Amatie 2

1Ba daa dɔgɛ Yesu la Betlehem teŋa n boe Yudea teŋa poan, se'em ma'an te Herod daa dɛna naba la. La daa po'e la fiin wa, te yamdoma n zamehe ŋmarebibihe mina la, ze'ele dapɔya keŋɛ Yerusalem teŋa poan, 2ta soke nɛreba yeti, Bia la te ba dɔgɛ te ka yeti ka dɛna Yudoma naba la bɛɛ? To nyɛ' la a ŋmarebila dapoore nya wa'ana te to na'ahe en. 3Naba Herod n ta wom dena wa, la daam enŋa la Yerusalem teŋa nɛreba zan'an. 4Te naba la yi' malema keendoma la sɛba n pa'alɛ Pa'alegɔ la lagahɛ soke ba yeti, Ya baŋɛ zen'an te ba yeti ba dɔgɛ se'em te Na'ayenɛ loe la? 5Te ba lebehe yele en yeti, Ɛɛn, ba yeti ba dɔgɛ en la Betlehem teŋa n boe Yudea teŋa poan. Na'ayenɛ nɔtɔgɔha la daa golehe yeti, 6ge hom Betlehem n boe Yuda teŋa poan. Ho kan dɛna napika Yuda nadoma la woo poan. Se'ere n sɔe la, se'em n yeti a dɛna Israeldoma zan'an Naba wan yehe ho poan na. 7Te Naba Herod nya yi' yamdoma la n ze'ele dapɔya bɔba na la baanlam ta soke ba te ba pa'alɛ en se'em ma'an te ŋmarebila la yehe. Te ba yele en. 8Te a nya bahɛ ba te ba keŋɛ Betlehem teŋa poan ge yele ba yeti, Keŋɛ ya ta ɛ bia la. Ya han nyɛ' en, wa'an ya na yele mam, te n me keŋɛ ta na'ahe en. 9Ba la n daa kelehe ba'ahɛ la, ba bahɛ naba la mɛ ge kena dɔla ŋmarebilisɛka te ba nyɛ' dapɔya bɔba la. Ban nyɛ' ŋmarebila wa, ka daa kene mɛ te ba dɔla te ka ta ze'ele zen'an te bia la bɔna la. 10Ŋmarebila la n daa ze'ele te ba nyɛ' la ba poorɛ daa pee mɛ. 11Ban daa paɛ yire la, ba kɛn' nya nyɛ' bia la la a ma Mari, te ba la dɔnbelɛ teŋa na'ahe en. Ba tare la ba bo'olom te ba bo en, nya ya'ɛ ba tapɔtɔ foe sanlema la digilom la kaam n tare nyuŋo soŋɔ bo en. 12Ba daa bote ba kule mɛ, te Na'ayenɛ yele ba, ba zaanheŋɔ poan te ba da lebe naba la zen'en te ba doohe sore deyema lebe ba teŋa. 13Ban daa kule la te Na'ayenɛ soŋora yele Yosef a zaanheŋɔ poan yeti, Ihege la ho tare bia la la ka ma la keŋɛ Egipt teŋa poan la ho ta bɔna bilam te n han ta yele ho te ho lebena ho lebena. Se'ere n sɔe la Herod wan ɛ bia la ko' en. 14Te Yosef ihege yu'uŋɔ tare bia la la a ma keŋɛ Egipt teŋa poan nya ta bɔna bilam. 15A daa bo la bilam te Herod daa wa ki'. Wana wa daa eŋɛ te la pa'alɛ la Na'ayenɛ n tɔgɛ se'em bo a nɔtɔgɔha la te la de sera. La yeti, Mam yi n dayɔa wa ze'ele Mizraim poan yehe na. 16Herod n daa wa baŋɛ te ba la pan'ahɛ en mɛ la, a sunsunya n nyie te a tom nɛreba te ba keŋɛ Betlehem la teŋse'ehe n lɛm bilam la, te ba ta ko' bodibinto seto n ka gaŋɛ yuuma ayi'. A eŋɛ wana wa la yɛhera la enŋa n baŋɛ se'ere ŋmarebila la yɛhega poan la. 17Wana wa poan Na'ayenɛ nɔtɔgɔha Yeremia n daa tɔgɛ se'em la daa dela sera: 18Sunsagaŋɔ kaahega n kaahere Aramah teŋa poan baha na. Fabelegɔ la koonɔ n ka malom gɔ'ɔra. Arakel n kele a kɔma zuo te ba pan'ahɛ n koŋe. Se'ere n sɔe la a kɔma la ka boe. 19Herod n daa ta ki' la te Na'ayenɛ soŋora lilige a mɛŋa Yosef zaanheŋɔ poan Egipt teŋa poan, 20yele en yeti, Ihege la ho tare bia la, la ka ma la lebe Israel teŋa poan, ge sɛba n daa zegere te ba ko' bia la ki' ya. 21Te Yosef ihege tare bia la la ka ma la lebe Israel teŋa poan. 22Yosef n daa wom te Arkelaus n sɔe a sɔ na'am gɔŋɔ la, te a dɛna Yudea teŋa naba la, dabeem kɛn' en la a keŋɛ. Na'ayenɛ n ka'an en a zaanheŋɔ poan, bala te a ton keŋɛ Galilee teŋa poan. 23A daa keŋɛ ta kɛn'ɛra la Nazaret teŋa poan. Bala, sɛla te nɔtɔgɔheba la daa yele la wa'an sera na te ba wan yi'ira en Nazaret nɛra.

will be added

X\