Kanlɛ 11

1Nɛreba la daa nyɔnɛ mɛ la bama n ne wom Na'ayenɛ konkore te la tara ba dabeem se'em, Na'ayenɛ n yuun wom ba nyoŋa la, a suunre nyie mɛ la ba. Te bugum yuun ze'ele Na'ayenɛ zen'an na lu ba teŋasoka, di sagom ba sɛba n tiihom bɔna kenkɛleŋa la. 2Nɛreba wa n daa wa'ana kaahɛ bo Moses la, enŋa sohɛ Na'ayenɛ, te bugum la keŋɛ. 3Bala te ba daa yi'ira zen'kaŋa te Tabera. Se'ere n sɔe la bugum n ze'ele Na'ayenɛ zen'an lu nɛreba la teŋasoka na di ba. 4Te nɛreyooro la n dole Israeldoma daa pɔhɛ maala dia kayema, te bilam me te Israeldoma le pɔhɛ kɛlega yɛta ti, Te han pon nyɛte ne la nɛnɔ ɔbera! 5Te tɛnre te yuun boe Mizraim teŋa ɔbera zim se'e zaŋa ge ka yɔɔra la. La sonsɔnbera, la kenkpagara, la sama, la nyubento, la alabaha se'a woo te to yuun ɔbera la. 6Nananawa te ka le nyɛta sɛsɛla pa'ahɛ *manna dia wa poan! 7Ge *manna la yuun ane la lama lama wo kenkpagara biile la. 8Te nɛreba la ne daa ɛ vaɛ ba na nɛɛm ba nɛrɛ zuo, bii ba tɔ ba dekɛ ba maalɛ man'aha. Ge ba zan'anhom la ana wo kaam te ba dekɛ kiim ba la. 9Mɛgelom han ne daa luta ban tiihom zen'an la yu'uŋɔ saŋa la, bala ma'an me te *manna dia wa me daa ne lagom luta na. 10Te Moses daa wom te yire woo nɛreba ze ba sogorɛ nɔɔrɛn kaaha. Te Na'ayenɛ suunre me daa kɔ'ɔn kelom nyiira, te la daam Moses. 11Te a daa soke Na'ayenɛ yeti, Wane te ho tare daaŋkona na bo ho tontona wa? Mam enŋɛ la bem te la daam hɔ te ho dekɛ nɛreba wa zan'an ziinla mam? 12Mam n nyɔkɛ nɛrebana wa zan'an poya? Mam n dɔgɛ nɛrebana wa zan'an? Bene zuo te ho yele mam te n zanla nɛrebana wa n nu'uhen wo pɔsɔɔ n zanle bilɛa se'em la ta kɛn' teŋsɛka te hom pon deŋɛ yele la nɔpɔtɛ te ho wan dekɛ ka bo ba sɔyaabdoma wa poan? 13Mam yeti n nyɛ nɛnɔ la bɛ bo nɛrebana wa zan'an? Ba kaahere bɔ'ɔra la mam te, Bo to nɛnɔ na te to obe. 14Mam kan ta'an ziira nɛrebana wa n mɛŋa, zeero la ba' tenbegɛ gaŋɛ ma mɛ. 15Han dɛna te hon yeti ho enŋɛ ma se'em n wa'ana, kɔ'ɔn ko ma nananawa, ho han seren zɔta la mam ninbɔn'ɔn, ge da bahɛ te n nyɛ n mɛŋa sagom. 16Te Na'ayenɛ daa yele Moses yeti, Tare Israeldoma pihiyopɔe na, sɛba te ho mina ba te ba dela nɛŋadoma, bii kpɛ'ɛndoma bɔna nɛreba la poan la. Tare ba wa'an Sogorɛ la poan na, te ba naɛ la hɔ zɛ'a. 17N wan sige na tɔgɛ la bilam, ge dekɛ sɛ sɛka n boe ho poan la, n dekɛ sɛ kaŋa enŋɛ ba poan. Ba wan soŋɛ hɔ te ya lagom zi nɛreba la zeero la, bala, la kan dɛna hom ma'an ziira. 18Yele nɛreba la yeti, duuhe ya ya mɛhe la ya maahom gura, ge beere te ya wan obe nɛnɔ. Na'ayenɛ wom yan kaahere yɛta te, te han pon nyɛte ne la nɛnɔ obere ne la, la ane to som, to daa boe Mizraim teŋa poan la. Nananawa, Na'ayenɛ wan bo ya nɛnɔ te ya obe. 19Ya kan obe to daanyenɛ ma'an, bii dabeha ayi' bii anuu, bii da pia, bii dapihiyi' ma'an, 20ge ya ne wan obe to tara tara la ŋmaremune, te to ŋmɛ ya. Se'ere n sɔe la yan zagahɛ Na'ayenɛ se'ere n boe la ya ge kaahera te bene zuo te to nɔɔn bahera Mizraim teŋa wa la? 21Ge Moses lebehe yeti, Mam n tare nɛresɛba la, ba boraa se'ehe n kenɛ teŋa ma'an dela boraahe tuha kɔbehe seyoobe (600,000), te hom yeti hon wan bo ba nɛnɔ te ba obe ŋmaremune! 22Ba han pon ko ne nii la piihe biŋe ba, ba wan obene tegɛ? Ba han pon nyoge ne la zim se'e woo n boe ko'om poan na bo ba, ba wan obene tegɛ? 23Te Na'ayenɛ lebehe yele Moses yeti, Ho tɛn'ɛhe yeti Na'ayenɛ nu'o pɔnhege mɛ? Ho wan seren nyɛ nananawa mam n yeti se'em wa wan wa'an yelemɛŋɛrɛ na bo ho. 24Bala te Moses daa yehe ta yele nɛreba la Na'ayenɛ n yele se'em. A tare ba keendoma pihiyopɔe la, lagom taaba wa'ana bahɛ ba te ba ze'ele kae Sogorɛ la. 25Te Na'ayenɛ bo la saŋgbanɛ la poan tɔgɔra bɔ'ɔra Moses. Na'ayenɛ dekɛ Sea la n ta zin'ire Moses poan bo keendoma pihiyopɔe la poan. Bama n tare la Sea te ba pota. Ge ba ka le pota. 26Ge boraahe seyi' sɛba te ba yu'ura dɛna Eldad la Medad daa yee la tiiheŋɔ zen'an la ha. Ba yu'ura lagom pa'ahɛ keendoma la poan, ge te ba ka doohe keŋɛ Sogorɛ la poan. Ge te Sea la ta zin'ire ba poan, te ba pota tiiheŋɔ la zen'an. 27Te bodibila daa zɔ ta yele Moses yeti, Eldad la Medad n boe tiiheŋɔ la zen'an ha pota. 28Nun dayɔa Yosua se'em n de Moses soŋora a bonbilome ha la, daa nyabegɛ yeti, N daana Moses, go'e ba! 29Ge Moses daa lebehe en yeti, Ho nyuune la mam zuo? Mam bote ne te Na'ayenɛ nɛreba la zan'an de ne nɔtɔgɔheba, ge te Na'ayenɛ dekɛ a sea la kɛn'ɛhe ba. 30Te Moses la Israeldoma keendoma la daa lebe tiiheŋɔ la poan. 31Te sabeeo daa ze'ele Na'ayenɛ zen'an na lobe zan'ɔ dayempeleno ze'ele mɔgɔkantɛ la nɔɔrɛn na. Ko daa tare ba wa'ana bahɛ la tiiheŋɔ zen'an la kae mum, te ba guge taaba zuo gan'an paɛ wo sea beene, ge ho han dekɛ ho nɛŋa tɔgelɛ zen'an woo te ho keŋɛ ta baŋɛ ba tɛka beene, ho wan keŋɛ wo dabaherɛ mune. 32De daarɛ bolika tara tara la yu'uŋɔ, tare ta ta' yiimbeere, nɛreba la daa yehe mɛ vaara dayempeleno la. Nɛra woo ka koŋe pitɔ pia. Te ba daa tare ba na deele tiiheŋɔ zen'an la kae. 33Ge nɛnɔ la n ta bɔna nyɛna poan te ba wan obe la, Na'ayenɛ suunre n daa ihege la nɛreba la, te a dekɛ teem kɛ'ɛhe ba. 34Bala zuo te ba daa yi zen'an la yu'urɛ te Kibrot Hataava. Se'ere n sɔe la bilam te ba daa pin' nɛresɛba n ganhere dia la. 35Ban ze'ele Kibrot Hataava poan la, ba daa keŋɛ ta paɛ la Hazerot, bɔna bilam.

will be added

X\