Mikah 6

1Kelehe ya! Na'ayenɛ n tare sɛla te a yele ya! Ihege ya ze'ele zɔya la nɛŋan la ya belom. Bahɛ ya te zɔya la wom yan yeti se'em. 2Zɔya wa, wom ya Na'ayenɛ zɛrɛgerɛ wa, yamam n bo teŋa wa yuue. Se'ere n sɔe la Na'ayenɛ tare la yele la a nɛreba Israel wa. 3N nɛreba wa, yele ya, mam eŋɛ ya la bem? Mam ba' dekɛ n mɛŋa ziile ya la wane? Ya tare la dene te ya lebehe mam? 4Mam n tare ya ze'ele Mizraim teŋa yehe na. Mam n da' ya ya yamenɛ namehegɔ la poan yehe na. Mam n tom Moses la Aron la Miriam te ba tare ya yehe na. 5N nɛreba wa, tɛnre ya Moab teŋa naba Balak n wa kagɛ ya se'em, te mam bahɛ te Beor dayɔa Balaam me wa lebehe en se'em. Mam tom dena wa te sɛba n boe Sitim teŋan ta paɛ Gilgal teŋan baŋɛ mam Na'ayenɛ tooma n de tontɔɔ se'em. 6N yeti n tare la bene wa'an Na'ayenɛ nɛŋan na? N wan eŋɛ la wane na'aha Yenɛ n gane zan'an wa nɛŋan? N wan tare la nagabibihe n de yuunɛ yuunɛ na, te la dɛna nyɔ'an bo'olom yoe? 7La wan tegɛ Na'ayenɛ nini te to tare piihe tuha kɔbega, kaam dugulehe n ka tare kanlɛ na bo en? N wan dekɛ la n dayɔkeema te n nɔŋɛ na kaanbɛ n yelebe'ero zuo yoi? 8N zɔ, Na'ayenɛ pon yele asaala sɛla n ane soŋa, sɛla te a bote asaala zen'an. En bote sɛla n wana, ho tona etesoŋɔ, ge nɔŋɛ zo'ohogɔ, ge sigehe ho mɛŋa dɔla ho Yenɛ. 9Na'ayenɛ n yire teŋa wa doma na la. Yam dela se'em n zote ho yu'urɛ la. Kelehe ya paŋa la la se'em n bo ka la. 10Toonfɛn'ɛha yire wa, n tamɛ ho piŋa lɔgɔrɔ la te ho pim la, la ho piŋa laa la te ho tara magara lɔgɔrɔ te mam suunre nyie la ka la? 11Mam ka sone la nɛrebana. Nɛreba n pini. 12Teŋa wa dakanpa pirɛ mɛ la gbirigere, ka nɛreba dela ponpɔrɔŋdoma, te ba zɛlehe tana pan'aha. 13Bala zuo, mam pɔhɛ ya sagom mɛ. N wan sagom ya ya be'em la zuo. 14Ya wan dita la laahe me'en me'en ge ka tegera. Ya poya wan dɛna vɔya saŋa woo. Ya wan teregɛ lagaha, ge ya kan nyaŋɛ biŋe sɛla. Se'ere n sɔe la, sɛla woo te ya ne dekɛ biŋe la, n ne bahɛ te zaberɛ sige la poan na fan' la. 15Ya wan borɛ, ge ya kan nyɛ sɛla kɛ'. Ya wan sa' kaam, ge bo kan tara soŋorɛ bo ya. Ya wan ŋmɛkɛ tiihe biila, ge ya kan nyɛ daam la nyu'. 16Ya dole la Omri toonyaalehe la, ge tɔgɔha Ahab yire be'em la, dɔla ba malema. Bala zuo, n wan dekɛ ya bo sagaŋɔ. Ya nɛreba wan kɛn' mɛlehegɔ poan. Teŋhe woo wan kɛhera la yamam.

will be added

X\