Amatie 4

1Te Yenɛ Sea la daa tare Yesu keŋɛ pɔgɔtia poan ha te Sagona la makɛ en behɛ. 2Yesu daa boe la pɔgɔtia poan dapihinaahe, wontɛɛŋa la yu'uŋɔ ge te a zagahe la a mɛŋa te a kom dona. 3Te Sagona la keŋɛ a zen'en ta yele en yeti, Ho han de'a la Yenɛ dayɔa, bahɛ te kuga wa lebege dia. 4Te Yesu lebehe yele en yeti, La golehɛ yeti, Asaala ka vɔe la boom ma'an, ge a vɔe mɛ la yelese'ere woo n ze'ete Na'ayenɛ nɔɔrɛn na. 5Te Sagona la tare Yesu keŋɛ Toolom Teŋa la poan, ta zom Yenɛ Yirɛ la dangoonwoko zuo ha, 6ge yele en yeti, Ho han de'a la Yenɛ dayɔa ɛnkɛ sige na, te la golehɛ yeti, A wan bo a soŋoreba nɔɔrɛ te ba mina ho yele. Ge, ba wan zɛnkɛ ho tara te ho na'arɛ kan ŋmɛ' kugure. 7Te Yesu lebehe en yeti, La golehɛ yeti, Da makere ya Na'ayenɛ ya Yenɛ la behera. 8Le yɛ'ɛha, te Sagona la tare Yesu zom zowoko zuo ta pa'alɛ en teŋa wa zan'an sɔ'ɔlom te la ana soŋa, 9ge yeti, Ho han dɔnbelɛ teŋa na'ahe mam, n wan dekɛ wana wa zan'an bo ho. 10Te Yesu lebehe en yeti, Keŋɛ ha, Dima wa! La golehɛ yeti, Zote ya Na'ayenɛ ya Yenɛ la, ge tona bɔ'ɔra enŋa ma'an. 11Te Sagona la bahɛ Yesu ge keŋɛ te Na'ayenɛ soŋoreba wa'ana soŋɛ en. 12Yesu n daa wom te ba pagɛ Yon la, a keŋɛ Nazaret teŋa n boe Galilee teŋa poan la. 13A ta bahɛ Nazaret teŋa poan ge keŋɛ la Kapernaum teŋa n lɛm Galilee mɔgɔrɛ n boe Zebulun la Naptali teŋhe poan ta bɔna. 14Wana wa eŋɛ te Na'ayenɛ nɔtɔgɔha Isaiah n daa yele se'em la dɛna sera, 15Zebulun la Naptali teŋhe n boe ko'kantɛ sore nɔɔrɛn wa, Yordan Kolaa la Galilee teŋhe wa, 16sɛba n boe lika poan la nya nyɛ la nɛɛhom kantɛ. Nɛɛhom n nɛɛ bo sɛba n boe lika poan la. 17Bala ma'an te Yesu pɔhɛ mɔɔla yeti, Tee ya ya potɛn'ɛra, te saazuo sɔ'ɔlom la pɔnre kene na. 18Yesu daa eere la Galilee mɔgɔrɛ la bɔba, nya daa nyɛ' zim lɔbereba bayi'. Ba dela Simon se'em yu'urɛ n de Peter la a yebega Andrew. Ba tare la yoka lɔbera zim mɔgɔrɛ la poan. 19Te Yesu yele ba yeti, Doohe ya mam te n bahɛ te ya de'a zim lɔbereba sɛba n wan tara nɛreba bɔ'ɔra mam. 20Bilam bilam, te ba dekɛ ba yogohe la bahɛ, ge doohe en. 21A le kena kena ta nyɛ' nɛreba bayi'. Ba dela Zebedee dayɔɔhe Yames la a yebega Yon. Bama la ba sɔ la bo la ba ɔɔnrɔŋɔ poan maala ba yogohe, te Yesu daa yi' ba. 22Bilam bilam te ba bahɛ ɔɔnrɔŋɔ la, la ba sɔ la, ge doohe en. 23Yesu daa eere la Galilee poan zan'an pa'ala nɛreba zamehegɔ yiya poan ge mɔɔla yelesoma bɔ'ɔra nɛreba yɛhera Yenɛ sɔ'ɔlom la n an se'em ge tebera ban'ahe buuri buuri. 24A yu'urɛ yehe Siria teŋa poan zan'an, te nɛreba tara ban'ahedoma buuri buuri, iŋdumadoma la sɛba te bonbɛ'ɛhe dɔla ba, la sɛba n lute kilenki'ire, la kɔɔrɔnɔ kena a zen'en te a tebera ba. 25Nɛrekooŋɔ ze'ele Galilee, la Teŋhe Pia la, la Yerusalem la Yudea, la teŋsɛka n bo Yordan Kolaa yakenɛ la dɔla en.

will be added

X\