Mikah 1

1Yelehom sebo te Na'ayenɛ dekɛ n a bo Moreset boraa Mikah, se'em ma'an te Yotam la Ahaz la Hezekia di Yuda teŋa na'am soohom la. Yelehom la dela Samaria la Yerusalem teŋhe yele. 2Nɛreba wa, kelehe ya. Teŋparɛ wa zan'an la nɛresɛba woo n boe ka zuo wa, kelehe ya soŋa. Daana Na'ayenɛ wan ze'ele a fa'a yire la poan na zabɛ la ya. 3Behɛ, Na'ayenɛ ze'ele la a bɔŋa zen'an la sigera na. A pɔhɛ teŋa wa zuo mɛ nɛɛra zen'se'ehe n de kuŋkuma wɔnta. 4A na'ma nɛɛre la zɔya te a nyɛlegera, te teŋa nyɛlegera wo kaam n ze' lɛm bugum nyɛlegera se'em la, wo ko'om n ze'ele kuŋkune zuo zɔta sigera se'em na la. 5Wana wa woo dela Yakob yelebe'ero la zuo, Israel yiredoma toonbe'ero la n sɔe wana wa. Yakob yelebe'ero la dela tone dagana Samaria teŋa? Yuda toonbe'o dela kone dagana Yerusalem? 6Bala zuo, n wan bahɛ te Samaria teŋa lebege daboo. N wan bahɛ te a lebege dia tiihe se'a zen'an. N wan vaɛ kuga se'a te a dekɛ mɛ' a yiya la ta ka'ahɛ bahɛ a bɔn'ɔrɔ poan, ge te a eberɛ la gan'an. 7A baga la zan'an wan wɔnrɛ buuri buuri. A bo'olom woo te a tara kena Yenɛ yire la poan na la. Ba wan nyɔ' ba la bugum. N wan sagom a yelese'a woo te a mɛ ba mɛ mɛ ze'ele la bahɛ. A lɔgɔrɔ la n de yalomtooma lɔgɔrɔ la zuo. N wan bahɛ te a yaalegɔ lɔgɔrɔ la zan'an lebe yaalegɔ poan. 8Wana wa zuo, N wan kele koonɔ, kena na'beela, ge ɛɛra beele, N wan wɔɔna wo sanheŋa la, ge fabela wo viiŋɔ la. 9Se'ere n sɔe la, a yele la ane wo nɔtɛ kɛka n ka tare tebegɔ la. A ban'an la paɛ Yuda teŋa me na. La paɛ mam mɛŋa nɛreba teŋa Yerusalem zanɔɔren mɛ na. 10Da tɔgɛ ya de yele Gat teŋa poan. Da kele ya de zuo. Sɛba n kɛn'ɛre Bet Oprah teŋa poan la, gan'anrɛ ya teŋa bilom. 11Sapirdoma wa, yɛɛhɛ ya lɔgɔrɔ bahɛ ge ɛɛra beela la zufagahom. Zaanan teŋadoma kan yehe na. Bet Ezel teŋa boe la koonɔ poan, ba fan' sɛba n gu'ure ba la keŋɛ mɛ. 12Sɛba n boe Marot teŋa poan boe la too poan gura se'em ma'an te ba wan ta nyɛ faanrɛ ba namehegɔ wa poan. Namehegɔ la ze'ele la Na'ayenɛ mɛŋa zen'an sige ba zuo na, bo paɛ Yerusalem nayaŋa poan mɛ na. 13Yamam sɛba n kɛn'ɛre Lakis teŋa poan wa, maahom ya yiri la ya zaba toroto gura zaberɛ. Yamam n pɔhɛ tom toonbe'ero la Yerusalem teŋa wa yia. Yamam toonbe'ero la n bahɛ te Yerusalem lu'. 14Bala zuo, ya wan bo Moreset Gat teŋadoma ya bo keehega. Akzib teŋa me wan pan'ahɛ Israel nadoma bahɛ yoo. 15N wan tare nyaŋera na te a zabɛ nyaŋɛ yamam Maresa teŋa nɛreba wa. Israel soŋa la wan zɔ keŋɛ Adulam. 16Siie ya zuto, ge kele ya kɔma sɛba te ya nɔŋɛ la zuo. Siie ya ya zuto te to ana beela beela wo ziio zuo la. Se'ere n sɔe la ba wan fan' ya kɔma la loŋe teŋa.

will be added

X\