Kanlɛ 18

1Te Na'ayenɛ yele Aron yeti, Hom, la ho dayɔɔhe, la ho sɔ kɔma n sɔe tuure se'ere woo te ba tuura Sogorɛ wa behera, hom la ho dayɔɔhe la ma'an n sɔe tuure se'ere te ba tuura malemadoma la ziira. 2Tare ho Levi buuri la ya Levi yizuto la poan wa'ana pa'ahɛ te ba lagom soŋora ho, hom la ho dayɔɔhe wa n boe Sogorɛ tona toon se'a wa. 3Ba kelehe la hom, ba toonɛ dela ba tona Sogorɛ toom se'a woo, ge ba da lɛna Saraa bii kaanbegɔ zen'an lɔgɔrɔ. Han dagana bala bama la hom zan'an wan ki. 4Ba wa'ana lagom bɔna la hɔ, ge ba toonɛ dela ba sɔna Sogorɛ la tooma behera, ge se'em da lɛm hom boe zen'an Sogorɛ la poan la. 5Hom me dela ho sɔna Saraa la poan la kaanbegɔ daka la behera, bala te n sunsunya kan lu Israeldoma wa zuo na le yɛ'ɛha. 6Mam mɛŋa n ganhɛ ho Levi taaba la Israeldoma woo poan te ba dɛna ho bonɔ, dekɛ ba bo Na'ayenɛ te ba tona tooma Sogorɛ la poan. 7Ge hom la ho dayɔɔhe la n de sɛba n de malemadoma sɔna malema tooma la, la daka zen'en la Saraa la poan zan'an. N dekere malema tooma wa bɔ'ɔra ho mɛ wo bo'olom la. Se'em me n lɛm Saraa la, ko ya en. 8Te Na'ayenɛ yele Aron yeti, Mam mɛŋa n dekɛ bo'olom sebo woo te Israeldoma tara bɔ'ɔra mam te bo dɛna fa'a bo'olom la enŋɛ ho nu'uhen ho soa kaam zuo. N dekɛ bo'olom bona wa bo la hom la hɔ dayɔɔhe la te la dɛna malema saŋa woo. 9Yamam n sɔe Saraa poan tɔntɛ laa tɔntɛ se'ere n ka ete bugum poan la. Bo'olom sebo woo te ba tara kena na bɔ'ɔra mam te bo dɛna fa'a bo'olom la, bo dela ki' bo'olom bii be'em bo'olom, bii tuure bo'olom, tɔntɛ se'ere n de Saraa poan tɔntɛ la dela hom la ho dayɔɔhe la bonɔ. 10Dite ya ka dɔla fa'a dia te ba dita se'em la, boraahe ma'an n wan dita ka. 11Sɛla woo te Israeldoma ne tare na te ya zɛnkɛ ka pa'alɛ Na'ayenɛ ge ne aan sɛla ze'ele la me dela ya bonɔ. A dekere lɔgɔtona wa bɔ'ɔra la hom, la ho dayɔɔhe, la ho pɔyɔɔhe te la dɛna malema saŋa woo bo'olom. Se'em woo n de hɔ yiren la nɛra ge ka ganlom ta'an di ka. 12Kaam somɔ la zan'an, la daam somɔ la zan'an, la ki' la di'deena la te Israeldoma la tare wa'ana te ba bo Na'ayenɛ wa me dela yamam bonɔ. 13Teŋa la di'deena bo'olom la te nɛreba la tara kena na la dela yamam bonɔ. Se'em woo n de ho yiren nɛra ge ka ganlom ta'an di ka. 14Sɛla woo n boe Israel teŋa poan dɛna Na'ayenɛ bonɔ dela yamam bonɔ. 15Sɛla woo bondeeŋa, la han dɛna nɛra bii duŋa, te ba tare na bo Na'ayenɛ, dela yamam bonɔ. Ge ho ne bahɛ te ba tee yɔ sanlenpeela bo bondeena woo, bii duŋsɛka n de duŋdeeŋa woo te ba tare na te ka ka ana soŋa. 16Ba han ne dɔgɛ ba te ba paɛ ŋmarega, ho bahɛ te ba yɔ sanlenpeelega kpila anuu ana wo Yenɛ deo kpila la n zone se'em la barega n pɔ'ɛ pihiyi'. 17Ge da tee to'e sanlenpeela la duŋdeeŋsɛka n de lɔlega, bii pehego, bii boa bama dela fa'a. Dekɛ ba ziim la miihe kaanbegɔ daka la, ge la ho dekɛ ba kaam la nyɔ' te la dɛna nyɔ'an bo'olom te bo nyuŋo la ana soŋa bo Na'ayenɛ. 18Ba nɛnɔ la dela hom bonɔ wo bo'olom sebo te ya ne zɛnkɛ pa'alɛ Na'ayenɛ la nyɔn'ɔn la bɔ zuɔ gbere n ne dɛna ho bonɔ se'em la. 19Sɛla woo te ya ne yehe Israeldoma wa fa'a bo'olom la biŋe te lan dela Na'ayenɛ bonɔ la, mam dekɛ bɔ'ɔra la hom, la ho dayɔɔhe, la ho pɔyɔɔhe te bo dɛna malema saŋa woo bo'olom. Yele dena wa dela ma puurɛ zan'an nɔbiŋere Na'ayenɛ zen'an bɔ'ɔra hom la, ho yaahe zan'an. 20Te Na'ayenɛ yele Aron yeti, Ho kan tara tɔntɛ ba teŋa la poan bii ho tara tɔntɛ la ba. Mam n de hom la ho buuri n boe Israel teŋa wa poan la tɔntɛ. 21N dekɛ la Israeldoma pia porogerɛ bo'olom la bɔ'ɔra Levi buuri wa te la dɛna ba sɔ'ɔlom doohe la ban tone toon se'a Sogorɛ la poan la. 22Pɔhɛ zina yɛ'ɛha, Israeldoma la da lɛna Sogorɛ la, ba han enŋɛ bala ba wan nyɛ ba yelebe'ero yɔɔrɛ, ba wan ki. 23Levi buuri la n wan tona Sogorɛ la poan, ge behera tuure se'ere woo n boe bini. Malema dena kɔ'ɔn bɔna la ya yɛ'ɛha. Ba kan tara tɔntɛ la Israeldoma la. 24Mam n ton bo Levi buuri wa sɔ'ɔlom sebo dela Israeldoma pia porogerɛ bo'olom la te ba tara kena na bɔ'ɔra Na'ayenɛ la. Bala zuo n tɔgɛ ba yeti ba ka tare tɔntɛ la Israeldoma. 25Te Na'ayenɛ yele Moses yeti, 26Tɔgɛ bo Levi buuri la yeti, Ya han ne to'ohe Israeldoma pia porogerɛ bo'olom la te mam dekɛ bɔ'ɔra te bo dɛna ya sɔ'ɔlom la, ya me ne yehe ho poan pia porogerɛ bo'olom la ya dekɛ bo Na'ayenɛ. 27Ya bo'olom la n wan dɛna ya ki' bo'a bo'olom, la ya tiihe wɔla bo'olom. 28Yan to'ohe bo'olom sebo woo Israeldoma la zen'an la, sɔrɔɔ kona poan te yamam me wan dɔla bɔ'ɔra Na'ayenɛ ya bo'olom. Ya han ne to'ohe pia porogerɛ bo'olom la, ya yehe sɛla n de Na'ayenɛ bonɔ la bo Aron se'em n de malemadaana la. 29Ba han ne tare bo'olom la na, ya ne zen'an n ane soŋa gana zan'an, ge ana fa'a la, la ya dekɛ bilam bo Na'ayenɛ. 30Yele Levi buuri la yeti te ba han ne dekɛ zen'sɛka n ane soŋa la bo Na'ayenɛ bo'olom bomɔ wan dɛna ya ki bɔ'a bo'olom, la ya tiihe dia bo'olom. 31Yamam la ya yiredoma nya ta'an di lɔgɔseto woo n gee la. Yam bote zen'an, se'ere sɔe la to dela yan tone Sogorɛ la poan yɔɔrɛ n bala. 32Ya han ne dekɛ zen'sɛka n ane soŋa la bo Na'ayenɛ, tuure kan dɔla ya, bii la sagom fa'a bo'olom la te Israeldoma la tare na la, te la bahɛ te ya ki.

will be added

X\