Mikah 2

1Yele boe sɛba n tɛn'ɛhere be'em la zuo. Sɛba n gan ba soŋɔ poan kɔ'ɔn maahena be'em la, yele boe ya zuo. Beere ne han yelegɛ ba'ahɛ, ba nya ne dekɛ ba be'em la te ba pon maahom ba'ahɛ la tom mɛ. Se'ere n sɔe la, paŋa boe bo ba te ba ta'an dekɛ ba be'em la tom. 2Ba nini ne mɔ'ɛ mɛ la nɛreba kɔɔhɛ, te ba doohe ta fan' se sɔna, fan' nɛreba yiya sɔna. Ba mɛleha yiredaana la a yire, ge muguha nɛreba la ba samana. 3Bala zuo, Na'ayenɛ yeti, N maahene la sagaŋɔ te n bahɛ nɛrebana wa zuo na, namehe seko te ho kan peɛn. Ya kan le malom kena ge okora ya mɛhe. Saŋa la dela nɔyalegerɛ saŋa. 4Dabeha aŋa poan, nɛreba wan dekɛ ya solom sɔlema. Se'em wan fabelɛ fabelegɔ a wan tara a wan yoona yeti, Tomam nya kɔ'ɔn sagom mɛ wa. A tɔnrɛ mam nɛreba lɔgɔrɔ yeregɛ. A fan' to la mam zen'an. A fan' la tomam samana bo nɛreyooro. 5Bala zuo, ya poan n enɛ bala kan bɔna Na'ayenɛ lagaŋɔ la poan ba wan ŋmɛ' gbaŋa tɔnrɛ teŋa la. 6Ba yele nɔtɔgɔheba la yeti, Da pota yele ana. Da tɔgɔre ya yele ana. Yanɛ ka boe wan di to. 7La nare te yamam Yakob yiredoma yeti Na'ayenɛ mea sugurom la ka ba'ahɛ bii Na'ayenɛ ka ete bala mɛ? Mam yetɔgom la ka ete la som bɔ'ɔra se'em sore n de tontɔɔ? 8Ge ba'ahegɔ poan, mam nɛreba la vaɛ ihege mɛ zabera la ba sɔɔnrɔ wo ba dela diŋdoma la. Yɛ'ɛha nɛreba n ka tare daaŋɔ futo sɔya la zuto. 9Sa'ahɛ mam nɛreba wa pɔgɔba ba yiya poan bahɛ yeŋa, ge fan' mam som sebo te n bo n kɔma la te ba kan le nyɛ bɔ. 10Ihege ya ka'lam keŋɛ! Teŋkana wa dagɛ zen'an te ya wan nyɛ' vo'ohogo ka poan. Ka ba' ganlom zo'e mɛ, ka sagom gaŋɛ mɛ, kan le ta'an maalɛ. 11Ponpɔrɔma se'em han wa'ana pan'ahɛ ya yeti, Na'ayenɛ yeti daam, la daam kpe'eŋo wan buge ya teŋa wa poan, enŋa n ne dɛna nɔtɔgɔha soŋa bo mam nɛreba wa. 12Yakob buuri wa, n wan ba'ahom lagahɛ ya zan'an na. N wan seren lagahɛ Israel buuri sɛba n gee fiin la wa'an bɔberɛ yenɛ na. N wan tare ba na lagahɛ bɔberɛ yenɛ wo piihe n lagahɛ bɔna zɔŋɔ deyena poan se'em la. N wan lagahɛ ba bɔberɛ yenɛ wo piihe n lagahɛ bɔberɛ yenɛ se'em ɔbera la te ya le wiɛ. 13Se'em n tan' yu'ura sore la n wan dɛna ba nɛŋadaana te ba dɔla. Ba wan kɔ' nayahe tole te ba naba la bɔna ba nɛŋa. Na'ayenɛ n de ba Naba.

will be added

X\