Amatie 11

1Yesu n daa ta tɔgɛ la a dɔlɔba la pia la bayi' la ba'ahɛ la, a bahɛ bilam mɛ ge keŋɛ Galilee teŋhe poan ta pa'ala ge mɔɔla. 2Yon n daa boe la pakadeen ge wona sɛla te Krista eta la, a tom a dɔlɔba 3la te ba ta soke en yeti, Hom n de se'em te ba yeti ho wan wa'ana la bii to gura ayema ha? 4Te Yesu lebehe yeti, Lebe ya la ya ta yele Yon yan wa wom ge nyɛ' sɛla la. 5Fɔɔhe nyɛte, te kɔɔrɔnɔ tana kena, te konkɔma ban'ahe bahɛ, te wahe wona, te kum vo'e ge te ba tɔgɛ yelesoma bo nahadoma. 6Popeelom wan bɔna la nɛra se'em n ka tɛn'ɛhe mam yele boyi' boyi'. 7Te Yon dɔlɔba n ye' lɛbera la, Yesu daa pɔhɛ tɔgɔra Yon yɛla bɔ'ɔra nɛrekooŋɔ la yeti, Bem te ya yehe pɔgɔtia la poan te ya behɛ? Ya yehe te ya behɛ la pɔgɔtia te sabeeo lɔbera? 8Han dagana bala, ya yehe ta beha la bem? Ya yehe te ya behɛ la boraa nyɛ' fusonɔ? Aai, sɛba n yɛ' fusonɔ bo la naba yire. 9Ge ya yehe te ya behɛ la bem? Te ya behɛ nɔtɔgɔha? Ɛɛn, n yeti ya te ya daa nyɛ' se'em n gane nɔtɔgɔha. 10Enŋa n de e'em te ba golehɛ yeti, Behɛ ya, n wan tom n bitonoŋa te ka bɔna ho nɛŋa ta maala sore biŋera ho. 11N yeti ya la yelemɛŋɛrɛ te bia woo te pɔgɔhe dɔgɛ, ayema ka bo bini ihege gana Yon Ko'sɔɔra la, ge se'em n de nɛrepeka saazuo sɔ'ɔlom la poan gane en. 12Se'em ma'an te Yon Ko'sɔɔra bɔna pɔgɔtia poan mɔɔla la, wa paɛ zina wa, saazuo sɔ'ɔlom la daa nyɛ' la gbirigere zaberɛ te sɛba n gbiti zegera te ba nyaŋɛ bɔ la pɛnregerɛ. 13Nɔtɔgɔheba la Pa'alegɔ la woo daa porɛ mɛ ge te Yon nya wa'ana. 14Te ya sɛba n bote te ya to'e ka, ya wan baŋɛ te Yon dela Eliya se'em te ba yeti a wa'ana la. 15Ya sɛba n tare toba kɛleha, kelehe ya. 16N wan yeti nɛrebana wa ane mɛ wo bem? Ba an wo kɔma n zin' da'a zen'en ge yi'ira ba taaba yeti, 17To ŋmɛ' duureŋa te ya ka wa', ge te to le sakɛ koorɛ sakerɛ te ya ka kɔkɛ. 18Yon n daa wa'ana, a daa zagahɛ a mɛŋa ge ka nyuura daam, te ba yɛta te bonbɛ'ɛhe n dole en. 19Te Asaala Dayɔa wa'ana dita ge nyuura, te ba yeti mam dela diiha la daamnyuura ge dena koba tɔ'ɔhɔba la be'emdoma zɔ'. Nɛra tooma poan n bahɛ te ba baŋera te a dela yamdaana. 20Te Yesu pɔhɛ tɔgɔra teŋse'ehe nɛreba yɛla te a eŋɛ a yelekerehe gana zen'an woo la, ba ka tee ba potɛn'ɛra la zuo. 21Korazindoma, namehegɔ wan bɔna ya zen'en. Betsaidadoma, namehegɔ wan bɔna ya zen'en. Yelekerehe wa han ton ne bo la Tire la Sidon teŋhe wo lan ton bo yamam se'em wa, wana ma'an ba pon yɛ' ne sunsagaŋɔ futo ge eŋɛ tampegelom puke ba mɛhe pa'alɛ te ba tee ba potɛn'ɛra. 22Ge mam yeti gankerɛ daarɛ ninbɔn'ɔn wan bɔna bo Tire la Sidon teŋhe nɛreba nyana yamam. 23Kapernaumdoma, yamam me, ya bote ya zɛnkɛ ya mɛhe saazuo? Ya wam sige namehegɔ zen'en la. Yelekerese'ehe n tom bo ya wa daa han ton ne boe la Sodom teŋa, ka wan kelom boe ne paɛ zina wa. 24Ge n yeti ya me te gankerɛ daarɛ ninbɔn'ɔn wan ta bɔna la Sodom nyana yamam. 25Bala ma'an te Yesu yeti, N Sɔ', saazuo la teŋa Daana, n pɛngere hɔ. Se'ere n sɔe, hon dekɛ wana wa woo sogɛ yamdoma la zamehɛdoma la zen'en ge dekɛ dɛ nɛɛ bo kɔma. 26Ɛɛn, n Sɔ', wana wa dela ho mɛŋa som n bote se'em. 27N Sɔ' daa dekɛ sɛla woo eŋɛ la mam nu'uhen. Se'em me ka mi' mam a Dayɔa la, han dagana n Sɔ' la ma'an. Se'em me ka mi' n Sɔ' la, han dagɛna a Dayɔa la sɛba te a bɔta te a lilige Sɔ' la bo ba. 28Ya sɛba woo n tom gee zi' tebehegɔ taregɛ, wa'an ya n zen'en na ge n wan bo ya vo'ohogo. 29Dekɛ ya n yɔka yɔgɛ ya mɛhe ge zamehe ya sɛla n zen'en. Se'ere n sɔe la mam dela nɛremama ana baanlam ge sigehe n mɛŋa n suunre poan. Ya han wa'an n zen'en na, ya wan nyɛ' vo'ohogo. 30Se'ere n sɔe la, mam yɔka la ka tɔe, mam zeero me ka tebegɛ.

will be added

X\