Kanlɛ 15

1Te Na'ayenɛ yele Moses yeti, 2Tɔgɛ bo Israeldoma, yele ba yeti, ya han ta kɛn' teŋsɛka te n dekera bɔ'ɔra ya te ka dɛna ya yire wa poan, 3te ya tara ya nii bii ya piihe nyɔn'ɔra te nyuŋo la ana soŋa bɔ'ɔra Na'ayenɛ la han pon dɛna nɔpo'ologɔ bo'olom bii popeelom bo'olom bii de'eŋɔ ŋmarega bo'olom. 4Hom se'emdaana n tare bo'olom la na la sontii ho tara zom somɔ la wola me'en te ba nɔm bɔ la kaam. 5Ya tara daam bo'olom pa'ahɛ la pehego seko te ya tare wa'ana te ko dɛna nyɔ'an bo'olom, bii kaanbegɔ bo'olom la. 6Tare ya ki bo'olom zom la wolehe seyi' ge kae kaam, 7la ya tara daam bo'olom pa'ahɛ la pehego la ya tare wa'ana te la dɛna bo'olom somɔ bɔ'ɔra Na'ayenɛ. 8Ya han ta maahom lɔlega te ya dekɛ ka te ka dɛna nyɔ'an bo'olom, bii kaanbegɔ bo'olom, bii nɔbiŋere bo'olom, bii sunma'ahom bo'olom bɔ'ɔra Na'ayenɛ, 9ya tara ki zom bo'olom wolehe setan', la ya nɔm bo la kaam dekɛ pa'ahɛ lɔlega la la ya tare na. 10Ya tara daam yugela pa'ahɛ te bomɔ me dɛna nyɔ'an bo'olom. Bo'olom bona wan dɛna nyɔ'an bo'olom te ya nyuon te bo tara nyuŋo soŋɔ bɔ'ɔra Na'ayenɛ. 11Lɔlega woo bii peraa woo, pedibiga woo bii botela woo te ya yeti ya tare na bo Na'ayenɛ ne sona te ya maahom wana. 12Dunhe la han pon zo'e la se'em me, ya maahom duŋa woo la ka lɔgɔrɔ wo mam n pa'alɛ ya se'em la. 13Hon se'em woo n de Israeldoma wa han tara ho bo'olom sebo te a bɔta te a nyɔ' te zun'uhe la ana soŋa bo Na'ayenɛ a daana sone te a enŋɛ yelese'a woo te ne yeti ba enŋɛ la. 14Han dɛna tuunhom sebo n boe pooren kena na la, bii saana, bii nɛra woo han kɛn'ɛra la ya, ge tare a bo'olom na te a nyɔ' te zun'uhe tara nyuŋo soŋɔ bo Na'ayenɛ, a me sone te a enŋɛ wo yamam n enŋɛ se'em la. 15Ya buuri la sone te ba tara malema, la saansɛba woo n boe la ya la. Te malema dena wa dela malema se'ere n kan malom tole tuunhom sɛka n kene na la. Yamam la saama la wan zona Na'ayenɛ nɛŋa. 16Pa'alegɔ se'a la nɔze'elego se'a te ya dɔla la, pa'alegɔ aŋa la nɔze'elego aŋa mea te saama la n kɛn'ɛre la ya, me wan dɔla. 17Te Na'ayenɛ yele Moses yeti, 18Tɔgɛ bo Israeldoma wa yele ba te ya han ta kɛn' teŋsɛka te n tara ya yɛ'ɛha wa poan, 19te ya nyɛta ka poan dia dita, ya aan dia la ka sɛka te ka dɛna bo'olom bo ya Daana la. 20Ya han ne pɔhɛ te ya di ya dipaala la, ya ne dekɛ ka aan ka fiin la ya maalɛ man'aherɛ tare na bo ya Daana la, te de dɛna ya dia bo'olom. 21Tuunhom sebo woo n kene na la sone te ya bɔ'ɔra Na'ayenɛ ya dipaala dia la yia. 22Ya han ka ta mina ge ganlom Na'ayenɛ nɔya wa te a dekɛ doohe Moses poan bo ya, 23Na'ayenɛ nɔya woo te Moses bo ya la pɔhera daanse'ere daarɛ te a bo dɛ la, tara bala la zina, ge wan kelom tara a bala ta paɛ tuunhom sebo woo n kene na la, 24ge Israeldoma wa han ka mina ge ganlom, Israeldoma la zan'an nyɔkɛ lɔle ko' te ka dɛna nyɔ'an bo'olom, nyuŋo soŋɔ bɔ'ɔra Na'ayenɛ, ge tara boom bo'olom la daam bo'olom la botela te kaŋa dɛna be'em bo'olom. 25Malemadaana n wan maalɛ be'em duuhego bo Israeldoma zan'an ge Na'ayenɛ wan bahɛ ba be'em bo ba. Se'ere n sɔe ba ka mina ge galom ge ba tare bo'olom te ba nyɔ' la be'em bo'olom bo Na'ayenɛ ba be'em la zuo. 26Na'ayenɛ me seren wan bahɛ ba be'em bo ba la saansɛba woo n boe la ba la. Se'ere n sɔe la, nɛreba la zan'an ka mi' ge ganlom. 27Ge la han dɛ'a la nɛra ayema ma'an n ka mi' ge ganlom a daana tara bosa'arɛ n nan de yuunɛ na te ka dɛna be'em bo'olom. 28Malemadaana la n wan ze'ele Na'ayenɛ nɛŋa duuhe be'em bo se'em n bɔregɛ doohe la en ka mi' ge ganlom la. Ge a han deŋɛ duuhe be'em la bo en, Na'ayenɛ wan bahɛ a be'em bo en. 29Pa'alegɔ deyena mea n boe bo hon se'em woo n ka mi' ge tom be'em, a han dɛna Israeldoma la poan bii a dela saana. 30Ge hon se'em n kɔ'ɔn mina ge ganlom ge dɛna la saana, bii ho han pon dɛna la Israeldoma la poan, ho to' la Na'ayenɛ, ya ŋmaɛ enŋa daana ya poan bahɛ. 31Se'ere n sɔe la, a zagahɛ la Na'ayenɛ yelehom, ge ganlom a nɔya la, ŋmaɛ ya nɛre'ena daana ya poan bahɛ, te a tuure la dɛna a ma'an tuure. 32Se'em ma'an te Israeldoma la yuun bɔna pɔgɔtia la poan la, ba yuun nyɛ la boraa kayema te ka vaara dɔɔrɔ Vo'ohogo Daarɛ la poan. 33Te nɛresɛba n nyɛ ka te ka vaara dɔɔrɔ la tare ka wa'an Moses, la Aron, la Israeldoma la zan'an zen'an na, 34te ba loe nɛreba te ba gura en. Se'ere n sɔe la, ba nan ka mi' ban wan enŋɛ ka se'em. 35Te Na'ayenɛ yele Moses yeti, Tare ya boraa la ya yehe kenkɛleŋa ha, la ya lobe en la kuga ko'. 36Bala te Israeldoma la zan'an tare en yehe yeŋa ha ta lobe en ko wo Na'ayenɛ n bo Moses a nɔɔrɛ la se'em la. 37Te Na'ayenɛ yele Moses, 38Tɔgɛ bo Israeldoma wa, yele ba to ba tuunhom bona wa tara ta paɛ tuunhom sebo woo n kene na la, nɛra woo dekɛ tan sabelɛ, la a pɛ' sanbere labenɛ a fuo kenkɛleŋa. 39Ya wan tara sanba wa behera te bala wan bahɛ te ya tɛnra ya Na'ayenɛ nɔya la, bala wan bahɛ te ya nan a ge te ya kan dɔla ya suunre n bote yelese'a la. 40Bala te ya wan nan mam nɔya la zan'an ge ya wan de toolom bo ya Yenɛ la. 41Mam de Na'ayenɛ ya Yenɛ se'ere n tare ya ze'ele Mizraim teŋa poan yehe na te n dɛna ya Yenɛ la. Mam de Na'ayenɛ ya Yenɛ.

will be added

X\