Nehemia 11

1Te Israel nɛŋadoma la kɛn'ɛra Yerusalem poan, ge te ba nɛresɛba woo n boe ba teŋhe ba teŋhe la ŋmɛ' gbaŋa nɛre pia woo poan yehe nɛra nɛra, te bama me wa'ana lagom bɔna toolom teŋa Yerusalem poan, ge te sɛba n yee dɛna porogerɛ bawae' la bɔna ba teŋhe ba teŋhe la poan. 2Israeldoma la zan'an kan' Yenɛ som bahɛ se'em woo n eŋɛ a potɛn'ɛrɛ te a kɛn'ɛra Yerusalem poan. 3Teŋse'ehe nɛhedoma n kɛn'ɛre Yerusalem poan la n wana. Israeldoma la malemadoma la Levidoma la Yenɛ yire tontoneba la Solomon tontoneba n zin' la ba yire ba yire poan Yuda teŋhe poan, 4Yuda yaahe basɛba la Benyamin yaahe basɛba me kɛn'ɛre Yerusalem poan. Yuda yaahe la poan, sɛba n kɛn'ɛre Yerusalem poan dela Ataiah n sɔ de Uzia n sɔ de Zekaria n sɔ de Amaria n sɔ de Sepatia n sɔ de Mahalalel n de Perez yaahe la 5la Maaseiah n sɔ de Baruk n sɔ de Kol Hoze n sɔ de Hazaiah n sɔ de Adaiah n sɔ de Yoiarib n sɔ de Zekaria n de Sela yaahe la. 6Perez yaahe n kɛn'ɛre Yerusalem kanlɛ dela boraa kɔbehe senaahe la pihiyoobe la senii (468). 7Benyamin yaahe la poan, sɛba n kɛn'ɛre Yerusalem poan dela Sallu n sɔ de Mesulam n sɔ de Yoed n sɔ de Pedaiah n sɔ de Kolaiah n sɔ de Maaseiah n sɔ de Itiel n sɔ de Yesaiah, 8tagala Gabai la Salai, boraa kɔbehe sewae' la pihiyi' la senii (928). 9Zikri dayɔa Yoel n de ba kpɛ'ɛndoma, te Hasenua dayɔa Yuda sɔna teŋsɛka n de teŋkantɛ tagalɛ boyi' la behera. 10Malemadoma la poan, sɛba n kɛn'ɛre Yerusalem dela, Yedaiah n sɔ de Yoiarib la Yakin la 11Seraiah n sɔ de Hilkia n sɔ de Mesulam n sɔ de Zadok n sɔ de Meraiot n sɔ de Ahitub n behere Yenɛ yire la tooma la 12ba taaba sɛba n ton la Yenɛ yire kɔbehe senii la pihiyi' la seyi' (822) la Adaiah n sɔ de Yeroham n sɔ de Pelalia n sɔ de Amzi n sɔ de Zekaria n sɔ de Pasur n sɔ de Malkiya la 13a taaba sɛba n de yizuto keendoma kɔbehe seyi' la pihinaahe la seyi' (242) la Amasai n sɔ de Azarel n sɔ de Azai n sɔ de Mesilemot n sɔ de Imer la 14a taaba sɛba n tare paŋa kɔbega la pihiyi' la senii (128). Ba nɛŋadaana dela Hagedolim dayɔa Zabdiel. 15Levi yizuo la poan, sɛba n kɛn'ɛre Yerusalem dela, Semaiah, se'em sɔ n de Hasub, se'em sɔ n de Azrikam, se'em sɔ n de Hasabia, se'em sɔ n de Buni, 16la Sabetai la Yozabad n yehe Levi nɛŋadoma la poan na sɔna Yenɛ yire la yeŋa tooma behera. 17Matania, se'em sɔ n de Mika, se'em sɔ n de Zabdi, se'em sɔ n de Asap n boe nɛŋa pɛnka la sohoga saŋa la. Bakbukia tagalɛ a sɔɔnrɔ la poore, Abda se'em sɔ n de Samua, se'em sɔ n de Galal, se'em sɔ n de Yedutun la. 18Levidoma la n boe toolom teŋa wa poan la zan'an kanlɛ dela, boraa kɔbehe seyi', la pihinii la seyi'. 19Nayaŋguruba yizuo la poan, sɛba n kɛn'ɛre Yerusalem dela, Akub la Talmon, la ba taaba. Bama n behere nayaŋguruba boraahe kɔbega la pihiyopɔe la seyi' la. 20Israel buuri la, malemadoma, la Levidoma la sɛba n gee la kɛn'ɛre la ba teŋhe ba teŋhe Yuda teŋa, nɛra woo la a sɔ'ɔlom. 21Yenɛ yire tontoneba la kɛn'ɛre la Opel Zoore la zuo, te Ziha, la Gispa dɛna ba nɛŋadoma. 22Se'em n de Levidoma la nɛŋadaana Yerusalem poan dela, Uzi, se'em sɔ n de Bane, se'em sɔ n de Hasabia, se'em sɔ n de Matania, se'em sɔ n de Mika. Uzi wa dela Asap yaaŋa kayema, sɛba n sɔe yooma yɛla Yenɛ yire poan la. 23Naba n bo'ore yoonyooneba wa nɔɔrɛ ba wan eŋɛ sɛla. 24Te Mesezabel dayɔa Petahia n de Yuda dayɔa, yehe Zera buuri la poan na la dɛna naba bitonoŋa, nɛreba la yɛla woo poan. 25Teŋbibihe la la se samana la woo la, Yuda nɛreba basɛba kɛn'ɛre la Kiriat Arba, la ka zen'se'ehe woo n boe Dibon la ka zen'enhe, Yekabzeel la ka teŋbibihe, 26Yesua teŋa, Molada teŋa n boe Bet Pelet teŋa, 27Hazar Sual, Beerseba, la ka zen'enhe woo, 28Ziklag, Mekona, la ka zen'enhe zan'an, 29En Arimon, Zora, Yarmut, 30Zanoa, Adulam, la ka teŋbibihe zan'an, Lakis la ka zen'enhe, Azeka la ka zen'enhe zan'an. Bala ba boe la zen'sena wa poan, ze'ele Beerseba ta paɛ Hinom Bɔn'ɔn la poan na. 31Benyamin yaahe la n ze'ele Geba daa kɛn'ɛre la Mikmas la Aiya la Betel la zen'se'ehe woo n kae ka la poan la 32Anatot la Nob la Anania la 33Hazor la Aramah la Gitaim la 34Hadid la Zeboim la Nebalat la 35Lod la Ono la Lɔgɔmaaleba Bɔn'ɔn teŋhe la poan. 36Levidoma yizuto la n boe Yuda poan la basɛba kɛn'ɛre Benyamin teŋa.

will be added

X\