Amatie 23

1Yesu nya yele nɛrekooŋɔ la la a dɔlɔba la yeti, 2Pa'alegɔ pa'aleba la Pariseedoma la zin' la Moses koka zuo. 3Bala, nane ya ba nɔya ge eta sɛla woo te ba yeti ya eta. Ge da tɔgɔhe ya eta bama n ete sɛla woo la. Se'ere n sɔe la, ba ka ete ban pa'ale sɛla la. 4Ba ne bobe la zeero n tebegɛ to' nɛreba ge bama mɛhe ka bote ba dekɛ nu'dibila soŋe zi zeero la. 5Ban ete sɛla woo la, ba ete te nɛreba n nyɛta. Se'ere n sɔe la, ba ne pɛ' ba nu'uhe danlehom sanba la kanrege mɛ te golehegɔ bɔna bini, ge te danlehom sanba se'a n yule ba futo zotehen la wɔgɛ. 6Ba nɔŋɛ la zen'se'ehe n de na'ahegɔ zen'an, te nɛreba na'aha ba de'enɔ poan, ge te ba zin'an na'ahegɔ kogose'ehe n boe zamehegɔ yiya poan la. 7Ba nɔŋɛ la nɛreba dɔnbeta po'oha ba da'ahe zen'en, ge bɔta te ba yi'ira ba Naa. 8Ge da sakɛ te ba yi'ira ya Naa. Se'ere n sɔe la, ya tare la Daana ayena ma'an, ge yamam le dɛna sɔɔnrɔ la taaba. 9Da yi'ire ya se'em n boe teŋa wa zuo ya sɔ. Se'ere n sɔe la, ya tare Sɔ' ayena ma'an ge enŋa boe la saazuo ha. 10Bii da sakɛ ba yi'ira ya pa'ala. Se'ere n sɔe la, ya tare la Pa'ala ayema ma'an. A me dela Krista. 11Se'em ya poan n gane zan'an la, enŋa dɛna ya yameŋa. 12Se'em n zɛnkere a mea, Yenɛ wan sirihe en. Te se'em me n ka zɛnkere a mea, Na'ayenɛ wan tee zɛnkɛ en. 13Pa'alegɔ pa'aleba la Pariseedoma, yɛla bo ya zuto, birikɔgɔdoma wa! Ya ka bote ya bahɛ te nɛreba kɛn' saazuo sɔ'ɔlom la poan. Ya mɛhe kan kɛn' ya me kan bahɛ te sɛba n zegere te ba kɛn' la kɛn'. 14Pa'alegɔ pa'aleba la Pariseedoma, yɛla bo ya zuto, birikɔgɔdoma wa! Yamam n faanre pɔkɔnpa yiya ge parom po'oha po'ohowogoro. Bala zuo, ya wan nyɛ' namehe kantɛ. 15Pa'alegɔ pa'aleba la Pariseedoma, yɛla bo ya zuto, birikɔgɔdoma wa! Ya kanbɛ suunre keŋɛ zen'an kayema te ya nyaŋɛ nɛra ayema ma'an te a dɔla ya. Ya han nyaŋɛ en te a dɔla ya, ya ne eŋɛ en te a de'a be'emdaana gana yamam n an se'em la. 16Yamam n de fɔɔhe ge vɛ'ɛra fɔɔhe la, ya tare yɛla! Ya yeti te se'em han pɔ' Yenɛ Yire la la ka tare yele, ge se'em n pɔ' Yenɛ Yire la sanlema la pɔtɛ la dole en mɛ. 17Fɔgɔɔnɔ wa! La dene n gane? Sanlema la bii Yenɛ Yire la n bahɛ te sanlema la dɛna toolom bonɔ? 18Ya le yeti te se'em han pɔ' kaanbegɔ daka la ka tare yele ge se'em han pɔ' bo'olom la te ba dekɛ pagalɛ daka la zuo la pɔtɛ la dole en mɛ. 19Fɔɔhe wa! La dene n gane? Bo'olom la bii daka la n bahɛ te bo'olom la dɛna toolom bonɔ? 20Bala, se'em woo n pɔ' daka la pɔ' la sɛla woo n boe la zuo la. 21Se'em me n pɔ' Yenɛ Yire la pɔ' la se'em n boe yire la poan la. 22Se'em me han pɔ' saazuo pɔ' la Na'ayenɛ na'am gɔŋɔ la la se'em n zin' ko zuo la. 23Pa'alegɔ pa'aleba la Pariseedoma, yɛla bo ya zuto, birikɔgɔdoma wa! Ya ne nyaŋɛ mɛ yehe ya zɛɛnrɔ lɔkɔ woo koyena pia poan bo Yenɛ. Ge ya ton zagahɛ ninmɔ'ɔrɛ yɛla la n boe pa'alegɔ la poan: yelemɛŋɛrɛ la ninbɔn'zɔrɛ la birikinte. La dela ya eŋɛ ne yele ana wa ge da zagahɛ yele dena wa deyena mɛ 24Ya dela fɔɔhe ge vɛ'ɛra fɔɔhe la! Ya tobehe la zun'an bahɛ ge vole yɔgɔnɛ. 25Pa'alegɔ pa'aleba la Pariseedoma, yɛla bo ya zuto, birikɔgɔdoma wa! Ya ton pee la ya wama la laahe yeŋa ge poan dela nyika la ponya'anɛ. 26Parisee, fɔɔhe wa! Ne pee ya ko'wanɛ la laa poan yia ge nya pee yeŋa la me. 27Pa'alegɔ pa'aleba la Pariseedoma, yɛla bo ya zuto, birikɔgɔdoma wa! Ya ane wo yɔɔ te ba mɛ' takɛ te ko yeŋa ana soŋa ge te nɛreba kɔnba la dɛngerɔ perɛ ko poan la. 28Bala mea nɔɔ, yeŋa ya ane wo tontɔɔdoma la ge ya pooren ya tare la birikɔgɔtooma la be'em. 29Pa'alegɔ pa'aleba la Pariseedoma, yɛla bo ya zuto, birikɔgɔdoma wa! Ya mɛ' yɔɔrɔ bo nɔtɔgɔheba ge golɛ tontɔɔdoma yɔɔrɔ 30ge yeti, to han daa bone to yaabdoma saŋa la, to daa kan lagom naɛ ne la ba ko' nɔtɔgɔheba la. 31Bala, te ya mi te ya sɔdoma n de sɛba n ko' nɔtɔgɔheba la. 32Tone ya yaabdoma n daa tone sɛla la ba'ahɛ. 33Bonsɛ'doma wa! Bonsɛ'doma kɔma wa! Ya wan eŋɛ la wane ta ta'an le'ehɛ namehegɔ gankerɛ daarɛ? 34Bala, n wan bahɛ te nɔtɔgɔheba la yamdoma la pa'ala la wa'an ya zen'en na. Ya wan ko' basɛba ge kpa' basɛba punpuuredɔɔ zuo ge ŋmɛ' basɛba zamehegɔ yiya ge dige basɛba te ba zɔ' lomehe teŋhe sese'ehe. 35Tontɔɔdoma la woo te ya ko' la taala boe la ya zuto, pɔhɛ Abel wa'ana paɛ Barakiah dayɔa Zekaria se'em te ya daa ko' Yenɛ Yire la kaanbegɔ daka la teŋasoka la. 36N yeti ya la yelemɛŋɛrɛ te nɛrebana wa ko'a la taala wan bɔna zina nɛreba wa zuto. 37Yerusalem, Yerusalem, ya n ko' nɔtɔgɔheba la ge lobe sɛba te Yenɛ daa tom la. Mam ne bɔta te n lagahɛ ya kɔma wo nɔya'aŋa n ne lagahɛ a kɔma umene a kunkpahɛ poan se'em la ge te ya ka sakera. 38Behɛ, ho yire wa lebege dabooro. 39Mam yeti nananawa ya kan le nyɛ' mam gura ya ta yeti, Kan'an boe mɛ la se'em n dekɛ Na'ayenɛ yu'urɛ la wa'ana la.

will be added

X\