Nahum 3

1Yele boe hom ziim teŋa wa zuo, teŋsɛka n perɛ la ponpɔrɔŋɔ, la fan' ma'an la, teŋsɛka te dabaherɛ ka bɔna te ba ka fan' sɛla la. 2Teŋsɛka poan te daarɛ woo na'ma vuura ka poan, te yiri damena la toroto ka poan la. 3Teŋsɛka poan te nɛreba ne ban' yiri digera nɛreba la so'ahe, la kana. Pogolena taaba, ko kum te bo ka tara kanlɛ, te nɛreba zɔɔha kum mea zɔta, 4te ba deŋɛ paɛ yaloma gan'anrɛ la, Nineveh teŋa wa ane me wo yaloma n dekɛ a soŋa pan'ahɛ nyɔkɛ teŋhe zo'e zo'e te se dɛna da'aba bo yalomtooma, ge dekɛ a sɔɔntooma la nyɔkɛ ba sɔna se'em la. 5Pɛɛntɛɛnreba Na'ayenɛ la yeti, Mam zaberɛ me la hɔ. N wan pilige hom n senge sɛla pin' ho mɛŋa la. N wan dekɛ ho beele pa'alɛ teŋhe woo, ge bahɛ te ba nyɛ' ho nyanɛ. 6N wan dekɛ dɛngerɔ bo hɔ, n wan namehɛ hɔ la sunsunyiim, te ho lebege sɛla n de bonbe'o. 7Te se'em woo n nyɛ' hɔ, wan ɛnkɛ ho zen'an ge yeti, Nineveh boe la sagaŋɔ poan te nɛra kana wan fabelɛ bo en. N wan nyɛ' nɛra la bɛɛ te a pan'ahɛ hɔ? 8Hom Nineveh teŋa wa ane soŋa gana Tebes teŋa n boe Nile Kolaa zen'an la mɛ? Kolaa la n gu' en, te ko'om la dɛna dangoone kae en bahɛ. 9Kus teŋa, la Mizraim teŋa n de'a beena se'a n tare paŋa. Put teŋa, la Libya teŋa yuun lagom dɛna la a teŋa la nɛreba. 10Ge la bala zan'an la, diŋdaana la yuum zabɛ nyaŋɛ en mɛ te a lebege da'aberɛ bo a diŋdoma la. Ba yuun nyɔkɛ a kɔmbilɛɛhe me fɔnbɛ sɔya zuto ko'. Ge nya ŋmɛ' gbaŋa tɔnrɛ a nɛresoma la, ge lo' a nɛrekanreba la zan'an la mi'inhe. 11Hom me wan buge, ho wan zɔ' ta sogɛ, ho wan zɔ' keŋɛ ho diŋdaana zen'an ta ɛɛra soka zen'an. 12Ho teŋkanra la zan'an ane me wo kenkandeena kenkama n ne bi'e te ba han miim ba, ba luta dita la nɔɔrɛn se'em la. 13Behɛ ho pɛɛntɛɛnreba la, ba zan'an dela pɔgɔhe. Ho nayaŋa la kɔ'ɔn yu'ɛ me bo ho diŋdaana la, bugum n di dɔɔseto te ho tara yu'ura ho nayaŋa la. 14Ankɛ ko'om zo'e ze'ele bo ho mea gura zaberɛ daarɛ la. Malom mɛ ho yikanra la soŋa, ge malom kpemehe ho mɛŋa soŋa, ge la ho nɛ tɔnɔ la ho mɛ' ho dangoone la soŋa. 15Ge la bala zan'an, bugum wan di' ho ta ba'ahɛ, So'a wan ŋma' hɔ ba'ahɛ, wo zunzunre n ne lamenɛ naatɛ obe de ba'ahɛ se'em la. Malom wi'ɛ pa'ahɛ wo sonwa'ara la, malom wi'ɛ pa'ahɛ wo zun'uhe la, ge la dela yoo ho kan nyɛ' vo'ohogo. 16Ho kɔɔhereba zo'e me wo ŋmarebibihe n zo'e saŋgbanɛ zuo se'em la, ge ba ane me wo zunzunre la, ne obe naatɛ la ba'ahɛ ge zɔ'. 17Sɛba me n gure ho la ane la bala mea, ho kpɛ'ɛndoma la me ane wo zunzunre n balegere naara se'em la, ge wontɛɛŋa han nyagɛ paŋa, ba ne zɔ' mɛ, te nɛra ka mina ban tɔgɔlɛ zen'an. 18Asiria teŋa naba wa, ho duŋkeema la gan' ginha mɛ, ho nɛrekanreba la gan' mɛ, ho nɛrekanreba la gan' mɛ te ba vo'ohe. Ho nɛreba la n bala yeregɛ bɔna zɔya zuto ha te nɛra ka bɔna wan kan'ahɛ ba la. 19Tiim ka boe wan tebɛ ho nɔtɛ la, denɛ n wan ta ko' hɔ. Nɛra woo han ne wom yelese'ere n ete ho wa, a ne la' mɛ ge pa' nu'uhe, la hom n lu' la. Se'ere n sɔe la, nɛra ka boe te ho ka eŋɛ en potɔɔ.

will be added

X\