Kanlɛ 14

1Yu'uŋɔ koŋɔ poan la, la nɛreba zan'an kaaha mɛ bahera ha. 2Israeldoma la zan'an daa gɔngene mɛ la Moses la Aron, la nɛreba la zan'an n boe tiiheŋɔ la poan la yele ba yeti, Te han pon ki ne Mizraim teŋa poan ha, la an ne soŋa sona teŋpɔgɔtia sɛka zuo te to zɛ'a wa poan. 3Bene n sɔe te Na'ayenɛ tara to yɛ'a teŋkana wa poan na te ba kɔrom tɔ la so'ahe? Te pɔgɔba, la te kɔma wa dela ba faan lɔgɔrɔ n bala. Te han pon lebe ne Mizraim teŋai la ka an ne soŋa? 4Ge ba yele taaba yeti, Bahɛ ya te to loe nɛŋadaana, te to lebe Mizraim teŋa poan. 5Te Moses la Aron lu aliko nɛreba la zan'an n lagahɛ zen'an la nɛŋan. 6Nun dayɔa Yosua la Yepune dayɔa Kaleb la sɛba n keŋɛ ta kae teŋa la behɛ la me maahom ba mɛhe futo, 7ge yele Israeldoma tiiheŋɔ la zan'an yeti, Teŋa la te tomam doohe ka poan kae behɛ la, ka ba' dɛna la teŋsoŋa. 8Na'ayenɛ poorɛ han pee la tɔ, a wan bɔna to nɛŋa te to keŋɛ teŋa la poan, teŋsɛka poan te iilom la seerom zɔta wo ko'om la, la a ta dekɛ ka bo to. 9To da zagahɛ ya Na'ayenɛ. Ge la ya da zɔta ya teŋa la nɛreba la. Se'ere n sɔe la, te wan vole ba. Sɛla ka boe gu'ura ba, ge Na'ayenɛ boe mɛ la tomam. Da zɔta ya dabeem la ba. 10Ge nɛreba la zan'an yeti, lobe ba la kuga. Bilam te Na'ayenɛ som nɛɛ Sogorɛ la poan bo Israeldoma la zan'an. 11Te Na'ayenɛ yele Moses yeti, Yuuma alɛ te nɛreba wa yeti ba tara sunsunya kɛn'ɛha mam? Yuuma alɛ te ba wan zagaha kan nana mam, la mam pon tom toonkanra se'a, la yele kiri'ihe se'a te mam enŋɛ ba teŋasoka wa? 12N wan kɛn'ɛhɛ ba zan'an la too, la n sagom ba zan'an, ge n wan lebehe enŋɛ te ho dɛna teŋkantɛ ge kpe'em gana bana wa. 13Te Moses yele Na'ayenɛ yeti, Mizraimdoma la wan wom dɛ! Hom paŋa poan te hom yehe nɛreba wa ba poan na. 14Ba me wan yele teŋkana wa poan nɛreba de yele. Ba pon deŋɛ wom te hom Na'ayenɛ bo mɛ la nɛreba wa, la ba ninin te ba nyɛ te ba nyɛ te hon daana Na'ayenɛ dekɛ ho saŋgbanɛ pin wontɛɛŋa, ge ne lebege bugum doore yu'uŋɔ bɔna ba nɛŋan. 15Ho han ko' nɛreba wa zan'an boyena teŋse'ehe woo n wom ho yele la wan yeti, 16Na'ayenɛ la ka nyaŋɛ tare nɛreba wa kɛn' teŋsɛka te a pon deŋɛ yele la nɔpɔtɛ te a wan dekɛ bo ba la, bala te a kɔrom ba la so'a pɔgɔtia la poan. 17Nananawa Na'ayenɛ, bahɛ te ho paŋa pa'alɛ wo hom yele se'em la, 18Na'ayenɛ suunre ka nyiire tɔtɔ, ge a tare la zo'ohogɔ, ge dita sugure bɔ'ɔra sɛba n zagahere en. Ge la bala me, a ka bahere sɛba a tue en la naana. A ne namehɛ la kɔma, ba sɔdoma yelebe'ero zuo, ta paɛ yaahe botan' la bonaahe poan ha. 19Doohe la ho nɔŋerɛ la n ka tare ba'ahegɔ la zuo, di nɛreba wa yelebe'ero sugure bo ba, wo hom n zɔ ba ninbɔn'ɔn se'em ma'an te ba ze'ele Mizraim teŋa poan yehe na la tara tara la zina wa. 20Te Na'ayenɛ lebehe yele en yeti, N di sugure bo ba, wo hom n sohɛ se'em la. 21Ge la de sera te mam boe wa, la teŋa wa zan'an wan perɛ la Na'ayenɛ na'ahegɔ. 22Nɛrebana wa, sɛba n nyɛ mam na'ahegɔ wa la yelekerehe te mam tom Mizraim teŋa poan la pɔgɔtia la poan, ge te ba ka nam mam, la makɛ mam behɛ sugumnɔɔren pia wa, 23ba ayena me kan nyɛ teŋsɛka te mam pon deŋɛ yele la nɔpɔtɛ te n wan dekɛ bo ba sɔyaabdoma la. Nɛra la ayena me ka boe enŋɛ mam te mam sunsunyiim ge wan nyɛ teŋa la. 24La de mam tontona Kaleb ma'an te n wan tare en na kɛn'ɛhɛ teŋsɛka poan te a keŋɛ kae la, te enŋa la a yaahe wan sɔe ka sɔ'na. Se'ere n sɔe n tare sea sɛka n boe kayema la zuo, ge doohe mam la suunre zan'an la zuo. 25Ya beere ŋmɛregɛ lebe na, la ya yehe tɔ pɔgɔtia la, sose'ere n dole sigera Mɔgɔ Mɔlega la poan la. Ge te Amalekdoma la Kanaandoma la bɔna la bɔn'ɔrɔ la poan. 26Te Na'ayenɛ yele Moses la Aron yeti, 27Yuuma alɛ te toonfɛn'ɛhadoma wa wan gɔngena la mam? N wom sɛla wo te ba yeti, te nananawa 28ho yele te mam Na'ayenɛ yeti, wo mam n seren boe se'em la, n wan enŋɛ ya wo ya mɛhe n yeti se'em te n wom la. 29Pɔgɔtia wa poan te ya wan ki, yamam sɛba doma woo n paɛ yuum pihiyi', se'em woo te ba yuum lagom kaanlɛ hɔ nɛre kanlɛ la poan, ge te ho lagom gɔngelom la mam ho wan yee pɔgɔtia wa poan. 30Ya ayena me kan kɛn' teŋsɛka te mam pɔ' te n wan zɛnkɛ n nu'o paŋa la n maalɛ ya yiya bini la poan, han dagana Yepune dayɔa Kaleb, la Nun dayɔa Yosua. 31Ge han dɛna ya kɔmsɛba te ya yeti ba yeti ba dɛna la ya diŋdoma faan bonɔ la, n wan tare ba zan'an kɛn'na te ba di teŋsɛka te ya zagahɛ la nyɛlom. 32Ge yamam wa, ya wan ki pɔgɔtia wa poan. 33Ya kɔma wan yee kalam dɛna duŋkeema yuuma pihinaahe, ba wan namehɛ doohe la yamam n ka tare sake sera la zuo, gura te ya zan'an ta ba'ahɛ pɔgɔtia wa poan. 34Yuum pihinaahe la dela dabeha pihinaahe la te ya dekɛ kae teŋa la behe la, yuune dela dabaherɛ deyena, ya wan namehɛ ya yelebe'ero la zuo, la ya nyɛ lan tɔe se'em te ya zabɛ la mam. 35Mam, Na'ayenɛ n tɔgɛ, n me wan seren enŋɛ toonfɛn'ɛhadoma wa n naɛ taaba zagahɛ mam wa, yele ana wa zan'an. Ba wan nyɛ ba ba'ahegɔ la pɔgɔtia la poan ha; bilam te ba wan ta ki. 36Bala, boraa se'ehe te Moses da tom te ba lagom doohe ta kae zen'an ge lebena tɔgɛ yeleyooro bo nɛreba la te ba gɔngelena la Moses la, 37boraa sena wa n lebena tɔgɛ yeleyooro doohe la teŋa la kaarɛ poan la, daa lu la Na'ayenɛ nɛŋan bilam ki, doohe la too seko te Na'ayenɛ dekɛ kɛn'ɛhɛ ba la. 38Boraa se'ehe woo n keŋɛ ta kae teŋa la behɛ la, Nun dayɔa Yosua, la Yepune dayɔa Kaleb ma'an n ge ka ki. 39Moses n ta yele Israeldoma la yele ana wa zan'an la, ba zan'an kele mɛ la ninmɔ'ɔrɛ. 40Yiimbeere bolika te ba kena zɔna tɔɔra teŋsɛka n yage zoore zuo la ge yɛta te, To tue ya to tue ya. To wan zom zen'an te to Daana la yele to te to zom la. 41Te Moses soke ba yeti, Bene te ya ka nana Na'ayenɛ n bo ya nɔse'ere la? Yan yeti ya enŋɛ se'em wa ka ze'ele. 42Da zom ya teŋa la poan se'ere zuo, Na'ayenɛ ka boe la ya. Ya diŋdoma la wan nyaŋɛ ya. 43Se'ere zuo Amalekdoma la Kanaandoma la wan to'ohɛ ya bilam na. Se'ere n sɔe la yan ŋmɛrege ya poore bahɛ Na'ayenɛ la, a kan bɔna la ya, ba wan kɔrom ya la so'ahe. 44Sɛla te ba kan kelehe n bala, ge keŋɛ zom teŋsɛka n yage zoore zuo la poan, Moses bii Na'ayenɛ nɔbiŋere daka la ka vuruge tiiheŋɔ zen'an la poan. 45Te Amalekdoma la Kanaandoma la n kɛn'ɛre teŋsɛka n yage zoore zuo la poan la yehe sige na to'ohɛ ba bilam daa tɛn ba bala doohe sore la bala tara tara la Horma teŋa na.

will be added

X\