Kanlɛ 36

1Te Yosef buuri yizuto basɛba n de Manase dayɔa Makir bia Gilead keendoma la wa'ana yele Moses la Israeldoma yizuto keendoma yeti, 2Na'ayenɛ bo to daana wa nɔɔrɛ te ho ŋmɛ' gbaŋa tɔnrɛ teŋa wa bo Israeldoma wa te la dɛna ba sɔ'ɔlom, ge le bo to daana wa nɔɔrɛ te ho dekɛ Zelopehad sɔ'ɔlom bo a pɔyɔɔhe la. 3Ge ba han ele la Israeldoma la poan nɛra se'em, ba yehe ba tɔntɛ la bo ban ele buuri se'ere la, pugunto la tɔntɛ n wan yehe tomam zen'an se'em n bala. 4Te Israeldoma Peraa Iila Peebego saŋa la han paɛ, ba wan yehe ba tɔntɛ la pa'ahɛ bama n ele zen'an la, ba wan yehe ba tɔntɛ tomam sɔ sɔ'ɔlom la poan se'em n bala. 5Te Moses bo Israeldoma la zan'an nɔɔrɛ, doohe Na'ayenɛ n bo en nɔɔrɛ se'em la yeti, Yosef buuri la n tɔgɛ se'em la dela sera. 6Na'ayenɛ n bo nɔɔrɛ doohe Zelopehad pɔyɔɔhe wa te ba bahɛ te ba ele ban bote se'em, ge ba ele ba sɔ buuri la poan ma'an. 7Bala te Israeldoma wa sɔ'ɔlom la kan vaara lɔmeha buuri kaara, ge Israeldoma la woo wan tara la ba yaaba ba yaaba sɔ'ɔlom. 8Pugula sɛka woo n tare tɔntɛ ka sɔ sɔ'ɔlom poan kan ele zen'an, han dagana ka sɔ buuri la poan ma'an, bala te Israeldoma wa zan'an wan tara ba yaaba sɔ'ɔlom ba yaaba sɔ'ɔlom. 9Bala te Israeldoma sɔ'ɔlom kan vaara lɔmeha buuri kaara, ge Israeldoma la woo wan tara la ba yaaba sɔ'ɔlom ba yaaba sɔ'ɔlom. 10Na'ayenɛ n bo Moses nɔɔrɛ se'em la, Zelopehad pɔyɔɔhe la doohe la bala mea. 11Te Zelopehad pɔyɔɔhe wa, Mala la Tirza la Hogla la Milka la Noah ele ba sɔɔn dayɔɔhe. 12Ba ele la Yosef dayɔa Manase buuri la poan, te ba sɔ'ɔlom la yee ba sɔ buuri la poan. 13Nɔya kona la nɔze'elego ana te Na'ayenɛ doohe Moses poan tɔgɛ bo Israeldoma la, saŋsɛka te ba wa bɔna Moab sɛnka la poan, Yordan Kolaa nɔɔrɛn, te Yeriko bɔna yakenɛ deyema la ha la.

will be added

X\