Mikah 7

1Mam mɛlehegɔ wa ane wo nɛra n keŋɛ te n ta doohe saahɛ ta'ahe. N ka nyɛ ka nyɛ sɛla, n me pon ka nyɛ kenkanɛ wan ko n laka. 2Ba piie sɛba n zote Na'ayenɛ teŋa la poan la bahɛ mɛ. Nɛresoŋɔ la ayena ka gee. Ba zan'an dela nɛrekooreba, nɛra woo tare la yoka dɔla a sɔɔn. 3Ba nu'uhe zan'an nyaŋɛ la be'emtooma. Naba nɔŋɛ la ba bɔ'ɔra en, te yelegankera tɔ'ɔha mu'ure bo'olom, te paŋadoma pɛnregera nɛreba bama n bote se'em. Ba zan'an dela boyena. 4Se'em n de nɛresoŋɔ ba poan ka tare zuo. Se'em n de tontɔɔ ba poan ka tare vɔnrɛ. Ya nɔtɔgɔheba la n pon deŋɛ yele se'em la, dabaherɛ la paɛ na, te gbirigere wan gbirige. 5Da dekɛ ho mɛŋa delom ho sɔɔn, da dekɛ ho potɛn'ɛrɛ delom ho zɔ. Hom la se'em n lagom gan'an, mina hom n tɔgɔre se'em la en. 6Bia kan nane ka sɔ, te pugula me zabera la ka ma, te pɔka me zabera la ka dayaama. Nɛra dima dela a yiren nɛra. 7Ge han dɛna mam, mam behere la Na'ayenɛ n wan eŋɛ se'em. Mam gure la Yenɛ n de mam faanra la, enŋa n wan kelehe mam. 8N diŋdoma wa, da la'are ya ma. La mam n pon lu gan'an la, n wan ba'ahom ihege. La mam n pon bɔna lika poan wa, Na'ayenɛ n de mam nɛɛhom. 9Na'ayenɛ sunsunya nyie mɛ la mam, mam tom be'em la zuo. Mam wan ŋmibe Na'ayenɛ sunsunyiim la poan gura se'em ma'an te a wan gankɛ yele la, ge bo mam n boorɔ. A wan tare mam wa'an a nɛɛhom la poan na te n nya tontɔɔ vom la. 10N diŋdoma la nini wan nyɛ' wana te valom kɛn' sɛba n sokere mam yeti Na'ayenɛ ho Yenɛ la bɛɛ la. Mam nini wan nyɛ te ba nɛɛra ba feta wo fɛnfɛra n boe sore zuo la. 11Ho dangɔɔma mea daarɛ la kene na. De daarɛ ho teŋa la beene wan yalegɛ pa'ahɛ. 12Dabeha aŋa poan, nɛreba wan ze'ele Asiria, la Mizraim teŋkanra poan, ze'ele Mizraim ta ta' Euprates Kolaa la, la zɔya la wa'an ho zen'an na. 13Teŋparɛ wa wan lebege daboo, ka nɛreba la toonfɛn'ɛha la zuo. 14Dekɛ ho kpe'eŋo la behera ho sɔ'ɔlom la n kɛn'ɛre ba ma'an ha, bɔna zen'sɛka n sobe la. Bahɛ se Basan la Gilead teŋhe poan te se ɔbera, wo lan yuun pon an se'em la. 15Wo yan yuun ze'ele Mizraim yehe na te la ana se'em la, bala te n wan pa'alɛ ya n nyalematooma. 16Teŋhe wan nyɛ' te valom di ba, la ba paŋa la zan'an. Ba wan dekɛ ba nu'uhe ge' nɔɔrɛn, te ba toba wam. 17Ba wan dita tentɔnɔ wo bonsɛla la, bii bonvuula sɛba woo n boe teŋa wa zuo la. Ba wan ze'ele ba soka zen'enhe la gbe'era yɛhera na. Dabeem wan kɛn' ba zɔta kena hom Na'ayenɛ to Yenɛ la zen'an na. Ba wan zɔta ya. 18Yenɛ dene n ane wo hom? Bahera be'em, ge dita suguru bɔ'ɔra a nɛreba ba tuure woo poan? Ho suunre ne han nyie, de ne le ma'ɛn mɛ, te ho zo'ohɛ tɔ.. 19Ho wan le ba'ahom zɔ' to ninbɔn'ɔn. Ho wan le kan'ahɛ to be'em la wo pin, ge vaɛ to tuure zan'an lobe bahɛ ko'kantɛ poan. 20Ho wan pa'alɛ Yakob buuri wa te ho seren dela yelemɛŋɛrɛdaana, ge zo'ohɛ Abraham wo hom n pon pɔ' nɔɔrɛ la to sɔyaabdoma se'em yuuman yuuman ha la.

will be added

X\