Amarkɩ 7

1Pariseedoma la pa'alegɔ pa'aleba la n ze'ele Yerusalem teŋa wa'ana la daa lagahɛ la Yesu zen'en, 2ge nyɛ' te a dɔlɔba la basɛba dita ge ka peere ba nu'uhen dɔla ba malema. 3Pariseedoma la Yudoma la zan'an kan malom di', ba han ka pee nu'uhen woo ba yaabdoma n daa ete se'em la. 4Ban ze'ele da'a kule na ge ka sɔ' ba iinhe, ba kan malom di'. Malema kekeko te ba daa eta wɔna wo wama la dogorɔ la laahe peere la. 5Te Pariseedoma la pa'alegɔ pa'aleba la soke Yesu yeti, Wane te ho dɔlɔba la ka dɔla to yaabdoma etegɔ la ge dita nu'dɛngerɔ? 6Te a lebehe ba yeti, Nɔtɔgɔha Isaiah daa tare boorɔ la n daa yele yamam birikɔgɔdoma wa yele. A daa golehe yeti, Nɛrebana na'aha mam la ba nɔya ma'an, ge ba suunre zaan mɛ la mam. 7Ba zoolom la te zɔta mam la dela asaala ze'elego te ba zamehɛ. 8Ya bahɛ la Yenɛ pa'alegɔ ge dɔla saaleba pa'alegɔ. 9A le yeti, Ya mi mɛ ge bahɛ Yenɛ pa'alegɔ ge dɔla ya mɛhe malema. 10Bala mea te Moses daa yeti, Na'aha ho sɔ, la ho ma, la Se'em n pɔ nɔɔrɛ bahɛ a ma, bii sɔ zuo, ko ya en. 11Ge yamam yeti, te nɛra han yele a sɔ bii a ma yeti, Soŋse'ere woo te n wan soŋɛ ne ho la, la dela sɛla te n wan dekɛ bo Na'ayenɛ. 12Bala, soŋse'ere te ya kan soŋɛ ya sɔdoma bii ya madoma n bala. 13Bala, ya mɛhe malema wa zuo te ya bahɛ te Yenɛ yelehom la ka tara vɔnrɛ, ge te yɛla a se'a zo'e bɔna ana bala te ya eta. 14Te Yesu le yi' nɛrekooŋɔ te ba wa'an a zen'en na nya yele ba yeti, Ya zan'an kelehe ya soŋa soŋa la ya baŋɛ dena wa. 15Sɛla n ze'ete yeŋa kɛn'ɛra nɛra pooren kan ta'an bahɛ te a ganlom. Ge, la dela sɛla n ze'ele nɛra pooren yɛhera na n bahɛ te a ganlona. 16Se'em n tare toba, la sontii a kɛleha. 17En daa ta bahɛ nɛrekooŋɔ la ge kɛn' yire poan, te a dɔlɔba la soke en makerɛ la vɔnrɛ. 18A soke ba yeti, Yamam me ya ka tare yam? N bote ya baŋɛ te sɛla n ze'ete yeŋa kɛn'ɛra nɛra poan kan ta'an bahɛ te a ganlona. 19Ben zuo, la ka kɛn'ɛre nɛra potɛn'ɛrɛ poan ge la kɛn'ɛre la a pooren nya yɛhena. Wana wa pa'ale te Yesu pa'ale te dia ka tare ganleŋɔ. 20Ge a le yeti, Sɛla n ze'ete nɛra poan yɛha na la ne n bahɛ te a ganlona. 21Sɛla n sɔe, te sɛla n boe nɛra suunre poan bahɛ te nɛra la tɛn'ɛha tɛn'ɛhɛyooro la yaalegɔ la zunwa la nɛreko'a la yalomtooma 22la nyika la be'em la pan'ahegɔ la dɛngerɔtooma la nini tɛnrega la yu'urɛ sagaŋɔ la pa'ale mɛŋa la gɔɔntooma. 23Toombe'tona wa zan'an ze'ete la nɛra poan yɛha na te a ganlona. 24Te Yesu daa nya ihege keŋɛ Tire la Sidon teŋhe poan nya kɛn' yire poan ge ka bɔta te nɛra baŋɛ. Ge a daa sogɛ koŋɛ mɛ. 25Te pɔka kayema tare a pɔyɔa te bonbe'a yagɛ a zuo. N wom Yesu yele wa, a daa wa'an me na nya dɔnbelɛ a nɛŋan. 26Pɔka la dagɛ Yudoma pɔka, ge dela Greek teŋa pɔka, ge ba daa dɔgɛ en la Siria Poenisia teŋa poan. Te ka belom Yesu te a sa'ɛ bonbe'a la n yagɛ a pɔyɔa zuo la. 27Te Yesu yele en yeti, Bahɛ te kɔma di' tegɛ yia. Se'ere n sɔe la la ka an soŋa te ba to'e kɔma dia bo baahe. 28Pɔka la lebehe en yeti, Ɛɛn, n Daana, ge baahe gan' mɛ gura te ba di' kɔma disɛka n zɔngɛ teŋa la. 29Yesu nya yele en yeti, Hon lebehe yele se'em wa zuo, keŋɛ ge bonbe'a la bahɛ ho pɔyɔa la. 30Te pɔka la ta paɛ yire nyɛ' te bia la gan' gɔrɔgɔ zuo ge te bonbe'a la pon bahɛ en. 31Bala ma'an, te Yesu daa ze'ele Tire teŋa doohe Sidon teŋa gaŋɛ Galilee Mɔgɔrɛ ge paɛ Teŋhe Pia. 32Bilam te nɛreba basɛba tare boraa kayema n de waŋa ge dɛna gɔɔŋɔ keŋɛ a zen'en, ta belom en te a dekɛ a nu'o pagalɛ a zuo. 33Yesu n tare en ma'an lebe kenkɛleŋa ge bahɛ nɛrekooŋɔ la, ta dekɛ a nu'dibilihe tuhe boraa la toba poan ge tobehɛ nɔtɔɔnrom ge kalom boraa la zɛleŋa. 34A gorege behɛ saazuo ge vo'ohe yeti, Epata. La vɔnrɛ dela, Yo'ɛ. 35Te boraa la toba la yo'ɛ ge te a zɛleŋa la me lorege te a tɔgɔra te la yɛhera. 36Yesu kan'an ba te ba da yele nɛreba. Ge n daa yele wana wa, ba maan dekɛ dɛ tɔgɛ gaŋɛ bala mɛ. 37Te la eŋɛ ba pakerɛ te ba yeti, Sɛla woo te a eta la, ane soŋa. A eŋɛ waŋa te a wona gee enŋ gɔɔŋɔ me te a tana tɔgɔra.

will be added

X\