Amatie 14

1Bala ma'an la Herod n de naba n daa behere Galilee teŋa. A daa wa wom Yesu yele 2nya yele a nɛreba yeti, Boraa kana dela Yon Ko'sɔɔra la n vo'e a kum poan! Bala n sɔe te yelekerehe sena tona la en wa. 3Te Herod pon daa nyɔkɛ Yon pagɛ mɛ, a yebega Filip pɔga Herodias zuo. 4A daa di' pɔka la mɛ te Yon daa yele en yeti, La ka nare te ho di' ho yebega pɔga. 5Herod daa bɔta te a ko' Yon. Ge te a zɔta nɛreba la dabeem, ba daa dekɛ Yon yi' la Na'ayenɛ nɔtɔgɔha la zuo. 6Herod dɔgɔm daarɛ de'eŋɔ la te Herodias pɔyɔa daa wa' te la pee Herod poorɛ, 7te a pɔ' te pugula la n soke en sɛla woo yele a wan bo en. 8Pugula la ma yele ka te a yeti, Mam bote ho dekɛ la Yon Ko'sɔɔra la zuo eŋɛ laa poan bo mam kalom. 9La ka eŋɛ naba la suunre nyɛlom ge n pɔrɛ la la saama la zuo, a yeti ba bo en n bote sɛla la. 10Te ba keŋɛ pakadeen la ta fike Yon zuo la 11ge dekɛ zuo la eŋɛ la laa poan ta bo pugula la te ka to'e ta bo a ma. 12Yon dɔlɔba la keŋɛ ta dekɛ kum la ta laɛ, ge keŋɛ ta yele Yesu. 13Yesu n daa ta wom sɛla n eŋɛ la, a dekɛ la ɔɔnrɔŋɔ yakɛ mɔgɔrɛ la nya keŋɛ pɔgɔtia poan a ma'an. Nɛreba kekeko wom dena wa, nya yehe ba teŋhe poan zɔ' la na'ma paɛ mɔgɔrɛ nɔgbenɛ. 14Yesu n ze'ele ɔɔnrɔŋɔ la poan sigera na, a nyɛ' nɛrekooŋɔ wa zɔ' ba ninbɔn'ɔn ge tebɛ ba ban'ahedoma la. 15Yene n daa ma'ɛn te a dɔlɔba la keŋɛ a zen'en ta yele en yeti, Kalam wa dela pɔgɔtia poan, ge te yenɛ me luta. Bahɛ te nɛreba la keŋɛ teŋhe poan ta da' dia di'. 16Te Yesu lebehe yele ba yeti, Mam kan yele ba te ba keŋɛ. Yamam bo ba sɛla te ba di'. 17Te ba lebehe yeti, To tare la boroboro banuu la zim iyi' ma'an kalam. 18Te a yeti, Tare ya ba na bo mam. 19Ge te a pa'ale nɛreba la te ba zin'ire teŋa. A dekɛ boroboro banuu la la zim iyi' la nya behɛ saazuo ge bo Na'ayenɛ fara ge gɛn'ɛnhɛ boroboro la nya dekɛ bo a dɔlɔba la te ba tɔnrɛ nɛreba la. 20Ba zan'an di' tegɛ gee te dɔlɔba la pin'ihe sɛla n gee la perɛ pitɔ pia la toyi'. 21Sɛba zan'an n di' la dela boraahe tuha anuu, ge pɔgɔhe la kɔma pa'ahɛ. 22La ka yue te Yesu daa bahɛ te a dɔlɔba la dekɛ ɔɔnrɔŋɔ tole a nɛŋa te ba yakɛ yaken dena la ge te enŋa leen keehe nɛrekooŋɔ la. 23N daa keehe ba la, a zom la zoore zuo a ma'an te a ta sohɛ Na'ayenɛ. Zaanɔɔrɛ n paɛ te a kelom bɔna bilam a ma'an. 24Ge ɔɔnrɔŋɔ la, te a dɔlɔba la n daa kɛn' bɔna ko'om la teŋasoka, te sabeeo lɔbera to'oha ba ge te ko'mi'inhe ŋmɛ'ɛra ɔɔnrɔŋɔ la te a dɔlɔba la zegera ban wan eŋɛ se'em yakɛ. 25Beyiine te Yesu daa bɔna ko'om la zuo kena yɛ'a ba zen'en. 26A dɔlɔba la n nyɛ' en kene ko'om la zuo la, dabeem n kɛn' ba, te ba kaahɛ dabeem kaahega ge yeti, A dela kɔkɔ. 27Te Yesu kaanbelɛ yele ba yeti, Kaanbɛ ya sunya te la dela mam. Da zɔ' ya dabeem. 28Te Peter lebehe yeti, N Daana, la han seren de'a la hom, yele mam te n ihege ko'om wa zuo keŋɛ wa'an ho zen'en na. 29Te Yesu yele en yeti, Wa'ana. Te Peter ihege ɔɔnrɔŋɔ la poan sige ko'om la zuo kena yɛ'a Yesu zen'en. 30Ge en nyɛ' sabeeo la, dabeem kɛn' en te a muhura ge kaaha yeti, N Daana, fan' mam bahɛ. 31Bilam bilam te Yesu paɛ gin' en ge yele en yeti, Ho sakerɛ pɔ'ɛ ya! Wane te ho tɛn'ɛha boyi' boyi'? 32Te ban kɛn' ɔɔnrɔŋɔ la poan, sabeeo la go'e. 33Te bama n boe ɔɔnrɔŋɔ la poan la na'ahe en ge yɛta yeti, Ho seren dela Na'ayenɛ Dayɔa. 34Ban daa yakɛ yaken dena la, ba sige la Genesaret teŋa poan. 35Te teŋa la nɛreba n nyɛ' en ge baŋɛ en, ba nya soolom te teŋhe woo nɛreba tare ba ban'ahedoma wa'an a zen'en. 36Ba daa belom en te a bahɛ te ban'ahedoma la kalom a fuo la kenkɛleŋa, te sɛba woo n daa kalom en la ban'ahe daa bahɛ ba.

will be added

X\