Kanlɛ 13

1Te Na'ayenɛ yele Moses yeti, 2Tom borase'ehe te ba keŋɛ ta kae Kanaan teŋa wa, teŋsɛka te n dekera bɔ'ɔra Israeldoma wa. Loe ba buuri woo poan, nɛŋadaana ayena ayena. 3Te Moses doohe Na'ayenɛ n bo en a nɔɔrɛ la se'em la, ze'ele Paran Pɔgɔtia la poan tom ba. Ba zan'an dela Israel buuri la woo nɛŋadoma. 4Ba yu'ura n wana: Areuben buuri la daa loe la Zakur dayɔa Samua, 5Simeon buuri la loe la Hori dayɔa Sapat, 6Yuda buuri la loe la Yepune dayɔa Kaleb, 7Isakar buuri la loe la Yosef dayɔa Igal, 8Epraim buuri la loe la Nun dayɔa Hoshea, 9Benyamin buuri la loe la Arapu dayɔa Palti, 10Zebulun buuri la loe la Sodi dayɔa Gadiel, 11Manase buuri se'ere n de Yosef buuri la loe la Susi dayɔa Gaddi, 12Dan buuri la loe la Gemali dayɔa Amiel, 13Aser buuri la loe la Mikael dayɔa Setur, 14Naptali buuri la loe la Vopsi dayɔa Nabi, 15Gad buuri la loe la Makir dayɔa Geuel, 16Boraa se'ehe te Moses tom ba te ba keŋɛ ta kae teŋa la yu'ura n bala. Moses malom segɛ Nun dayɔa Hoshea yu'urɛ la Yosua. 17Moses n ta tona boraahe wa te ba keŋɛ ta kae Kanaan teŋa la behɛ la, a yele ba yeti, Keŋɛ ya zom, la ya doohe Negev la poan, la ya zom ta paɛ zoore zuo teŋa poan. 18Behɛ teŋa la n ane se'em, ge la ya behɛ nɛresɛba n boe bini la nɛresɛba n tare paŋa bii ba dela taromdoma, ba zo'e mɛ bii ba pɔ'ɛ mɛ. 19Teŋa la te ba bɔna ka poan la ane la wane? Ka dela teŋsoŋa bii teŋbe'ero? Ba teŋkanra la te ba kɛn'ɛra se poan la me ane la wane? Se dela teŋse'ehe te ba mɛ dangɔɔma kae se bii ba kɔ'ɔn mɛ la yiya kɛn'ɛhɛ kɛn'ɛhɛ? 20Ka tentɔnɔ ane la wane? Ka dela bugulugo zen'an bii bugulugo ka boe ka zuo? Tiihe boe ka zuo bii tiihe ka boe bini? Kpeŋe ya mɛŋa la ya tare teŋa la zuo tiihe dia lebe na. Bala ma'an la yuun dela tideena dia bi'ire saŋa. 21Te ba yehe keŋɛ ta kae teŋa la pɔhɛ Zin Pɔgɔtia la beene tara tara ta paɛ Arehob, nya to'oha Lebo Hamat 22Ba doohe la Negev la poan zom na paɛ Hebron, zen'an te Ahiman, la Sesai, la Talmai, sɛba n de Anakdoma yaahe la yuun bɔna bini. Ba yuun mɛ Hebron teŋa mɛ te la kaanlɛ yuuma ayopɔe ge te ba mɛ Zoan teŋa la n boe Mizraim teŋa poan la. 23Ban ta paɛ Eskol Bɔn'ɔn la poan la, ba nyɛ' la tiihe wɔla la *pomegranate la mu'uro te ka ze' bini wom gbase, te ba ŋmaɛ tia yile dekɛ pagelɛ dɔɔ zuo buke. 24Ba daa yi'ire zen'en la yu'urɛ la Eskol Bɔn'ɔn. Se'ere n sɔe la, bilam te Israeldoma la yuun nyɛ' tia dia la ŋmaɛ. 25Dabeha pihinaahe n ta ba'ahɛ la, te ba me kae teŋa la ba'ahɛ ge lebena. 26Ba lebena paɛ Moses, la Aron la Israeldoma la zan'an n boe Kades teŋa Paran Pɔgɔtia la poan. Bilam te ba yele Israel nɛreba zan'an ban nyɛ' sɛla ge me dekɛ teŋa la poan tiihe zuo dia la pa'alɛ ba. 27Ge ba yele Moses, Te keŋɛ kɛn' teŋsɛka poan te ho tom to la te ka seren kɔ'ɔn zɔta mɛ la iilom, la seerom wo ko'om la! Teŋa la poan tiihe n wone di sɛka n wana. 28Nɛresɛba n kɛn'ɛre ka poan la kpe'em mɛ, te ka teŋkanra la me kɔ'ɔn mɛ kɛn'ɛhɛ mɛ ge kanregɛ. To nyɛ' Anakdoma la bini mɛ. 29Amalekdoma la me kɛn'ɛre la teŋa la Negev bɔba la, ge te Hitidoma la, la Yebusdoma la, Amoridoma la me bɔna teŋse'ehe n boe ka zɔya zuo la, ge te Kanaandoma la me bɔna ko'om la nɔɔrɛn, la Yordan Kolaa la nɔgbɛma. 30Te Kaleb ze'ele Moses nɛŋa bahɛ te nɛreba la go'e ge te a yele ba yeti, To zom ya ta sɔe teŋa la sɔna. Se'ere n sɔe la, to wan ta'an enŋɛ bala. 31Ge nɛresɛba n doohe en zom teŋa la poan la yeti, Te kan ta'an zabɛ la nɛreba la, ba kpe'em gaŋɛ to mɛ, 32ge doohe Israeldoma la poan yele ba bama n kae teŋa la te la kpe'em se'em. Ba yele ba yeti, Teŋsɛka te to keŋɛ ta kae wa obere la nɛresɛba n boe ka poan la. Nɛresɛba woo te tomam nyɛ' la kɔ'ɔn dɛna la nɛre dareba zaŋa. 33Tomam nyɛ Anakdoma la yehe la Nepildoma la bini mɛ. Tomam mɛŋa nini poan, tomam an ne me wo sonwa'ara la, te mi te ban nyɛ' ne to la, te an ne me wo sonwa'ara la ba nɛŋan.

will be added

X\