Amarkɩ 6

1Yesu daa bahɛ bilam ge keŋɛ a mɛŋa teŋa poan te a dɔlɔba la doohe en. 2Vo'ohogo Daarɛ n ta paɛ la, a pin'ilom pa'ala zamehegɔ yire poan te nɛreba kekeko daa wom te la eŋɛ ba pakerɛ. Te ba yeti, Boraa kana nyɛ' wana wa zan'an la bɛ? Ge a nyɛ' yambomo la bɛ? A eŋɛ la wane tana eta yelekerehe wa? 3Dagɛ boraa kana n de mɛta la? A dagɛ la Mari bia? Te a yebehe dɛna Yames la Yosef la Yudas la Simon. Dagɛ a tanpa n lagom bɔna kalam wa? Ba zagahɛ se'em n bala. 4Yesu yele ba yeti, Nɔtɔgɔha ka tare na'ahegɔ a mɛŋa teŋa poan, la a mea nɛreba zen'en, la a mea yire poan. 5A ka ta'an tom yelekerehe bilam, han dagɛna a daa dekɛ la a nu'uhe pagalɛ ban'ahedoma fiin wa zuto te ba ban'ahe la daa bahɛ ba. 6La daa eŋɛ en pakerɛ, ba daa ka sakɛ bo en la zuo. Te Yesu bahɛ bilam, ge ɛɛra kaara teŋse'ehe poan pa'ala. 7A nya daa yi' Pia La Bayi' la tom ba bayi' bayi', ge bo ba paŋa te ba tara sa'aha bonbɛ'ɛhe. 8A yele ba yeti, Da dekɛ ya sɛsɛla keŋɛ ya sore la poan, han dagɛna dɔya ma'an. Da dekɛ ya dia, bii tapɔtɔ, bii ya dekɛ ligiri sun' ya funini poan, 9bii ya yɛ' dansigihe seyi'. Ge ya pire tagara. 10Ya han kɛn' yire poan, bone ya te ya bahega daarɛ paɛ te ya bahɛ teŋa la poan. 11Teŋsɛka han ka to'e ya bii ba ka kelehe ya mɛ, bahɛ ya zen'an la poan ge kpa'ahɛ ya puuhugo bahɛ ya bini te la dɛna danlehom bo ba. 12Ba yehe ta mɔɔla bɔ'ɔra nɛreba te ba teehom ba potɛn'ɛra. 13Ba sa'ahɛ bonbɛ'ɛhe kekeko ge sɔnra ban'ahedoma kekeko la kaam te ba tebɛ ba. 14Yesu yu'urɛ daa yehe la zen'an woo te Naba Herod daa wom n daa ete sɛla woo la yele. Te nɛreba basɛba daa yeti, Yon Ko'sɔɔra la n vo'e a kum poan. Se'ere n sɔe Yesu n daa ete yelekerehe. 15Ge te nɛreba basɛba me yeti, A dela Eliya. Te sɛba me yeti, A dela nɔtɔgɔha n ane wo nɔtɔgɔha sɛba n daa pon bɔna wonse'eren ha la. 16Ge, Herod la n wom dena wa, a yeti, Yon se'em te mam daa fike a zuo la vo'e mɛ. 17Herod la mea n daa bo sore te ba nyɔkɛ Yon pagɛ en pakadeen la. A eŋɛ bala Herodias, a yebega Filip pɔga zuo, pɔka la se'em te Herod la mea la daa di' ka mɛ. 18Te Yon daa yele naba la yeti, Ho tue ya. La ka ane soŋa te ho di' ho yebega pɔga la. 19Herodias la daa eŋɛ la sunsunya la Yon n yele se'em la zuo nya bɔta te a ko' en, ge daa ka nyaŋɛ 20Herod la daa zote Yon mɛ ge ka bahɛ te nɛreba kalena en la zuo. Se'ere n sɔe la a daa mi' te a dela nɛresoŋɔ la toolom nɛra. Herod daa ne han wom sɛla woo te Yon yele la, la daa ne daan en mɛ. Ge a daa ne bɔta te a kɛleha en la popeelom. 21Daarɛ deyema te pɔka la daa nyɛ' sore. Herod la dɔgɔm yuune n ta kae na te a eta de'eŋɔ bɔ'ɔra a nɛrekanreba la pɛɛntɛɛnreba kpɛ'ɛndoma la Galilee teŋa zuodoma. 22Te Herodias pɔyɔa kɛn' ta tole wa'. Herod la saama la poorɛ daa pee, te naba la daa yele pugula la yeti, Sɛla woo te ho bɔta n zen'en, yele te n wan bo ho. 23Ge te a me pɔ' yeti, Sɛla woo te ho soke mam, n wan bo ho, ho han bɔta n sɔ'ɔlom la posoka, n wan bo ho. 24Te pugula la doohe a ma zen'en ta soke en yeti, N ta yeti n bote la bem? Te a ma la lebehe en yeti, Yeti, ho bote la Yon Ko'sɔɔra la zuo. 25Te pugula la kanbelɛ kɛn' naba la zen'en ta yeti, Mam bote te ho dekɛ la Yon Ko'sɔɔra la zuo eŋɛ laapɛrega poan bo mam nananawa. 26Naba la suunre daa sagom mɛ. A me kan ta'an zagahɛ. Le yɛ'ɛha n daa pɔ' saama la nɛŋa la zuo. 27Bilam bilam, te naba la bo nɛra ayema nɔɔrɛ te a fike Yon zuo na. Te a keŋɛ ta fike a zuo la pakadeen la, 28dekɛ eŋɛ laapɛrega poan tana bo pugula la, te ka dekɛ bo a ma la. 29Yon dɔlɔba la n daa ta wom dena wa, ba wa'ana dekɛ iŋa la ta laɛ. 30Sɛba te Yesu daa tom te ba yehe ta mɔɔlɛ la daa lebe la a zen'en na yele en sɛla woo te ba daa eŋɛ ge pa'alɛ la. 31Nɛreba zo'e mɛ kena na ge lɛbera te ba ka ta'an di', te a yele ba yeti, Bahɛ ya te to ma'an keŋɛ pɔgɔtia poan ta vo'ohe fiin wa. 32Te ba ma'an kɛn' ɔɔnrɔŋɔ poan yakera mɔgɔrɛ te ba keŋɛ pɔgɔtia poan. 33Ban ye' la, nɛreba kekeko nyɛ' ba baŋɛ ba nya yehe teŋhe la woo poan zɔ' la na'ma paɛ ban yi' zen'an la yia. 34Yesu n ze'ele ɔɔnrɔŋɔ la poan sigera na ge nyɛ' nɛreba kekeko la, ninbɔn'ɔn nyɔkɛ en. Se'ere n sɔe la ba ane wo piihe n ka tare duŋkeena la. Te a le pa'ala ba yɛla kekeko. 35Lan daa ta paɛ zanɔɔrɛ la, a dɔlɔba la wa'an a zen'en na yele en yeti, Kala wa dela pɔgɔtia zen'an ge te yenɛ me luta. 36Bahɛ te nɛreba la keŋɛ yiya poan la dase'ehe n lɛm wa, la ba ta da' sɛla ba mɛhe di'. 37Ge Yesu lebehe ba yeti, Yamam bo ba sɛla te ba di'. Te ba yele en yeti, Bala wan dɛna la nɛra ayema ŋmarehe senii yɔɔrɛ. To keŋɛ ta sagom ligiri bala da' dia tare na bo ba te ba dii? 38A lebehe ba yeti, Dia bem te ya tara? Keŋɛ ya ta behɛ. Te ba keŋɛ ta behɛ ge yeti, Boroboro banuu la zim iyi'. 39Te a yele a dɔlɔba la te ba bahɛ te nɛreba la yelehe zin'irɛ teŋa. 40Te ba zin'ire pihinuu pihinuu, basɛba me kɔbega kɔbega. 41Te en dekɛ boroboro banuu la la zim iyi' la, a gorege bo Na'ayenɛ fara. Te a nya gɛn'ɛnhɛ boroboro la bo a dɔlɔba la te ba tɔnrɛ nɛreba la. Ge te a me figihe zim iyi' la tɔnrɛ ba. 42Te ba zan'an di' tegɛ. 43Ge te dɔlɔba la vaɛ boroboro la zim sɛba te ba di' ge gee la, te ba perɛ pitɔ pia la toyi' poan. 44Nɛresɛba n di' dia la daa dela boraahe tuha anuu. 45Bilam, te Yesu daa bahɛ te a dɔlɔba la kɛn' ɔɔnrɔŋɔ poan te ba tole nɛŋa ta yakɛ Betsaida teŋa poan, ge te a keehe nɛrekooŋɔ la. 46N nya keehe ba la, a nya zom la zoore zuo te a ta sohɛ Na'ayenɛ. 47Yu'uŋɔ n paɛ, te dɔlɔba la bɔna ɔɔnrɔŋɔ la poan ko'om la teŋasoka ge te Yesu ma'an bɔna doone. 48A nyɛ' te ba nameha mɛ la ba ɔɔnrɔŋɔ la mɛŋa. Se'ere n sɔe la sabeeo n lobere to'oha ba. Beyiine, te Yesu kena ko'om la zuo yɛ'a ba zen'an na. A bote a gaŋɛ ba bahɛ mɛ ge tole. 49Ge, ban nyɛ' en ta kena ko'om la zuo la, ba tɛn'ɛhe te ba nyɛ' la kɔkɔ. Te ba kaaha 50ba zan'an nyɛ' en te dabeem kɛn' ba la zuo. Bilam bilam, te a yele ba yeti, Tare ya sunkpe'ene ge la dela mam. Da zɔ' ya dabeem. 51Ge te a nya kɛn' ɔɔnrɔŋɔ la poan la ba, te sabeeo la go'e. Te la le eŋɛ ba pakerɛ, 52ba daa kelen ka baŋɛ boroboro la yele la vɔnrɛ la zuo. Ba ka ta'an bɔkɛ a. 53Ban daa yakɛ la, ba ze'ele la Genesaret teŋa poan sige na lo' ba ɔɔnrɔŋɔ la mɔgɔrɛ nɔgbenɛ. 54Ban sige ɔɔnrɔŋɔ la zuo la, nɛreba baŋɛ Yesu 55nya zɔ' kae teŋa la waabe ziira ban'ahedoma la sonɔ kena zen'an woo te ba wom te a boe. 56En boe zen'an woo, la han de teŋkanra woo boo teŋbibihe woo bii va'ame woo, ba ne tare ban'ahedoma yehe la da'ahe poan na. Ba nya belom Yesu te a bahɛ te ban'ahedoma la kalom a fuo ge sɛba woo n kalom a fuo la, ba ban'ahe bahɛ mɛ.

will be added

X\