛ dɔɔseto n tare ziira ka la tuhe ka yogoro la poan. 15Aron la a kɔma la han pɔnbɛ toolom lɔgɔrɔ la woo ba'ahɛ, te tiiheŋɔ maahom kenɛ, Kohat buuri la n wan zi toolom lɔgɔrɔ la. Ge ba nu'o da kalom toolom lɔgɔrɔ la ge ba wan ki. Kohat buuri n wan ziira toolom la poan lɔgɔrɔ la woo. 16Eleazar n de Aron n de malemadaana dayɔa la n wan behera kaam sebo n la tara nyɔn'ɔra butolela la ko'ɛnka la daarɛ woo boom bo'olom la soa kaam. Enŋa n wan behera Sogorɛ la ko toolom lɔgɔrɔ la zan'an. 17Te Na'ayenɛ yele Moses la Aron yeti, 18Behɛ ya soŋa te Kohat buuri yizuo wa da ŋmaɛ yehe Levi buuri tooma la poan. 19Bala te ba han lɛm toolom lɔgɔrɔ wa, ba wan vɔna kan ki. Enŋɛ dena wa bo ba. Aron la a dayɔɔhe la n ne wan kɛn' Sogorɛ la poan ta tɔnrɛ nɛra woo toonɛ bo ba. 20Ge Kohat buuri la da lagom kɛn' bini te ba behɛ toolom lɔgɔrɔ la la fiin me, ge ba wan ki. 21Na'ayenɛ yele Moses yeti, 22Kanlɛ Gerson buuri wa yizuo yizuo, la deo deo. 23Kanlɛ borase'ehe woo n de yuuma pihitan' beene yɛ'a yuuma pihinuu, tona Sogorɛ wa poan la. 24Gerson buuri la toonɛ toolom buuri yire la poan dela, 25ba ziira ko tama se'a n ne dekɛ lo yule Sogorɛ la ko'nii gana la n ne dekɛ pile ko yeŋa na la ko nɔɔrɛn tama la 26tama se'a n ne yule pin' ko zenzaka la n kae la kaanbegɔ daka la zenzaka la nɔɔrɛ tama la ko mi'inhe la lɔgɔseto woo n tare tona Sogorɛ la tooma la. Gerson buuri la n wan tara lɔgɔtona tona to tooma n de se'em. 27Ba zia tooma la toon se'a woo te ba wan tona la zan'an, Aron la a dayɔɔhe la n wa bɔ'ɔra ba sore te ba tona, ban ziire bii ban ete sɛla zan'an, Aron la a dayɔɔhe la n sone te ba behera ba te ba tona. 28Gerson buuri la yizuto la toonɛ n bala Sogorɛ la poan. Malemadaana Aron dayɔa Itamar n wan bɔ'ɔra ba sore te ba tona ba tooma la. 29Kanlɛ Merari buuri wa yizuo yizuo, la deo deo. 30Kanlɛ borase'ehe woo n de yuuma pihitan' beene yɛ'a yuuma pihinuu, tona Sogorɛ la poan la. 31Merari buuri la toonɛ Sogorɛ la poan dela, ba ziira ko dɔɔrɔ la woo la dɔpuuto la dɔɔseto n ne biŋe teŋa te deo la tin' yagelɛ la 32dɔɔrɔ seto ne sɛ ko zenzaka la kae la to ze'elehe la kpa'ahe la mi'inhe. Merari buuri wa n tone toolom yire la poan la, nɛra woo n wan ziira sɛla. 33Malemadaana Aron dayɔa Itamar n wan behera ba te ba tona ba tooma n de se'em. 34Te Moses la Aron, la Israeldoma keendoma la nam Na'ayenɛ, kaanlɛ Kohat buuri la yizuo yizuo, la deo deo woo behɛ ba kanlɛ n de se'em. 35Kanlɛ borase'ehe woo n de yuuma pihitan' beene yɛ'a yuuma pihinuu, tona Sogorɛ la poan la. 36Kanlɛ dela Kohat buuri la poan, tuha ayi' la kɔbehe seyopɔe la pihinuu (2750). 37Kohat buuri wa yizuo la poan, borase'ehe n tone Sogorɛ la poan kaanlɛ en bala te Moses, la Aron kaanlɛ wo Na'ayenɛ n bo Moses nɔɔrɛ se'em la. 38Te ba kaanlɛ Gerson buuri la yizuo yizuo, la deo deo woo, 39te borase'ehe woo n de yuuma pihitan' beene yɛ'a yuuma pihinuu, tona Sogorɛ la poan la. 40Kanlɛ dɛna tuha ayi' la kɔbehe seyoobe la pihitan' (2630). 41Gerson buuri yizuto la poan, borase'ehe n tone Sogorɛ la poan kaanlɛ n bala te Moses la Aron kaanlɛ, wo Na'ayenɛ n bo ba nɔɔrɛ se'em la. 42Te ba kaanlɛ Merari buuri la yizuo yizuo, la deo deo woo, 43borase'ehe woo n de yuuma pihitan' beene yɛ'a yuuma pihinuu, tona Sogorɛ la poan la, 44te se kaanlɛ dɛna tuha atan' la kɔbehe seyi' (3200). 45Merari buuri yizuto la poan, borase'ehe n tone Sogorɛ la poan kanlɛ n bala te Moses la Aron kaanlɛ wo Na'ayenɛ n bo ba nɔɔrɛ se'em la. 46Te Moses, la Aron, la Israeldoma keendoma la nam Na'ayenɛ, kaanlɛ Levi buuri la yizuo yizuo, la deo deo woo. 47Te borase'ehe woo n de yuuma pihitan' beene yɛ'a yuuma pihinuu, tona Sogorɛ la poan la, 48kaanlɛ dɛna tuha anii la kɔbehe senuu la pihinii (8580). 49Wo Na'ayenɛ n bo Moses a nɔɔrɛ se'em la, ba kaanlɛ nɛra woo n boe Sogorɛ la poan tona bii ziira mɛ wo Na'ayenɛ n bo Moses nɔɔrɛ se'em la.

will be added

X\