Kanlɛ 12

1Miriam la Aron pɔhe mɛ zɛrɛgera Moses la n di Kus pɔka la zuo. 2Ba yeti, Na'ayenɛ dole Moses ma'an poan tɔgɔra? A ka dole tomam me poan tɔgɔra me la? Te Na'ayenɛ daa wom wa'ana. 3Moses wa dela boraa sɛka n sigehe a mɛŋa teŋa gana nɛra se'em woo n boe teŋa wa zuo. 4Bilam bilam te Na'ayenɛ yele Moses la Aron la Miriam yeti, Yehe ya wa'an sogorɛ la poan na, yamam ya batan' la. Te ba batan' la yehe wa'ana. 5Te saŋgbanɛ sige na yula sogorɛ nɔɔrɛn te Na'ayenɛ konkore ze'ele bini na, yi Aron la Miriam, ge ba yehe ze'ele. 6Na'ayenɛ yele ba yeti, Kelehe ya n tɔgom wa. Na'ayenɛ nɔtɔgɔha han ne bɔna ya poan, mam ne dɔla liligere poan tara n mɛŋa pa'ala en, mam ne dɔla la a zaanheŋɔ poan tɔgɔra bɔ'ɔra en. 7Ge mam ka ete n tontona Moses wa bala. A dela birikina mɛ tona mam yire zan'an. 8Mam ne kɔ'ɔn zen'an me la n tɔgɔra bɔ'ɔra en, dege te n dole la magaha poan tɔgɔra bɔ'ɔra en. A nyɛte mam naanɛ n ane se'em. Bene te yamam ka zɔta te ya tɔgɛ sɛla n ka ane soŋa bo mam tontona Moses wa? 9Te Na'ayenɛ suunre nyie la ba, te a bahɛ ba. 10Saŋgbanɛ la n zɛnkɛ de mɛŋa zom saazuo ge bahɛ Sogorɛ la, ba behɛ te Miriam n bala ŋma konkom, kɔ'ɔn pelege a zan'an wo yaarom la. Te Aron ŋmɛregɛ te a behɛ en, a ŋmɛregɛ te a ŋma la konkom. 11Te Aron yele Moses yeti, Soso n daana, da tara yelebe'ero seko te to koŋɛ yam ge enŋɛ wa, be'em la tɔ. 12Enŋɛ en te a lebehe ana wo bilɛa te ba nan dɔgɛ en a ma' pooren bahɛ na te a iŋa la ne dekɛ se'em fa'a la. 13Bala te Moses kaahɛ bo Na'ayenɛ yeti, Na'ayenɛ, tebɛ en. 14Te Na'ayenɛ lebehe Moses yeti, A sɔ n han tobehɛ ne nɔtɔɔnrom ma' a nɛŋa, la kan dene nyanɛ ta paɛ dabeha ayopɔe? Bala bahɛ en te a bɔna tiiheŋɔ la yeŋa te la paɛ dabeha ayopɔe, dabeha ayopɔe la han tole, ya ta'an bahɛ te a lebena. 15Bala te ba bahɛ te Miriam bɔna tiiheŋɔ la yeŋa tara tara la dabeha ayopɔe, nɛreba la keŋɛ ge gura me la daanse'ere daarɛ te ba tare en lebe na la. 16Bilam n tole la, nɛreba la bahɛ Hazerot teŋa mɛ ge keŋɛ ta tiihom Paran Pɔgɔtia teŋa poan.

will be added

X\