Nehemia 3

1Malema nɛŋadaana Eliasib la a malemadoma taaba keŋɛ ta malom mɛ Piihe Nayaŋa la. Ba yu'ɛ ka, kɛn'ɛhɛ ka kolehe la zan'an n ne bɔna se'em la, mɛ ta paɛ Kɔbega Dewoko la Hananel Dewoko la. 2Yeriko boraahe mɛ sɛla n toŋe la, te Imri dayɔa Zakur me mɛ toŋe ba. 3Hasena dayɔɔhe me malom mɛ Zim Nayaŋa la, biŋe ka ɛnberɛ, kɛn'ɛhɛ kolehe la sanrehe la kuto seto n wan tara yu'ura ka la. 4Hakoz dayɔa Uria me dayɔa Meremot malom maalɛ sɛla n toŋe la, te Zadok dayɔa Baana me maalɛ sɛla n toŋe la. 5Tekoa boraahe me malom maalɛ sɛla n toŋe la, ge ba nɛrezura la ka sakɛ dekɛ toonse'a n boe ba nu'uhen te ba beha la ziile ba mɛhe. 6Pasea dayɔa Yoiada la Besodeiah dayɔa Mesulam n malom maalɛ Nayaŋa Kɛka la. Bama n biŋe ka ɛnberɛ, kɛn'ɛhɛ ka kolehe la sanrehe la kuto seto n tare yu'ura ka la. 7Sɛla n tagalɛ ba maalɛ zen'senhe dela Melatia la Meronot boraa Yadon sɛba kɛn'ɛra Gibeon la Mizpa zen'se'ehe n boe Euprates Yakenɛ teŋbehega nu'uhe. 8Harhaiah dayɔa Uziel n de sanlema kuta la n malom maalɛ sɛla n toŋe ba la. Te Hanania n de sɛba n maale kaam somɔ me malom maalɛ sɛla n toŋe la. Ba malom maalɛ Yerusalem teŋa dangoone paɛ dangoone la zen'an te ba yi'ira Dangoon Yaleŋa la. 9Hur dayɔa Arepaiah n sɔe Yerusalem teŋa la poan bɔbɔrɛ deyema behera la me maalɛ sɛla n toŋe la. 10Sɛla n toŋe en la, Harumap dayɔa Yedaiah me n malom maalɛ a yire dapoore bɔba dangoone la, te Hasabneiah dayɔa Hatus me maalɛ sɛla n toŋe enŋa la. 11Harim dayɔa Malkiya la Pahat Moab dayɔa Hasub me malom maalɛ zen'an kayema la Boroboro Dewoko la. 12Halohes dayɔa Salum n sɔe Yerusalem teŋa la poan bɔbɔrɛ deyema la me maalɛ sɛla n toŋe la te a pɔyɔɔhe soŋɛ en. 13Bɔn'ɔn Nayaŋa la me, Hanun la Zanoa teŋa nɛreba n malom maalɛ bilam. Ba malom mɛ ka, kɛn'ɛhɛ ka koleŋa la ka sanrehe la ka kuto seto n tare yu'ura ka, ge me malom maalɛ dangoone la wo santira tuhure ta paɛ Nagombeto Nayaŋa la ha. 14Nagombeto Nayaŋa dela, Arekab dayɔa Malkiya n sɔe Yerusalem teŋa poan bɔbɔrɛ deyema behera la n malom maalɛ bilam. Enŋa n malom mɛ nayaŋa la, kɛn'ɛhɛ ka kolehe la ka sanrehe la ka kuto seto n tare yu'ura ka. 15Ko'niho Nayaŋa la me dela, Kol Hoze dayɔa Salum n sɔe Mizpa teŋa behera la n malom maalɛ bilam. Enŋa n maalɛ bilam, pile, kɛn'ɛhɛ ka kolehe la sanrehe la kuto seto n tare yu'ura ka. Ge a le malom maalɛ Siloam Kolega bɔba dangoone la n lɛm la naba va'am la, tare ta paɛ David Teŋa kura la. 16Se'em n boe enŋa nɛŋan ha dela, Azbuk dayɔa Nehemia n sɔe Bet Zur teŋa bɔbɔrɛ deyema behera la. Enŋa n malom maalɛ bilam tɔɔra David yɔɔrɔ la, ta paɛ bɔka la, la Kansaŋehe Yire la. 17Zen'an n tagalɛ enŋa la me dela, Levidoma la n boe. Bane dayɔa Arehum nu'uhen la n maalɛ bilam, te Hasabia n sɔe Keila teŋa bɔbɔrɛ deyema behera la me tagalɛ enŋa me maalɛ n behere zen'an la beene. 18Te maalegɔ seko n tagale enŋa la me dɛna Keila teŋa bɔbɔrɛ se'ere nɛreba te Henadad dayɔa Binui sɔna behera la. 19Sɛba n tagalɛ enŋa me dela Yesua dayɔa Ezer n sɔe Mizpa teŋa behera la. Enŋa n maalɛ zen'an n boe pɛɛma biŋere zen'an dangoone la ta paɛ de sɛnka la. 20Se'em n tagalɛ enŋa dela Zabai dayɔa Baruk n malom mɛ dangoone la, ze'ele sɛnka la poan ta paɛ malema nɛŋadaana Eliasib yire nayaŋa nɔɔrɛn la. 21Se'em n tagalɛ dela, Hakoz dayɔa Uria me dayɔa Meremot. Enŋa n malom mɛ dangoone la ze'ele Eliasib yire nayaŋan la ta paɛ a yire la ba'ahegɔ. 22Sɛla n tagalɛ enŋa la me dela malemadoma sɛba n boe bilam bɔba la n malom maalɛ. 23Sɛla n tagale bama la me dela Benyamin la Hasub me n malom maalɛ dangoone la zen'an n lɛm ba yiya la, te Anania dayɔa Maaseiah me dayɔa Azaria me maalɛ dangoone la zen'an n lɛm a yire la. 24Sɛla n tagalɛ enŋa me dela Henadad dayɔa Binui n maalɛ ze'ele Azaria yire la ta paɛ sɛnka la poan, 25te Uzai dayɔa Palal me malom maalɛ la sɛnka la nɛŋan ha, tɔɔra dewoko la n toŋe la naba yire se'ere n boe saazuo la, lɛm la gura la zenzaka la. Sɛla n tagalɛ enŋa me dela Paros dayɔa Pedaiah 26la Yenɛ yire yamehe la n kɛn'ɛre Opel zoore zuo la. Bama me n maalɛ tɔɔra Ko'om Nayaŋa la, lebehe dapɔya bɔba ha la, la dewoko seko n toŋe bilam la. 27Zen'an n tagalɛ la, Tekoa teŋa nɛreba me maalɛ tɔɔra dewoko kantɛ la dangoone n toŋe la ta paɛ Opel dangoone la. 28Yiri Nayaŋa la zuin deto la, malemadaana woo malom maalɛ dangoone la a yire a yire nɛŋan. 29Sɛla n tagalɛ la, Imer dayɔa Zadok me n malom maalɛ dangoone la n boe a yire nɛŋan la. Se'em n tagalɛ dela Sekania dayɔa Semaiah n de Dapɔya Bɔba Nayaŋa gura la, n malom maalɛ sɛla la. 30Se'em n maalɛ tagalɛ enŋa dela, Selemia dayɔa Hanania la Zalap dayɔa Hanun n pa'ahɛ a dayɔɔhe seyoobe la te ba malom maalɛ dangoone la zen'an kayema me. Te Berekia dayɔa Mesulam me malom maalɛ dangoone la n boe a yire dapoore la. 31Se'em n tagalɛ dela Malkiya n de sanlema kuta la me n malom maalɛ dangoone la ta paɛ Yenɛ yire yamehe la koohereba yiya la n tɔ Behega Nayaŋa la, tole ta paa deo seko n boe dangoone la sɛnka poan ha la. 32Sanlema kuta wa la kɔɔhereba wa le malom maalɛ dangoone la deo n yagelɛ ba zuo la Piihe Nayaŋa la teŋasoka.

will be added

X\