Kanlɛ 20

1Yuunɛ pɔhega ŋmarega la poan te Israeldoma la zan'an keŋɛ na paɛ Zin Pɔgɔtia la, tiihom lɛm Kades teŋa. Bilam te Miriam ki, te ba pin' en bilam mea. 2Ko'om ka boe bini te nɛreba la wan nyu', te nɛreba la lagahɛ na te ba zabɛ la Moses la Aron. 3Ba gaara la Moses yɛta te, To han pon ki ne wo to sɔɔnrɔ la en lu Na'ayenɛ nɛŋan ki ne se'em la, la sɔi' ne. 4Bene zuo te ho tare Na'ayenɛ nɛreba kɛn' pɔgɔtia wa poan na, te tomam la to dunhe wa zan'an ki? 5Bene zuo te ho tare to ze'ele Mizraim teŋa poan yehe wa'an zen'yaalega wa poan na? Ka poan ka tare biili bii kenkama bii tiihe wɔla bii *pomegranate se'a n dite. Ko'om pon ka bɔna ka poan te to wan nyu'. 6Te Moses la Aron yehe nɛreba la poan keŋɛ ta paɛ Sogorɛ la nɔɔrɛn gan'arɛ teŋa, te Na'ayenɛ soŋa nɛɛ ba zen'an. 7Te Na'ayenɛ yele Moses yeti, 8Dekɛ doore la, te hom la ho keema Aron lagahɛ Israeldoma la zan'an na. Ba han lagahɛ na, ho tɔgɛ bo taŋa wa ba ninin, ge ko'om wan ze'ele ka poan yehena na. Ho wan bahɛ te ko'om yehe taŋa wa poan na bo nɛreba wa, te bama la ba dunhe la nyu'. 9Bala te Moses dekɛ doore la Na'ayenɛ nɛŋan wo Na'ayenɛ n bo en nɔɔrɛ se'em la. 10Te enŋɛ la Aron lagahɛ Israeldoma la zan'an ze'ele taŋa la zen'an, te Moses yele ba yeti, tobekperegadoma wa kelehe ya, tomam bahɛ te ko'om ze'ele taŋa wa poan yehe na bo ya? 11Te Moses zɛnkɛ a nu'o ŋmɛ' taŋa la boyi' la doore la, te ko'om ɔlɔgera na, te nɛreba la, la ba dunhe la zan'an nyu'. 12Ge Na'ayenɛ yele Moses la Aron yeti, Yamam ka nam mam la, ka na'ahɛ mam se'em n de fa'a daana la Israeldoma wa nɛŋan la zuo, dagɛ yamam n wan tare nɛreba wa ta kɛn' teŋsɛka te n dekɛ bo ba la poan. 13Ko' bɔna te ba yi'ira Meriba la, zen'an te Israeldoma ga la Na'ayenɛ la, la zen'an te Na'ayenɛ nɛɛ a mɛŋa ba poan pa'alɛ ba te enŋa dela fa'a la. 14Te Moses ze'ele Kades teŋa tom nɛreba Edom Naba zen'an yɛta en te, ho yebega Israel en yeti se'em wana, ho mi' daaŋɔ seko woo n sige to zuo. 15Tomam sɔyaabdoma yuun sige la Mizraim teŋa, te to bɔna la bilam ha yuuma n ka ta'an eta. Te Mizraimdoma wa namehera tomam, la to sɔdoma la, 16ge tomam kaahɛ bo la Na'ayenɛ, te a wom to koonɔ la, ge tom a soŋora, te a wa'ana tare tɔ ze'ele Mizraim teŋa poan yehe na. Nananawa, to boe la Kades teŋa n boe ho teŋa wa beene ha la. 17To belone ho mɛ, bahɛ te to doohe ho teŋa la poan tole. To kan nɛ se'em va'am ho teŋa la poan, bii to saaɛ se'em tiihe wɔla se'a en dite, bii to nyu' ho teŋa la bulehe ko'om. To wan kɔ'ɔn dɔla la ho teŋa la poan naba sɔrɔɔ kena, to kan ŋmɛregɛ zuɔ bii gɔbega, gura te to ta zooe ho teŋa la. 18Ge Edom lebehe yeti, Ya kan doohe kalam, ya han sina ge yeti ya doohe kalam, to wan yehe na zabɛ la ya. 19Te Israeldoma la me lebehe yeti, Tomam wan dɔla la sɔrɔɔ ma'an zuo ho teŋa wa poan tɔla, tomam mɛŋa, bii to dunhe han nyu' ho teŋa la poan ko'om, to wan yɔ. Tomam yen bɔta te to nɛ la ho teŋa la poan tole, to ka bote sɛla pa'ahɛ. 20Te Edomdoma la lebehe yeti, Ya kan doohe kalam tole. Te Edom nya lagahɛ a pɛɛntɛɛnreba en zo'e ge kpe'em, te ba zabɛ la Israeldoma la. 21Edom en ka sakɛ te ba doohe a teŋa la poan tole la, Israeldoma la ŋmɛregɛ mɛ keŋɛ ge bahɛ ba. 22Te Israeldoma la zan'an ze'ele Kades, keŋɛ ta paɛ Hor Zoore la. 23Hor Zoore la en lɛm la Edom teŋa beene la poan, te Na'ayenɛ ta yele Moses, la Aron yeti, 24Aron dabeha paɛ ya. A kan kɛn' teŋsɛka te n dekɛ bo Israeldoma wa. Se'ere n sɔe la, ya bayi' la daa kperɛ la toba la mam n bo ya nɔse'ere Meriba ko'om la zen'an la. 25Tare Aron, la a dayɔa Eleazar zom Hor Zoore la zuo. 26Ta yɛɛhɛ Aron futo la yɛɛlɛ a dayɔa Eleazar. Se'ere n sɔe la, Aron dabeha paɛ ya, a wan ki la bilam. 27Te Moses enŋɛ wo Na'ayenɛ n bo en nɔɔrɛ se'em la. Te ba zom Hor Zoore la zuo Israeldoma la zan'an ninin. 28Te Moses yɛɛhɛ Aron futo la, tee yɛ' Aron dayɔa Eleazar. Te Aron ki' zoore la zuo bilam. Te Moses la Eleazar nya ze'ele zoore la zuo sige na. 29Nɛreba la n ta baŋɛ te Aron ki mɛ la, Israeldoma la zan'an kaahɛ la dabeha pihitan' a zuo.

will be added

X\