Kanlɛ 24

1Balaam n ta nyɛ te Na'ayenɛ poorɛ pee mɛ te a kan' bahɛ Israeldoma zuo la, a ka a boka tooma la, a ŋmɛregɛ tɔ la pɔgɔtia bɔba la ha. 2Balaam n behɛ ha nyɛ te Israeldoma la tiihom ba yizuo, yizuo pɔgɔtia la poan ha la, te Yenɛ sea sige a zuo na, 3te a yele a yele sabelɛ yeti, Mam Beor dayɔa Balaam yele sabela n wana, se'em nini n nyɛte filim la yele sabela n wana, 4se'em n wone Yenɛ yɛla la, se'em te Gaŋɛ Zan'an Yenɛ liligera yɛla bɔ'ɔra mam la, se'em n pɔnte na'ma pu'uhera la, se'em te Yenɛ mɛŋa yu'ɛ a nini la yele sabela n wana. 5Yakob, behɛ ho sogora la la n ane soŋa se'em. Behɛ ho bɔŋa zen'an la n nare se'em! 6Ba yalegerɛ mɛ wo paberɛ la, ana wo va'am n lɛm kolega la, ana wo tiihe te Na'ayenɛ mɛŋa borɛ la, ana wo mɔlɔsomɔ tiihe n ze' lɛm kolega la. 7A dogorɔ wan perɛ la ko'om yabera, te a buuri lɛm la ko'om, te a naba dɛna nakantɛ gana Agag, te a sɔ'ɔlom nyɛta na'ahegɔ. 8Yenɛ mɛŋa n tare ba ze'ele Mizraimdoma yehe na, te a paŋa bɔna la ba wo mɔen nahɔ la. Ba aanhene ba diŋdoma teŋhe mɛ, ŋma'ara ba konba bura bura, ge tara ba pɛɛma lota ba. 9Ba ne kaanrom mɛ ge gan'anrɛ wo gbegenɛ la gura. Ba ane mɛ wo gbegenɛ n nan dɔgɛ la, ane n wan daam ba? Se'em n kan' bo ho, kan'an dɔla ba, se'em n pɔ' bo ho, pɔa dɔla ba. 10Bilam te Balak sunsunya nyie la Balaam te a pa' nu'uhe sa' ge yeti, Mam yi' ho na te ho pɔ mɛ bahɛ n diŋdoma wa zuo, ge sugumnɔɔren botan' n wana te ho kan' bo ba wa. 11Bala, bahɛ kalam nananawa ge kule ho yire. Mam yele ne te n wan bo ho la bo'olom sebo n tebegɛ, ge Na'ayenɛ n gu' bo te bo dagɛ ho denɛ. 12Te Balaam yele Balak yeti, N ka yele ne nɛresɛba te ho tom na la yeti, 13te Balak han pon dekɛ a yire la te de perɛ la sanlenpeelega la sanlema me'en bo mam, mam kan ta'an tɔgɛ mam mɛŋa potɛn'ɛrɛ som bii be'em fiin wa, la n pɔ'ɛ Na'ayenɛ n bo mam nɔse'ere, ge mam wan tɔgɛ la Na'ayenɛ n yele mam se'em la ma'an? 14Nananawa, mam ye' lɛbera la n nɛreba zen'an, ge wa'ana te n te'ele yele ho nɛreba wa n wan ta enŋɛ ho nɛreba la se'em dabeha se'a en kene na la poan. 15Te a yele yele sabela ana wa yeti, Mam Beor dayɔa Balaam yele sabela n wana, se'em nini n nyɛte filam la yele sabelɛ n wana. 16Se'em n wone Yenɛ yɛla la yele sabelɛ n wana, se'em yam n ze'ete Saazuo Daana la zen'an na la, se'em te Gaŋɛ Zan'an Yenɛ la liligera yɛla bɔ'ɔra mam la, se'em n pɔnte na'ma pu'uhera la, se'em te Yenɛ mɛŋa yu'ɛ a nini la yele sabela n wana. 17Mam nyɛte en, ge dagɛ nananawa, mam nyɛte en ge a ka lɛm. Ŋmarebila wan ze'ele Yakob zen'an yehe na. Na'am doore wan ze'ele Israel poan yehe na. A wan wɔnrɛ Moabdoma zuto, ge aanhom Sete dayɔɔhe la zan'an. 18Ba wan zabɛ nyaŋɛ Edomdoma la Seir teŋa n de ba diŋdoma la, ge Israeldoma wan malom kpe'em. 19Naba wan ze'ele Yakob poan yehe na sagom sɛba n yee fiin teŋa la poan la zan'an. 20Te Balaam ta nyɛ Amalek, yele ba yele sabelɛ yeti, Amalek n daa boe nɛŋa teŋhe wa woo poan, ge sagaŋɔ wan paɛ ba ba'ahegɔ poan. 21Te a le nyɛ Kendoma, yele ba yele sabelɛ yeti, Ya bɔŋa zen'an boe la fai, ya tegero tɛ' la taŋa zuo, 22ge la bala zan'an Assurdoma wan ta zabɛ nyɔkɛ ya sagom ya. 23Te a yele a yele sabelɛ yeti, Yenɛ han ta eta yele ana wa zan'an, ane n wan vɔna? 24Ɔɔnrɔnɔ wan ze'ele Kitim wa'ana fan' Assur la Eber teŋhe zan'an, ge sagaŋɔ me wan paɛ bama mɛhe me. 25Te Balaam nya ihege kula, te Balak me yɔɔɛ a sɔrɔɔ.

will be added

X\