Nehemia 8

1Yerusalem nɛreba zan'an lagahɛ Ko'om Nayaŋa la nɛŋa na. Ba yele gɔŋɔ goleha Ezra te a dekɛ Moses pa'alegɔ la te Na'ayenɛ bo Israeldoma la gɔŋɔ la yehe na. 2Ŋmarehe seyoobe pɔhega daarɛ, te Ezra n de malemadaana la tare pa'alegɔ la yehe lagaŋɔ la n de boraahe la pɔgɔhe la se'em woo n wan ta'an bɔkɛ yele nɛŋan na. 3Te a zɛ'a Ko'om Nayaŋa kaanla kɔ vɔɔla, pɔhɛ bolika tara tara la wontɛɛŋa la peelom la, boraahe la pɔgɔhe la sɛba n wan ta'an bɔkɛ yele nɛŋan. Te nɛreba la zan'an ana kɛle kɛleha pa'alegɔ gɔŋɔ la. 4Gɔŋɔ goleha Ezra yage la dɔgbile te ba maalɛ kɔ bo toon aŋa zuo. Te Matitia la Sema la Anaiah la Uria la Hilkia la Maaseiah zɛ'a a zuɔ nu'o, te Pedaiah la Misael la Malkiya la Hasum la Hasbadana la Zekaria la Mesulam zɛ'a a gɔbega nu'o. 5Ezra yu'ɛ gɔŋɔ la te nɛra woo nyɛta en, a yage la zen'an n zom la zuo. Te n yu'ɛ gɔŋɔ la, te nɛreba la zan'an ihege ze'ele. 6Ezra pɛngɛ Na'ayenɛ n de Yenɛ kantɛ la, te nɛreba la zan'an zenga ba nu'uhe ge lebehe yeti, Taarɛ! Taarɛ! Ge ba zin'ire pɔnrɛ na'ma na'ahɛ Na'ayenɛ. 7Yesua la Bane la Serebia la Yamin la Akub la Sabetai la Hodia la Maaseiah la Kelita la Azaria la Yozabad la Hanan la Pelaiah, zan'an n de Levidoma, pa'alɛ nɛreba la pa'alegɔ la ge te nɛreba la ze'ele. 8Ba kaanle la Yenɛ pa'alegɔ gɔŋɔ la poan te la nɛɛra, te ba pa'ala nɛreba la vɔnrɛ. Bala te nɛreba la ta'an bɔkɛ sɛla te ba kaanlɛ la. 9Nehemia n de teŋbehega la malemadaana Ezra n de gɔŋɔ goleha la Levidoma n pa'ale nɛreba la yele nɛreba la yeti, Zina dela toolom daarɛ bo Na'ayenɛ ya Yenɛ la. Da fabelɛ ya bii ya kɛla. Ba yele bala, nɛreba la woo n wom pa'alegɔ la ba kɛle mɛ la zuo. 10Nehemia yele ba yeti, Keŋɛ ya ta di disoŋa sɛka la daam nyɛlegɔ sebo te ya bɔta, ge eŋɛ bo sɛba n ka tare la. Zina dela toolom daarɛ bo to Na'ayenɛ la. Da bahɛ te ya sunya sagom. Na'ayenɛ popeelom n de to paŋa. 11Levidoma la nya bogolɛ nɛreba la woo sunya yeti, Ane ya baanlam. Se'ere n sɔe la zina dela toolom daarɛ. Da bahɛ te ya sunya sagom. 12Te nɛreba la zan'an yeregɛ keŋɛ te ba di, ge tɔnrɛ dia, ge de'em la popeelom kantɛ. Se'ere n sɔe la, ba nya bɔkɛ yelehom sebo te ba pa'alɛ ba la. 13Dabeha ayi' daarɛ, te yire woo yiredaana la malemadoma la Levidoma la nɛreba zan'an lagahɛ Ezra n de gɔŋɔ goleha la zen'an na te ba wom pa'alegɔ yelehom la. 14Ba nyɛ te ba yuun golehɛ pa'alegɔ la poan te Na'ayenɛ bo Moses nɔɔrɛ te Israel nɛreba la kɛn'ɛra pagahe poan, ŋmarehe senuu de'eŋɔ la poan. 15La me golehɛ te ba mɔɔlɛ yelehom wa yeregɛ bɔ ba teŋhe la Yerusalem poan, yeti, Yehe ya zom zoore zuo teŋhe wa poan ta tare kaam tiihe yila la sesanbehe la karekɔhe yila la tiihe se'ehe woo n tare ma'ahom yila la na tin' pagahe wo lan golehɛ se'em la. 16Te nɛreba la yehe ta tare yila la na tin' pagahe bo ba mɛhe ba gɔhɔrɔ zuo la ba zenzagahe poan la Yenɛ Yire zenzaka la poan la Ko'om Nayaŋa la Epraim Nayaŋa nɛŋai. 17Sɛba woo n lebe na la tin' la pagahe kɛn'ɛra a poan. Pɔhɛ Nun dayɔa Yosua saŋa tare na paɛ de daarɛ la, Israeldoma nan ka tabelɛ de'em de'eŋɔ wa wo ban de'em ko se'em wa. Te ba popeelom gaŋɛ. 18Beere n yelegere woo, pɔhera pɔhega daarɛ la ta paara ba'ahegɔ daarɛ la, Ezra kaanle Yenɛ Pa'alegɔ Gɔŋɔ la la bala. Ba de'em de'eŋɔ la la dabeha ayopɔe. Anii daarɛ la, wo lan de se'em la, te ba nya lagom lagaŋɔ.

will be added

X\