Kanlɛ 27

1Zelopehad sɔ dela Heper, te a sɔ dɛna Gilead, se'em sɔ n de Makir, se'em sɔ n de Manase, te Manase sɔ dɛna Yosef. Zelopehad pɔyɔɔhe wa yu'ura dela Mala la Noah la Hogla la Milka la Tirza. 2Te ba wa'an na ze'ele Sogorɛ la nɔɔrɛn, Moses la Eleazar n de malemadaana la Israeldoma la zan'an nɛŋan yeti, 3Tomam sɔ yuun ki la pɔgɔtia la poan ha. A yuun ka pa'ahɛ Kora dɔlɔba la n yuun lagahɛ ba mɛhe n zabɛ la Na'ayenɛ la poan, ge a mɛŋa be'em la zuo te a ki, ge te a me ka tara bodibila. 4Bene zuo te to sɔ yu'urɛ wan saalom yizuo la poan n ka tare bodibila la zuo? Bahɛ te to tɔntɛ to sɔ sɔɔnrɔ la tɔntɛ poan. 5Te Moses tare ba yele la wa'an Na'ayenɛ zen'an na, 6te Na'ayenɛ yele en yeti, 7Zelopehad pɔyɔɔhe la n yele se'em la dela sera. Dekɛ ba sɔ tɔntɛ a sɔɔnrɔ lɔgɔrɔ la poan bo ba te la dɛna ba sɔ'ɔlom, lebehe dekɛ ba sɔ lɔgɔrɔ la bo ba. 8Ge yele Israeldoma wa te se'em han ki ge ka bahɛ bodibila, ba dekɛ a lɔgɔrɔ la bo a pɔyɔa. 9A han ka le tara pɔyɔa, ya dekɛ a lɔgɔrɔ la bo a sɔɔnrɔ. 10Bala han ka le bɔna, ya dekɛ bo a sɔ sɔɔnrɔ. 11A sɔ la han ka tara sɔɔnrɔ, ya dekɛ bo a yiren nɛra te a sɔna. Lɔgɔ vaarɛ nɔze'elego wa boe la bala bo Israeldoma la wo Na'ayenɛ n bo Moses nɔse'ere la. 12Te Na'ayenɛ nya yele Moses yeti, Keŋɛ zom Abarim zɔya la zuo ha, la ho ta behɛ teŋsɛka te n dekɛ bo Israeldoma wa. 13Ho han ta behɛ ba'ahɛ, ho me wan ki wo ho keema Aron n yuun ki se'em la. 14Nɛreba la n yuun ta ŋmɛ'ɛra nɔkpe'ene la mam ko'om la n boe Zin Pɔgɔtia poan ha la, yamam me yuum kperɛ la toba la mam yelehom la, ka na'ahɛ mam se'em n de fa'a wa ba nɛŋan. Kolehe sena wa dela Meriba ko'om sebo n boe Kades teŋa, Zin Pɔgɔtia la poan ha la. 15Te Moses yele Na'ayenɛ yeti, 16Na'ayenɛ n de Yenɛ. Se'ere n sɔe nɛresaala woo vom. Te a wan tee nɛre te a beha nɛreba wa. 17Nɛra se'em n ne wan tare ba yehe ge tare ba lebena, se'em ne wan bɔna nɛŋa te ba yehe, ge tare lebena, te Na'ayenɛ nɛreba la da ana wo piihe n ka tare duŋkeena. 18Te Na'ayenɛ yele Moses yeti, Yehe Nun dayɔa Yosua, se'em te sea paŋa bɔna la en la, la ho dekɛ ho nu'o pagelɛ a zuo kan'. 19Tare en na bahɛ te a ze'ele malemadaana Eleazar la Israeldoma la zan'an nɛŋan, la ho bo en sore ba nɛŋan. 20Bo en ho paŋa la taaba te Israeldoma la zan'an nana en. 21A wan paara la malemadaana Eleazar, te a ne lobe Urim Na'ayenɛ nɛŋan, pa'alɛ en n wan enŋɛ se'em. Enŋa ne wan bo n nɔɔrɛ te Yosua la Israeldoma la zan'an yehe, enŋa n wan ne le bo ba n nɔɔrɛ te ba lebe na. 22Te Moses eŋɛ wo Na'ayenɛ n yele en se'em la, tare Yosua ta ze'ele malemadaana Eleazar la Israeldoma la zan'an nɛŋan, 23ge nya dekɛ a nu'uhe pagelɛ a zuo, bo en sore wo Na'ayenɛ n yele en se'em la.

will be added

X\