Kanlɛ 31

1Te Na'ayenɛ yele Moses yeti, 2Lerege Midiandoma wa ban enŋɛ Israeldoma se'em la ge te ho daarɛ ta paɛ. 3Te Moses yele Israeldoma yeti, Maahom ya pɛɛntɛɛnreba ya poan te ba keŋɛ zaberɛ la, ba dekɛ Na'ayenɛ leregere la ta lerege Midiandoma wa. 4Yehe ya Israeldoma la woo yizuo woo poan pɛɛntɛɛnreba tuhure, te ba zan'an dɛna tuha pia la ayi', tom te ba keŋɛ ta zabɛ. 5Te Israeldoma la yizuo woo poan ganhɛ nɛre tuhure, te ba zan'an dɛna nɛre tuha pia la ayi', maahom pɛɛntɛɛnrɛ. 6Te Moses tom nɛre tuhure tuhure la n yehe Israeldoma la yizuo woo poan na la zaberɛ la poan, ge dekɛ Eleazar n de malemadaana la dayɔa Pinehas, la toolom lɔgɔrɔ la, la zaberɛ tentana eŋɛ a nu'uhen te a doohe zaberɛ la. 7Te ba zabɛ la Midiandoma wa wo Na'ayenɛ n bo Moses nɔɔrɛ se'em la, ko boraa woo. 8Ba ko Midian nadoma Evi la Arekem la Zur la Hur la Areba, Midian nadoma bana banuu wa, ba ko ba mɛ lagom la nɛresɛba woo te ba ko la, ge ko Beor dayɔa Balaam. 9Te Israeldoma nyɔkɛ Midian pɔgɔhe la ba kɔma la ba nii la piihe, ge vaɛ ba lɔgɔsonɔ woo. 10Ge te ba nyɔ' Midian teŋkanra la te ba kɛn'ɛra la, la ba teŋa la ba pɛɛntɛɛnreba tiiheŋɔ zen'enhe la bugum. 11Ge ba vaɛ sɛla woo n boe teŋa la poan dɛna nɛresaala bii duŋa keŋɛ. 12Te ba tare nɛresɛba te ba nyɔkɛ la, la dunhe la te ba pe'e la zan'an yɛ'a Moses la Eleazar n de malemadaana la Israeldoma la zen'an, Moab sɛnka la n lɛm Yordan Kolaa te Yeriko teŋa bɔna yakenɛ deyema ha la. 13Te Moses la Eleazar n de malemadaana la, la Israeldoma nɛŋadoma la yehe to'oha ba tiiheŋɔ la yeŋa ha. 14Te Moses sunsunya nyie la zaba nɛŋadoma la sɛba me n de nɛŋadoma behera nɛre tuha la sɛba behera nɛre kɔbehe, nan ze'ele pɛɛntɛɛnrɛ la poan lɛbera na la. 15Te Moses yele ba yeti, Ya bahɛ pɔgɔsena wa woo mɛ? 16Behɛ ya, bama n yuun doohe Balaam kan'aŋɔ, pan'ahɛ Israeldoma te ba kaanbɛ Peor bagarɛ te too yuun sige Israel zuo la. 17Bala zuo, ko ya bia woo n de bodibila, la pɔka woo n mi' boraa ba poan nananawa. 18Ge pugunto seto woo n boe ba poan nan ka mina boraa, bahɛ ya bama tara ya mɛhe. 19Hom se'em woo n ko nɛra, bii kalom kum zaberɛ la poan la, yehe tiihom ya yeŋa ha dabeha ayopɔe. Ge ya pee ya mɛŋa dabeha atan', la dabeha ayopɔe daarɛ la poan. 20Ge pee futo la gana lɔgɔrɔ woo la boohe kɔnberɔ n dekɛ wogɛ sɛla woo la dɔɔ lɔkɔ woo te ya fan' la. 21Te Eleazar n de malemadaana la nya yele pɛɛntɛɛnreba la n nan ze'ele zaberɛ la poan lebena la yeti, Malema se'a n boe pa'alegɔ la poan te Na'ayenɛ dekɛ bo Moses la dela, 22sanlema la sanlenpeelega la nyɔgom la kuto la kurumaana ma'an, 23sɛla woo te bugum ka ta'an, ya wan pee ba la bugum, ge nya miihe ba la ko'om, te la dɛna ba peere. Ge sɛla woo te bugum ta'an, ya miihe bama la ko'om te la dɛna ba peere. 24Ya pee ya futo dabeha ayopɔe daarɛ da dɛngɛ, la ya ta'an kɛn' tiiheŋɔ la poan na. 25Te Na'ayenɛ tɔgɛ bo Moses yeti, 26Hom la Eleazar n de malemadaana la yizuto keendoma la, doohe kaanlɛ lɔgɔseto woo te ba vaɛ na la, nɛresaaleba la dunhe zan'an. 27Tɔnrɛ ya lɔgɔrɔ la bo pɛɛntɛɛnreba la n keŋɛ ta zabɛ la Israeldoma lagaŋɔ la zan'an. 28Ge to'ohe lɔgɔyeŋɔ lɔgɔrɔ kɔbehe senuu woo poan pɛɛntɛɛnreba la n kɛŋɛ ta zabɛ la zen'an bo Na'ayenɛ. To'e lɔgɔyeŋɔ ba tɔntɛ la lɔgɔrɔ kɔbehe senuu woo poan. Nɛresaaleba la nii la bonhe la piihe zan'an te la dɛna koberɛ bo Na'ayenɛ. 29To'e lɔkɔ kona ba tɔntɛ la poan bo Eleazar n de malemadaana la te la dɛna bo'olom bo Na'ayenɛ. 30Ge Israeldoma la tɔntɛ poan, to'e lɔgɔyeŋɔ lɔgɔrɔ pihinuu woo poan. Nɛresaaleba la nii la bonhe la piihe la dunhe la zan'an poan, dekɛ bo Levidoma la n behere Na'ayenɛ Sogorɛ la. 31Te Moses la Eleazar n de malemadaana la enŋɛ doohe Na'ayenɛ n bo Moses a nɔɔrɛ se'em la. 32Pɛɛntɛɛnreba la n vaɛ lɔgɔrɔ la na te ba tɔnrɛ te lɔgɔseto gee dela piihe tuha kɔbehe seyoobe la tuha pihiyopɔe la tuha anuu (675,000) la 33nii tuha pihiyopɔe la tuha ayi' (72,000) la 34bonhe tuha pihiyoobe la deyena (61,000) la 35pɔgɔse'ehe n ka mi' boraa dela tuha pihitan' la tuha ayi' (32,000). 36Pɛɛntɛɛnreba sɛba n keŋɛ zaberɛ la tɔntɛ dela piihe tuha kɔbehe setan' la tuha pihitan' la tuha seyopɔe la kɔbehe senuu (337,500). 37Te se poan, koberɛ n wan yɔ bo Na'ayenɛ dɛna piihe kɔbehe seyoobe la pihiyopɔe la senuu. 38Nii tuha pihitan' la tuha seyoobe (36,000), te se poan, koberɛ n wan yɔ bo Na'ayenɛ dɛna nii pihiyopɔe la boyi'. 39Bonhe tuha pihitan' la kɔbehe senuu (30,500), te se poan, koberɛ n wan yɔ bo Na'ayenɛ dɛna, pihiyoobe la kayena. 40Te nɛreba la me dɛna tuha pia la tuha ayoobe (16,000), te ba poan, koberɛ n wan yɔ bo Na'ayenɛ denɛ dɛna nɛre pihitan' la bayi'. 41Te Moses to'ohe koberɛ se'ere n de Na'ayenɛ denɛ la bo Eleazar n de malemadaana la wo Na'ayenɛ n bo Moses nɔɔrɛ se'em la. 42Israeldoma la tɔntɛ te Moses yelege de lɔgɔseto te pɛɛntɛɛnreba la n keŋɛ ta zabɛ ge vaɛ na la poan n wana. 43Israeldoma la n tɔnrɛ lɔgɔseto la dela piihe tuha kɔbehe setan' la tuha pihitan' la tuha ayopɔe la kɔbehe senuu (337,500) la 44nii tuha pihitan' la tuha ayoobe (36,000) la 45bonhe tuha pihitan' la kɔbehe senuu (30,500) la 46nɛreba tuha pia la ayoobe (16,000). 47Te Moses to'e Israeldoma la nɛra woo tɔntɛ poan, nɛreba la dunhe la zan'an, lɔgɔyeŋɔ lɔgɔrɔ kɔbehe senuu woo poan, te sɛla n de koberɛ bo Na'ayenɛ la, dekɛ bo Levi buuri la n behere Na'ayenɛ Sogorɛ la wo Na'ayenɛ n bo Moses nɔɔrɛ se'em la. 48Te kpɛ'ɛndoma sɛba n behere pɛɛntɛɛnreba tuha tuha la sɛba n de nɛŋadoma beha pɛɛntɛɛnreba kɔbehe kɔbehe la wa'an Moses zen'an na, 49yele Moses yeti, Ho yamehe wa kaanlɛ pɛɛntɛɛnreba sɛba woo n boe to nu'uhen la te pɛɛntɛɛnra la ayena me ka bɔregɛ. 50Bala te to tare to bo'olom to sanlema tɔntɛ la poan na te to bo Na'ayenɛ: nu'uhe banhe la nu'toohe la tobekayulehe la nyugela banhe. Te bote te to maalɛ be'em duuhego Na'ayenɛ nɛŋan. 51Te Moses la Eleazar n de malemadaana la to'e sanlema la, la ba lɔgɔrɔ la woo te ba tare na la. 52Te sanlema la te zaba nɛŋadoma la n behere tuha la kɔbehe la tare na bo Na'ayenɛ la zan'an tebehom zone sanlema kpila tuha pia la tuha ayoobe la kɔbehe pihiyopɔe la pihinuu (16,750). 53Pɛɛntɛɛnreba la woo fan' lɔgɔrɔ mɛ zaberɛ la poan bo ba mɛhe. 54Te Moses la Eleazar to'ohe zaba nɛŋadoma n behere pɛɛntɛɛnreba tuha la sɛba behera kɔbehe wa sanlema bo'olom la tare kɛn' Sogorɛ la poan na, te la tɛɛnha Israeldoma wa Na'ayenɛ nɛŋan.

will be added

X\