Nahum 1

1Nineveh teŋa yɛla gɔŋkona wa tare la liligere se'ere te Na'ayenɛ lilige pa'alɛ Elkos teŋa boraa Nahum la. 2Na'ayenɛ dela nyuunre, la leregere Yenɛ. Na'ayenɛ lete mɛ, ge me perɛ la suunre. Na'ayenɛ lete a diŋdoma me. 3Na'ayenɛ n de Paŋa Zan'an Daana, ge me ka eta suunre tɔtɔ, Na'ayenɛ kan bahɛ sɛba n tom be'em la, te ba bɔna fai. Na'ayenɛ tooma n de saabeeokeŋɔ wa n lobere wa, saŋgbana dela a na'ma puuhugo te a kpa'ahɛ bahɛ. 4Enŋa n wan ta'an tanhɛ te ko'kantɛ wa keenhɛ, enŋa n wan ta'an bahɛ te kolaahe zan'an kɔ'ɔn keenhɛ. Enŋa n wan ta'an bahɛ te warɛ sige Basan teŋa, la Karmel zoore zuo te ba sɛla woo suɛ, ge me wan bahɛ te Lebanon teŋa la soŋa la me mɛlom. 5Zɔya kanra la zobibihe zan'an wan nyɛlegɛ Na'ayenɛ nɛŋan. Teŋa la, la sɛla woo n vɔe ka poan miine mɛ a nɛŋan. 6Na'ayenɛ dena wa han eŋɛ sunsunya, ane n wan ta'an ze'ele la en? Ane n wan nyaŋɛ ŋmibe ze'ele la Na'ayenɛ sunsunyiim wa? A sunsunyiim la ne ka'ara me na wo bugum n dite na la, te tanhe ɛngera. 7Na'ayenɛ ane soŋa mɛ, la han ta daana tɔ, a dela soka zen'an bo to. A gu'ure sɛba woo n delom en la mɛ. 8Ge han dɛna Nineveh teŋa wa, a yeti a dekɛ la ko'om saalom ka zan'an bahɛ, a wan dige a diŋdoma la ta kɛn'ɛhɛ yoko poan. 9Ban maahom yelese'a woo te ba zabɛ la Na'ayenɛ la, a wan sagom a zan'an bahɛ, daaŋɔ kan le wa'ana pa'ahɛ boyi'. 10Gɔn'ɔhe wan kpanrɛ ba bahɛ sa, ba wan ana wo daambugureba la te bugum wa'ana taɛ ba di wo sɔgɔrɔ la. 11Nɛra ayema daa ze'ele la hom Nineveh teŋa wa poan yehena tɔgɛ kɛhɛ Na'ayenɛ, gee ton bo be'em fole te bo tona. 12Na'ayenɛ n yele se'em n wana, la yan pon tara pɛɛntɛɛnreba kekeko la, gee me zo'e ya kanlɛ poan la, ba wan ŋma' ya bahɛ ge tole. La mam n daa pon daana hom Yuda teŋa wa la, n kan le malom daam hɔ. 13N wan kɔ' yɔgɔhɔga sɛka te ba dekɛ yɔgɛ ho nyugela zuo la bahɛ, ge kɔ' min'se'ehe te ba dekɛ lo' hɔ la me bahɛ. 14Na'ayenɛ mɛŋa n bo nɔɔrɛ te sɛla wan eŋɛ hom Nineveh teŋa wa. Ho kan nyɛ' yaaŋa te ka yee ta porɛ ho yu'urɛ. N wan wɔnrɛ ho bagase'a woo te ho tara la zan'an bahɛ. N wan maahom ho yɔɔ biŋe. Se'ere n sɔe la, ho vom ka tare vɔnrɛ. 15Behɛ zɔya wa zuo ha, se'emdaana n tare yetɔgɔsomɔ kena na la. A tare suguru yelehom yele yeti, Yuda, ihege la ho de'em ho toolom de'enɔ la! Eŋɛ nɔpo'ologɔ bo'olom ge pɛngɛ Yenɛ! Potɔpa la kan le malom daam hɔ, n wan sagom ba zan'an zan'an.

will be added

X\