Amatie 3

1Bala ma'an te Yon Ko'sɔɔra la mɛ daa pɔhɛ mɔɔla Yudea pɔgɔtia poan ha. 2A daa yeti, Tee ya ya potɛn'ɛra. Se'ere n sɔe la saazuo sɔ'ɔlom pɔnre kene na. 3Enŋa te Na'ayenɛ nɔtɔgɔha Isaiah yuun tɔgɔra yeti, Nɛra n mɔɔle yeti, Maalɛ sore pɔgɔtia la poan te de gan'an tontɔɔ bo to Na'ayenɛ la. 4Yon lɔgɔrɔ daa dela yɔgɔnɛ kɔnberɔ te a yɛɛra. A dekɛ la sɛganɛ lo' a sea. A dia me dela sonwa'ara la seerom. 5Nɛreba daa ne ze'ele Yerusalem teŋa la Yudea teŋa la teŋsɛka n lɛm Yordan Kolaa la wa'an a zen'en na, 6puta ba yelebe'ero, ge te a bɔ'ɔra ba ko'om soa Yordan Kolaa la poan. 7Yon n daa ta nyɛ' te Pariseedoma la Saduseedoma kekeko kena a zen'en te a bɔ'ɔra ba ko'om soa la, a yele ba yeti, Bonsɛ'doma kɔma wa, ane n yele ya te ya wan ta'an le'ehɛ namehe seko te Na'ayenɛ yeti a bahɛ te la wa'ana la? 8Eŋɛ ya sɛla pa'alɛ te ya tee ya potɛn'ɛra, 9ge da tɛn'ɛhɛ ya te Abraham n de ya sɔyaaba. Se'ere n sɔe la, Na'ayenɛ ta'an dekɛ kuga wa eŋɛ ba te ba lɛbege Abraham yaahe. 10Lea maahom mɛ gan' gura te ka ŋma' tiihe nyɛga. Tiihe se'ehe woo n ka wom di soŋa, ba wan ŋma' ka bahɛ bugum poan. 11Mam tare la ko'om sɔɔra ya pa'ala ta ya tee ya potɛn'ɛra. Ge se'emdaana n tagalɛ mam pooren la kpe'em gana mam, te mam ka seke n zanla a tagara. A wan wa'ana dekɛ Na'ayenɛ Sea la bugum sɔ ya. 12A tare a wanzagahe te a yeele dia la te ba tɔ la. A wan yeele uto la nyɔ' ba bugum sebo n ka kiŋire poan ge dekɛ dia la sun' a baanrɛ poan. 13Bala ma'an te Yesu daa ze'ele Galilee teŋa poan keŋɛ Yon zen'en Yordan Kolaa poan, te a sɔ en. 14Ge Yon daa bote a zagahɛ mɛ ge nya yeti, La nare ne te hon sɔ mam te hon le tuluge kena mam zen'en na? 15Te Yesu lebehe yele en yeti, Bahɛ te la nan ana bala. La sontii te eŋɛ sɛla woo soŋa soŋa. Te Yon daa sakɛ. 16Yon n sɔ Yesu ba'ahɛ te a dɔɔra doone na la, te saŋgbanɛ yo'ɛ te a nyɛ' te Yenɛ Sea sigera a zuo na, wo dayene la. 17Te koŋkore ze'ele saŋgbanɛ la poan na yeti, Mam dayɔba'arɛ te mam nintegɛ. N tare popeelom la en.

will be added

X\