1 Hakalia dayɔa Nehemia yelehom n wana. Yuuma pihiyi' poan, Kislev ŋmarega la poan, te mam bɔna Susa teŋkantɛ la poan, 2 te n sɔɔn koyema Hanani la borase'ehe ze'ele Yuda na wa'ana, te mam soke ba Yudoma sɛba n nyaŋɛ peɛn kelom vɔna la, la Yerusalem teŋa yele. 3 Te ba yele mam yeti, Fiin wa la n peɛn bɔna teŋa la poan la boe la sunsagaŋɔ kantɛ la toorɛ poan, te Yerusalem dangɔɔma la zan' an lu', te nayahe la nyɔ' la bugum. 4 Mam wom yele ana wa la, mam zin'ire la teŋa kele, kele dabeha ge zagahɛ n mɛŋa, ge bɔna saazuo Yenɛ wa nɛŋan la sohoga. 5 Mam sohɛ yeti, Na'ayenɛ saazuo Yenɛ wa, kanregɛ ge dabeem Yenɛ, n tara a nɔbiŋere la zo'ohogɔ bɔ'ɔra sɛba woo n nɔŋɛ en ge dɔla a nɔɔrɛ wa, 6 kelehe, ge sure behɛ ho yameŋa wa n sohore hɔ sohe sɛka wontɛɛŋa la yu'uŋɔ bɔ'ɔra Israeldoma ho yamehe wa. Mam pote la tuure se'ere te tomam Israeldoma wa tue ho wa. Mam mɛŋa la n sɔ yire zan'an tue hom mɛ. 7 Tomam tom la ŋmɛlema ho nɛŋan. To ka doohe ho nɔɔrɛ la ho malema la ho nɔze'elego la te ho bo ho yameŋa Moses la. 8 Tɛnra ho yelehom sebo te ho dekɛ bo ho yameŋa Moses yeti, ya han dagana birikindoma, n wan yeregɛ ya bahɛ teŋhe woo poan. 9 Ge ya han lebe mam zen'an na, nam mam nɔɔrɛ la, ba han pon pɛnregɛ ya sɛba loŋe sateŋa n zaan, n wan kan'ahɛ ba bilam ha tare ba wa'an zen'sɛka te n loe te n yu'urɛ bɔna ka poan wa la. 10 Ba dela hom yamehe, hom mɛŋa nɛreba te ho yɔ to'e ba la ho paŋkantɛ la ho mɛŋa nu'o. 11 N daana, mam sohore ho mɛ. Kelehe ho yameŋa wa sohoga wa, la ho yamehe se'ehe n bote ba na'ahera ho yu'urɛ wa sohoga, ge bo ho yameŋa wa nyaŋerɛ zina, ge zɔ' n ninbɔn'ɔn nɛra wa nɛŋan. Mam n de se'em n bo'ore naba a daam.
