Nehemia 5

1Te nɛreba la basɛba ba pɔgɔba tɔgɔra Yudadoma la basɛba etegɔ yele. 2Basɛba yeti, Tomam la to dayɔɔhe la to pɔyɔɔhe zo'e mɛ, te to han wan vɔna, la dela to tara ki. 3Basɛba me yɛta yeti, Tomam ne behera la to vatɔ, to tiihe dia va'am, la to yiya tooma te to ta nyɛta dia dita kom saŋa wa poan. 4Te basɛba me yeti, Tomam pemehe la ligiri yɔɔra to samana la to tiihe dia va'am koberɛ bɔ'ɔra naba. 5La tomam n pon dɛna iŋganɛ, la ziim yemɔ la to teŋa nɛreba wa, te to dayɔɔhe ana wo ba dayɔɔhe la, ge la bala zan'an, tomam dayɔɔhe la to pɔyɔɔhe dela da'aba bama nu'uhen. To pɔyɔɔhe sese'ehe pon lebege la ba da'aba, ge tomam dela taromdoma doohe la to samana, la to tiihe dia n boe basɛba nu'uhen la zuo. 6Mam wom ba nyɔyɔm la ba daaŋɔ la, mam suunre nyie mɛ. 7Te mam tɛn'ɛhɛ n suunre poan, ge zɛrɛgɛ nɛrezura la kpɛ'ɛndoma la. Mam yele ba yeti, Ya ba' pina la ya mɛŋa teŋa nɛreba. Bala te n daa yi' lagaŋɔ kantɛ te n mɔ'ɛ nini la ba. 8N nya yele ba yeti, To daa nyaŋɛ da' to Yudoma sɔɔnrɔ wa te ba koohe ba bo sɛba n dagɛ Yudoma wa zen'an lebena. Ge yamam wan sakɛ koohe ya sɔɔnrɔ wa, te ba koohe ba bo tomam? Te ba yee suram ka tare se'ere n wan yele. 9Te mam yele pa'ahɛ yeti, Yamam n ete sɛla wa dagɛ ma'an! La dagɛ la ya kena to Yenɛ wa zɔɔlom poan te to diŋdoma wa da nyɛ vole daam tɔ? 10Mam la n sɔɔnrɔ wa la nɛresɛba woo n boe la mam la n tare ki pɛmɛha nɛreba wa. Bahɛ ya te to bahɛ piŋa! 11Nananawa, dekɛ ya ba samana la ba tiihe wɔla vatɔ la ba kaam tiihe la ba yiya. La yan pim ba se'em la, ya poregɛ ligiri la ki' la daam paalom la tiihe kaam, sugumnɔɔren kɔbega dekɛ boyena lebehe bo ba. 12Ba lebehe yeti, To wan lebehe bo ba, to kan le to'e sɛla ba zen'an, to wan eŋɛ wo hom yele se'em la. Bala te mam lagahɛ malemadoma la, bahɛ te nɛrezura la kpɛ'ɛndoma la pɔ' nɔɔrɛ te ba tom bama n biŋe nɔse'ere la. 13Mam me kpa'ahɛ n fuo nu'uhe bahɛ ge yeti, Yenɛ wan kpa'ahɛ hom se'em woo n ka tom nɔbiŋere wa yire la a sɔ'ɔlom woo poan wana bahɛ. A kpa'ɛ nɛre'ena daana wana bahɛ! Te nɛreba la zan'an yeti, La eŋɛ bala! Ge ba nya pɛngɛ Yenɛ, ge te nɛreba wa tom bama n biŋe ba nɔɔrɛ la se'em la. 14Sɛla n pa'ahɛ dela, pɔhera naba Artasaset na'am gɔŋɔ zuo yuuma pihiyi' beene yɛ'a na la, se'em ma'an te ba loe mam te n dɛna ba teŋbehega Yuda teŋa poan la, ta paɛ a yuuma pihitan' la ayi' poan la, yuuma pia la ayi' n bala. Mam mɛŋa bii mam sɔɔnrɔ la n boe la mam la ka dite disɛka n de teŋbehega la. 15Ge teŋbehegadoma sɛba n wa'an mam yia na la daa dekɛ la zeero n tebegɛ ziile nɛreba la, tɔ'ɔha sanlenpeelega kpila pihinaahe ba zen'an, te dia la daam pa'ahɛ. Te ba kpɛ'ɛndoma la me dekɛ ba mɛhe ziile nɛreba la. Ge Yenɛ zɔɔlom la zuo, mam ka ete wo bama. 16Mam ton dekɛ la n mɛŋa kaanbɛ bo dangoone wa mea tooma wa. Mam nɛreba la zan'an wa'an kalam la tooma wa zuo, tomam ka tare samanɛ se'ere. 17Le yɛ'ɛha, Yudoma la kpɛ'ɛndoma kɔbega la pihinuu n lagom zin'ita mam tebole zuo dita la mam, dekɛ saama n ze'ete teŋse'ehe n kae to bahɛ wa kena to zen'an na la pa'ahɛ. 18Daarɛ woo, lɔlega la piihe sonhe seyoobe la nɔɔhe n ne ko bo mam, te dabeha pia woo poan daam yema yema zo'e zo'e n ne tare na bo mam. Ge la bala zan'an, mam ka eere di sɛka n de teŋbehega la. Se'ere n sɔe la, yele ana kpe'em mɛ bo nɛreba wa te ba eta. 19Mam Yenɛ wa, tɛnra mam saŋa woo, la mam n tom sɛla woo bo nɛreba wa.

will be added

X\