Kanlɛ 3

1Aron la Moses tuunhom n wana, pɔhera se'em ma'an te Na'ayenɛ tɔgɛ bo Moses Sinai Zoore zuo la. 2Aron dayɔɔhe dela, Nadab n de keema, tagela Abihu, Eleazar, la Itamar. 3Aron n de malema nɛŋadaana la dayɔɔhe n bala te a sɔ te se dɛna malemadoma tona. 4Ge Nadab la Abihu lu la Na'ayenɛ nɛŋan ki Sinai Pɔgɔtia la poan, doohe la bama n tare bugum yoo na tona kaanbegɔ tooma la. Ba me ka tare dayɔɔhe nana, bala te Eleazar la Itamar ma'an dɛna malemadoma ba sɔ Aron saŋa la tona. 5Te Na'ayenɛ yele Moses yeti, 6Tare Levidoma wa na bo Aron n de malemadaana wa te ba soŋora en. 7Bama n wan soe tona Sogorɛ la poan tooma bɔ'ɔra enŋa la nɛresɛba woo n boe Sogorɛ la poan. 8Bama n wan behere Sogorɛ lɔgɔrɔ zan'an, ge tona Israeldoma dayɔɔhe n wan tone ne toon se'a Sogorɛ la poan la. 9Tare Levidoma wa bo Aron la a dayɔɔhe wa. Levidoma wa n de toolom lɔkɔ seko te ba yehe ko Israeldoma poan bo Aron. 10Loe Aron la a dayɔɔhe wa te bama dɛna malemadoma. Se'em yoo en lɛm toolom zen'an wa, ba wan ko en. 11Na'ayenɛ yele Moses yeti, 12Mam yehe Levidoma wa woo mɛ Israeldoma wa poan te ba tee dɛna Israeldoma bideeŋa dɔgom bo'olom. Levidoma la dela mam denɛ. 13Mam yuun ko Mizraim teŋa poan bideeŋa woo mɛ, ge bahɛ Israeldoma bii duŋa woo bideeŋa bo n mɛŋa. Bideeŋa woo dela mam denɛ. Mam Na'ayenɛ n yele. 14Te Na'ayenɛ yele Moses Sinai Pɔgɔtia la poan yeti, 15Doohe Levidoma wa yizuto woo, yire woo poan kaanlɛ Levidoma wa. Kanlɛ Levidoma wa yizuo yizuo, deo deo bibodibila woo n nan de ŋmarega bii ŋmarehe seyi' beene yɛ'ɛha. 16Te Moses kaanlɛ ba wo Na'ayenɛ n bo en a nɔɔrɛ se'em la. 17Levi dayɔɔhe dela Gerson la Kohat la Merari. 18Gerson yizuto dela Libni la Simei. 19Kohat yizuto dela Amram la Izhar la Hebron la Uziel. 20Merari yizuto dela Mali la Musi. Levi buuri yizuto n bala. 21Gerson yizuto dela Libni la Simei. Gerson buuri yizuto n bala. 22Ban kaanlɛ Gerson yizuto boraahe la, pɔhera bodibila woo n de ŋmarega beene yɛ'ɛha la, ba zan'an kanlɛ dela tuha ayopɔe la kɔbehe senuu (7500). 23Gerson yizuto tiiheŋɔ nɛŋa bɔba zen'an boe la Sogorɛ la pooren ha, 24te Lael dayɔa Eliasap dɛna ba nɛŋadaana. 25Gerson yizuto wa toone Sogorɛ la poan dela, ba behera Sogorɛ la sɛla n tare pila kɔ la ko nɔɔrɛn tama la 26tama se'a n yule kae zenzaka la tama se'a n tare yula nɔɔrɛ sɛka n dole kɛn'ɛra zenzaka la n kae Sogorɛ la la kaanbegɔ daka la ka mi'inhe la lɔgɔseto woo n tare tona toon aŋa. 27Kohat yizuto dela Amram la Izhar la Hebron la Uziel. Kohat buuri yizuto n bala. 28Ban kaanlɛ Kohat boraahe la, pɔhera bodibila woo n de ŋmarega beene yɛ'ɛha la, ba zan'an kanlɛ dela tuha anii la kɔbehe seyoobe (8600). Kohat boraahe wa toonɛ Sogorɛ la poan dela, ba sɔna saraa la poan behera. 29Kohat yizuto tiiheŋɔ zen'an boe la Sogorɛ la gɔbega bɔba, 30te Uziel dayɔa Elizapan dɛna ba nɛŋadaana. 31Kohat yizuto wa tooma a se'a Sogorɛ la poan dela, ba behera nɔbiŋere daka la tebole la bugum zɛ'ɛlega la toolom dagahe la la lɔgɔseto woo n tare tona Sogorɛ la poan la, tama se'a n lo beŋɛ saraa la, la sɛla woo n tare tona Sogorɛ la poan tooma. 32Te Aron n de malema nɛŋadaana la dayɔa Eleazar dɛna Levidoma wa nɛŋadaana. Enŋa te ba loe te a behera sɛba woo n tonɛ Sogorɛ la poan. 33Merari yizuto dela Malidoma, la Musidoma. Merari yizuto n bala. 34Ban kaanlɛ Merari boraahe la, pɔhera bodibila woo n de ŋmarega beene yɛ'ɛha la, ba zan'an kanlɛ dela tuha ayoobe la kɔbehe seyi' (6200), 35te Abihail dayɔa Zuriel dɛna ba nɛŋadaana. Ba buuri yizuto tiiheŋɔ zen'an boe la Sogorɛ la zuɔ bɔba. 36Merari yizuto wa toonɛ Sogorɛ la poan dela, ba behera Sogorɛ la dɔɔrɔ seto n tare sɛɛra la dɔɔrɔ seto n pagete la se ze'elehe la lɔgɔseto woo n tare tona toon aŋa taaba la zan'an la 37dɔɔrɔ seto n ne dekɛ sɛ kae zenzaka la to ze'elehe la kpa'ahe la mi'inhe la. 38Moses la Aron la Aron dayɔɔhe la tiiheŋɔ zen'an boe la Sogorɛ la pooren tɔɔra sɔɔnrom, lɛm Sogorɛ la nɛŋan na. Ba behera Saraa wa la Israeldoma la ge se'em yoo n wa'an lɛm Saraa la, ba ko en. 39Moses la Aron doohe la Na'ayenɛ n bo ba a nɔɔrɛ se'em la, kaanlɛ Levi buuri wa yizuo yizuo, pɔhera bodibinto n nan de ŋmarega beene yɛ'ɛha, te ba zan'an kanlɛ dɛna tuha pihiyi' la tuha ayi' (22,000). 40Te Na'ayenɛ yele Moses yeti, Kanlɛ Israeldoma bideeŋa woo n de bodibila nan dɛna ŋmarega bii gaŋɛ ŋmarega, la ho golehɛ se yu'ura. 41Dekɛ Levidoma wa bo mam, te bama tee dɛna Israeldoma la kɔmdeena en bala, ge dekɛ Levidoma wa dunhe bo mam, te se tee dɛna Israeldoma dunhe sare sare kɔma n bala. Mam de Na'ayenɛ. 42Bala te Moses kaanlɛ Israeldoma kɔmdeena la zan'an wo Na'ayenɛ n bo en nɔɔrɛ se'em la. 43Te boraa n de bideeŋa woo, pɔhera bodibila en nan de ŋmarega beene yɛ'ɛha te ba golehɛ ba woo yu'ura ta tooɛ la zan'an kanlɛ dɛna tuha pihiyi' la tuha ayi' la kɔbehe seyi' la pihiyopɔe batan' (22,273). 44Te Na'ayenɛ yele Moses yeti, 45Dekɛ Levidoma wa te ba tee dɛna Israeldoma zan'an kɔmdeena n bala, ge dekɛ Levidoma wa dunhe te se tee dɛna Israeldoma zan'an duŋdeeŋa n bala. Levi buuri dela mam denɛ. Mam n de Na'ayenɛ. 46Ban wan yɔ se'em to'e Israeldoma kɔmdeena kɔbehe seyi' la pihiyopɔe la batan' la n zooe Levidoma la kanlɛ la dela, 47sanlenpeelega kpila anuu, nɛra woo zuo, te tebehom la zona la barega n pɔ'ɛ ban magahe se'em Sogorɛ poan la. 48Te ho dekɛ ligiri wa n dekɛ yɔ to'e Israeldoma wa en zooe kanlɛ la bo Aron la a dayɔɔhe la. 49Te Moses to'ohe ligise'e n de yɔ ge to'e sɛba n zo'e kanlɛ zen'an. 50Ge te a to'ohe sanlenpeelega Israeldoma kɔmdeena sɛba zen'an la zan'an dela, kpila tuhure la kɔbehe setan' la pihiyoobe la anuu (1365), te a tebehom zona la ban makere se'em Sogorɛ la poan la. 51Te Moses dekɛ ligise'e te ba dekɛ yɔ to'e wa bo Aron la a dayɔɔhe la wo Na'ayenɛ n bo en nɔɔrɛ se'em la.

will be added

X\