Amatie 28

1Vo'ohogo Daarɛ la n daa tole la yiimbeere Alaherɛ daarɛ bolika yu'uŋyu'uŋɔ, te Mari Magdalene la Mari ayema la daa ihege keŋɛ te ba ta behɛ yɔɔ la. 2Teŋa n miim, te Na'ayenɛ soŋora ze'ele saazuo sige na bilige taŋa la lebe kenkɛleŋa ge zin'ire de zuo. 3Soŋora la ane wo saa n nyagere la ge te a futopelege yere yere. 4Sɛba n gure yɔɔ la n nyɛ' soŋora la, dabeem n kɛn' ba, te ba gbe'era ge ana wo ba ki' me la. 5Te soŋora la yele pɔgɔhe la yeti, Da zɔ' ya dabeem te mam mi' te ya eere la Yesu se'em te ba daa kpa' punpuuredɔɔ zuo la. 6A ka bo kalam. A vo'e mɛ ihege wo a daa yele se'em la. Wa'an ya na behɛ zen'an te ba daa laɛ en ge 7nya keŋɛ ya kalam ta yele a dɔlɔba la te a vo'e ihege a kum la poan gee tole nɛŋa yɛ'a Galilee teŋa poan. Bilam te ya wan nyɛ' en. Te n yele ya wa. 8Te pɔgɔhe la bahɛ yɔɔ la. Dabeem n tare ba ge te ba poore me pee te ba kanbela yɛ'a te ba yele a dɔlɔba la. 9Bilam bilam te Yesu to'ohe po'ohɛ ba. Pɔgɔhe la dɔnbelɛ teŋa kalom a na'ma na'ahe en. 10Yesu nya yele ba yeti, Da zɔ' ya dabeem. Keŋɛ ya ta yele n dɔlɔba la te ba kena Galilee teŋa poan ge ba wan nyɛ' mam bilam. 11Pɔgɔhe la n daa boe sore la zuo yɛ'a la, sɛba n daa gure yɔɔ la basɛba keŋɛ teŋa la poan ta yele malema keendoma la sɛla woo n eŋɛ la. 12Malema keendoma la n nyɛ' kpɛ'ɛndoma la eŋɛ la potɛn'ɛrɛ deyema, ba bo guruba la ligiri kekeko, 13ge yele ba yeti, Ta yele ya te yu'uŋɔ te tomam gan'an ginha te Yesu dɔlɔba la wa'ana zun' kum la. 14Yele dena han paɛ Naba la zen'en, to wan nyɛ' en te la ze'ele ge te to kan dekɛ ya eŋɛ yele poan. 15Te guruba la to'e ligiri la eŋɛ sɛla woo te ba yele ba te ba eŋɛ la. Ge ba dekɛ yele dena wa yeregɛ bo Yudoma bala ma'an ha wa paɛ zina. 16Te dɔlɔba pia la ayema la keŋɛ Galilee teŋa zoore la zuo, zen'an te Yesu yeti ba keŋɛ la. 17Ban nyɛ' en la, ba daa na'ahe en ge te basɛba tɛn'ɛha boyi' boyi'. 18Yesu nya keŋɛ ba zen'en ta yele ba yeti, Yenɛ dekɛ paŋa woo n boe saazuo la teŋa wa zuo bo la mam. 19Bala la, keŋɛ ya teŋhe woo la bahɛ te nɛreba doohe mam. Tara n Sɔ' la yu'urɛ, la mam Dayɔa la yu'urɛ, la Na'ayenɛ Sea la yu'urɛ sɔɔra ba ko'om. 20Pa'ala ba te ba nana sɛla woo te mam yele ya la. Ge n wan seren bɔna la ya daarɛ woo gura teŋa wa ba'ahegɔ.

will be added

X\