Nahum 2

1Diŋdaana n bala paara hom Nineveh na la. Gu' ho teŋa la sɛngehe woo poan soŋa, ge gu' ho sɔya la zuto, ge gu' ho teŋkanra la poan zan'an, kɔ'ɔn maahom ho mea soŋa, kan'ahɛ ho paŋa zan'an gura. 2Na'ayenɛ wan malom sɛ' Yakob som la Israel som la, som sebo te potɔpa la pon dekɛ ba nu'o pagelɛ bo zuo, sagom bo, ge aanhom bo yila zan'an bahɛ la, Na'ayenɛ wan malom sɛ' bɔ. 3A pɛɛntɛɛnreba la n tare sɛba tɛ'ɛla ba mɛhe la dela mɔlɔgɔ, ge te ba lɔgɔrɔ la te ba yɛ la me dɛna mɔlɔgɔ. Kuto sɛba te ba dekɛ maalɛ a yiri toroto la nyagere mɛ, ge te ba kana la me ana sɔnpe sɔnpe. 4A yiri toroto la kɔ'ɔn damene la bala, zɔta tɔla nɛŋa, ge lɛbera pooren kaara zen'an woo behera. Ba kpekere la nini wo bugum la, nyagera wo saa la. 5A tanhe a pɛɛntɛɛnreba la me, te ba kanbela kalam kalam na. Ba zɔ me ta kae teŋa la dangoone zan'an mum zɛ'a gura, ge dekɛ ba zaba te'elehe la te'ele ba mɛhe. 6Te koleŋse'ehe n yu' bɔgɔse'ehe te ba tu' te ko'om dɔla se poan kɛn'ɛra teŋa la poan na la yu'uhɛ, te naba yire gbe'era la dabeem. 7La pon tɔgɛ me gan'an, te teŋa la wan yeregɛ. Ba wa nyɔkɛ ka pugunto te ba dɛna da'aba, ta kokɛ ba zuto kaaha limiha taaba wo dayɛma la, ge te ba tara ba yɛ'a. 8Nineveh teŋa ane me wo bɔka te ka ko'om keenhɛ la. Ba wan kaahɛ yeti bahɛ ya, bahɛ ya, ge la bala zan'an, sɛla ka boe n bahere. 9Fan' ya a ligiri la, fan' ya a sanlema la. A lɔgɔrɔ la ka malom ba'aha, lɔgɔseto n boe teŋa la poan la ka malom ba'aha. 10La nya nyɔkɛ en mɛ, a sɛla woo tole ya, a giinla kɔ'ɔhɛ la zan'an, a yam n nya bɔregɛ, te a duma gbe'era, te a iŋa zan'an gbe'era, te a nɛŋa tee. 11Nineveh teŋa wa yuun ane me wo gbegenɛ n boe yoko poan la, nananawa, gbegenɛ yoko la bɛɛ? Gbegenɛ la la de kɔma n boe zen'an la bɛɛ? Zen'an te gbegenɛ la, la de pɔga, la de kɔma ne ɛɛra te sɛla ka bɔna daana ba la bɛɛ? 12Gbegense'ere n daa ne ko' nɛnɔ zo'e zo'e biŋe a kɔma, ne ko nɛnɔ te to gan'an yoo te a ne aanhom toseto bo a zɔ' la, bene nya eŋɛ dɛ? 13Pɛɛntɛɛnreba Na'ayenɛ la yeti, Mam n zaberɛ la hom Nineveh teŋa wa. N wan nyɔ' ho yiri toroto la te to lebege tampegelom, ge bahɛ te so'a kɔrom ho bodibinkansaŋehe la. Ho kan le nyɛ' paŋa la fiin me le mɛlehɛ nɛra. Ho kan le nyɛ' sore tom ho nɛreba te ba dɔla ɛɛra pɛnregera le yɛ'ɛha.

will be added

X\