Nehemia 2

1Nisan ŋmarega la poan, Naba Artasaset na'am gɔŋɔ zuo yuuma pihiyi' poan, te ba daa tare naba daam na, te mam tare daam la te n ta bo en. Mam nɛŋa ka tabelɛ sagom a nɛŋan bala. 2Naba wa soke mam yeti, Bene te ho nɛŋa sagom bala ge te ho me ka bɛn'ɛnra? Mam mi' te la dagɛ sɛla, ho suunre n yeen sagom. Te dabeem tara mam. 3Mam yele naba wa yeti, Naa, mam nɛŋa wan eŋɛ la wane kan sagom? Mam sɔdoma te ba laɛ ba teŋsɛka poan la lebege la daboo, te bugum di ka nayahe sagom. 4Te naba wa soke mam yeti, Ho bote la bene? Te mam sohɛ saazuo Yenɛ wa, 5ge lerege naba wa yeti, La han wan pee ho suunre, ge te mam ho yameŋa wa me tegɛ la ho nini, tom mam Yuda teŋa la poan, teŋsɛka te ba laɛ mam sɔdoma ka poan la, te n ta malom mɛ ka. 6Te naba wa zin'an, te a pɔga zin'an a logoren, te a yele mam yeti, Ho wan yuue la wane ho kenɛ la poan, ge lebe wane ma'an na? Mam nyɛ te a bɔta a bo mam sore la, te mam pa'alɛ en saŋa. 7Te mam yele naba yeti, Naa, ho suunre han pee la n kenɛ wa, bo mam gɔnɔ te n ta bo Euprates yakenɛ teŋhe wa teŋbehegadoma la te ba bo mam sore te n doohe tole ta paɛ Yuda yɔle yɔle. 8Ge bo mam gɔŋɔ te n ta bo Asap n gure naba mɔen la, te a bo mam dɔɔsonɔ te n ta dekɛ maalɛ teŋa la te n yɛ'a ka poan la nayahe se'ehe n dole kɛn'ɛra Yenɛ yire la poan la, teŋa la dangoone nayahe la, la mam mɛŋa yire. Te naba eŋɛ bala bo mam, doohe la Yenɛ som la n boe mam zuo la. 9Te mam daa keŋɛ Euprates yakenɛ teŋhe wa teŋbehegadoma zen'an, ta dekɛ naba gɔŋɔ wa bo ba. Naba wa me bahɛ te pɛɛntɛɛnreba kpɛ'ɛndoma la ba yiri kekeko n doohe mam. 10Horon nɛra Sanbalat la Ammon teŋa kpɛ'ɛma Tobia n wom wana wa la, la daam ba mɛ la nɛra n wa'ana te a tom som bo Israeldoma la. 11Te mam daa keŋɛ Yerusalem. Mam ta kɛn' dabeha atan' poan, 12n ihege la yu'uŋɔ la nɛreba fiin wa yehe. Ge n ka yele nɛnɛra mam Yenɛ la n dekɛ sɛla eŋɛ n suunre poan te n tom bo Yerusalem teŋa la. Yiri me ka boe bilam pa'ahɛ mam n ban' sebo la poan. 13Yu'uŋɔ, mam doohe la Bɔn'ɔn Nayaŋa la yehe, tɔɔra Bonsɛ'doma Kolega la Nagombeto Nayaŋa la, behera Yerusalem dangɔɔma se'a n wɔnrɛ la nayahe se'ehe te bugum di la. 14Te n ne ŋmɛregɛ tɔɔra Ko'niho Nayaŋa la Naba Bɔka la, ge fole ka boe te mam yeho la wan nyaŋɛ tole. 15Bala yu'uŋɔ te mam doohe bɔn'ɔn bɔba dangoone la zen'an, ta kaara dɛ behera, ta ba'ahɛ ge ŋmɛregɛ doohe Bɔn'ɔn Nayaŋa la lebe kɛn' na. 16Kpɛ'ɛndoma la ka mina mam keŋɛ zen'an la mam ete sɛla. Se'ere n sɔe la, mam nan ka yele Yudoma bii malemadoma bii nɛrezura bii kpɛ'ɛndoma bii nɛresɛba n wan tom tooma la se'ere. 17Te mam yele ba yeti, Ya nyɛ daaŋseko poan te to bɔna? Yerusalem lebege la daboo, te bugum di ka nayahe la sagom. Wa'an ya na te to malom mɛ Yerusalem dangɔɔma wa, te vi da le tara tɔ. 18N nya yele ba Yenɛ zo'ohogɔ n boe n zuo se'em la naba la n yele mam se'em. Te ba lerege yeti, Bahɛ ya te to pɔhɛ mea! Bala te ba pɔhɛ toonsonɛ dena wa. 19Ge Horon boraa Sanbalat la Ammon kpɛ'ɛma Tobia la Arab nɛra Gesem n wom yele dena wa la, ba kɛhere to mɛ ge ɛnregera tɔ. Ba soke tomam yeti, Bene n bala te ya eta wa? Ya kaare la naba la pooren? 20Te mam lerege ba yeti, Saazuo Yenɛ wa wan bo to nyaŋerɛ. Tomam a yamehe wa wan pɔhɛ mea la. Ge han dɛna yamam, ya ka tare tɔntɛ Yerusalem teŋa wa poan bii ya tara sɛla n daa pon pin'ilom biŋe na ka poan.

will be added

X\