Nehemia 4

1Sanbalat n ta wom te to mɛte dangoone la mɛ la, a suunre nyie mɛ te a pɔhɛ to nɛreba la toa. A kɛhe Yudoma wa mɛ, 2ge ze'ele a taaba la Samaria teŋa pɛɛntɛɛnreba nɛŋan yeti, Yudoma wɔbehe wa ete la bene wa? Ba wan nyaŋɛ malom mɛ ba dangɔɔma wa? Ba wan kaanbera bilam? Ba wan ba'ahɛ de daanyenɛ? Ba wan le nyaŋɛ gurum kuga wa n nyɔ' bɔna sɔgɔrɔ poan la na le eŋɛ sɛla? 3Tobia n de Ammon nɛra nya pa' a poore la yeti, Ba han mɛte sɛla la, peenhɔ han zom de zuo, a wan wɔnregɛ ba kuga dangoone la bahɛ. 4Kelehe to, to Yenɛ wa, ba ka nam tomam! Tuluge ba toorɛ la pagalɛ ba mɛhe zuto! Bahɛ te teŋa zabɛ nyaŋɛ ba te ba lebege ka nyaŋerɛ lɔkɔ te ba fan'! 5Da pin' ba tuure la bii ho saalom ba be'em la ho nɛŋan. Se'ere n sɔe la ba ze'ele la mɛteba la nɛŋan to ba. 6Te tomam n mɛ dangoone la se'em n bala, te de zen'an woo ta zom paɛ dewoko porogerɛ. Se'ere n sɔe la, nɛreba la zan'an tone mɛ la ba suunre zan'an. 7Ge Sanbalat la Tobia la Arabdoma la Ammondoma la Asdod teŋadoma n ta wom te ba malom mɛta Yerusalem teŋa dangɔɔma la, mɛta yɛ'a ba'ahegɔ la, ba suunre nyie mɛ. 8Te ba woo naɛ taaba te ba zabɛ la Yerusalem, la ba gbirige daaŋɔ ka poan. 9Ge tomam sohɛ la to Yenɛ wa, ge ne yehe gura bolika la yu'uŋɔ. 10Yuda teŋadoma ta yɛta yeti, Tontoneba la taregɛ mɛ, te sɔgɔrɔ la me ba' zo'e gaŋɛ. To kan ta'an mɛ dangoone wa. 11Te to diŋdoma la me yeti, Ba ta baŋera la bii nyɛta to la, te to wa'ana ko ba, ge gu' te ba toonɛ wa de tom. 12Te Yudoma sɛba n kɛn'ɛre la to diŋdoma wa la wa'ana yele to gaŋɛ sugumnɔɔren pia te to diŋdoma yeti ba wan zabɛ la to. 13Bala te mam yehe nɛreba ze'ele dangoone la zen'enhe n tare fɔla la, zen'se'ehe n ka lile la. Mam yehe la yire la de nɛreba la ba so'ahe la ba kana la ba tiini. 14Mam nyɛ te dabeem n tare ba la, mam ihege mɛ tɔgɛ bo nɛrezura la kpɛ'ɛndoma la nɛreba la zan'an yeti, Da zote ya dabeem la ba. Tɛnre ya daana la n kanregɛ tara paŋa la, la ya zabɛ bo ya yebehe la ya dayɔɔhe la ya pɔyɔɔhe la ya pɔgɔba la ya yiya. 15To diŋdoma la n ta wom te to mi' bama n maahom se'em la, la Yenɛ sagom bama n tɛn'ɛhe se'em la bahɛ mɛ. Te nɛra woo lebe la a toonɛ a toonɛ, dangoone la mea tooma la poan. 16Yehe daanden daarɛ yɛ'ɛha, mam nɛreba la porogerɛ n ne tona, te porogerɛ maahom zaberɛ, tara kana la tɛ'ɛlehe la tiini la zaberɛ lɔgɔrɔ. Te kpɛ'ɛndoma la yehe ba mɛhe ze'ele kae Yudadoma la 17en mɛte dangoone la. Sɛba n ziire tooma lɔgɔrɔ la, tare la nu'yeŋɔ tona mea tooma la, ge zanla zaberɛ lɔkɔ nu'o koyema la mɛ. 18Mɛteba la me yɛ ba zaberɛ so'ahe ge mɛta. Ge sɛba n peebere tentana la n boe la mam. 19Te mam yele nɛrezura la kpɛ'ɛndoma la nɛreba la zan'an yeti, Tooma la yeregɛ mɛ, to zaan mɛ la taaba kae dangoone la. 20Zen'an bɔba woo te ya ta wom tentanɛ peebego bini, paɛ ya bilam na. To Yenɛ la wan zabɛ bo to! 21Tomam n tone toonɛ la se'em n bala, te nɛreba la porogerɛ zanla kana, bolika yɛ'a yu'uŋɔ. 22Saŋkaŋa mea poan la, mam yele nɛreba la yeti, Nɛra woo bahɛ te a zɔ yee bɔna la en Yerusalem teŋa wa poan, te ba dɛna guruba yu'uŋɔ, ge te to tara ba tona bolika. 23Mam bii n sɔɔnrɔ la bii nɛresɛba n dole mam la bii guruba la ka yɛɛhere to lɔgɔrɔ. Nɛra woo zanle la a zaberɛ lɔkɔ, a han pon yɛ'a ko'om nyua.

will be added

X\