Amarkɩ 3

1Daarɛ deyema Yesu daa kɛn' la zamehegɔ yire la poan. Ge te a nyɛ' boraa kayema te a nu'o daa ki'. 2Bilam te nɛreba basɛba daa ɛɛra sose'ere te ba wan ta'an sagom Yesu yu'urɛ te ba behera te a wan tebɛ en Vo'ohogo Daarɛ la bii a kan tebɛ, te ba ta'an zɛrɛgɛ en. 3Yesu yele boraa sɛka nu'o n ki' la yeti, Ihege wa'an n nɛŋa wa na. 4A nya soke nɛreba la yeti, La de ma'an te ho tom som bii be'em Vo'ohogo Daarɛ wa, ge ho to'e vom bahɛ, bii ho ko'? Te ba sina. 5Yesu poorɛ ka pee ge te a sunsunya nyie te a behɛ ba kae. A mi te bama la dela sunkanberɛdoma, te a yele ban'anra la yeti, Tɛɛn ho nu'o la. Te a tɛɛn kɔ, te ko eŋɛ som. 6Pariseedoma la nya yehe bilam bilam ta to'ohɛ Herodidoma nyɛ' taaba ban wan eŋɛ se'em nyaŋɛ ko' Yesu. 7Yesu la a dɔlɔba la daa lebe Galilee mɔgɔrɛ. Ge te Galilee teŋhe nɛrekooŋɔ daa doohe ba. Nɛreba n wom en eŋɛ sɛla woo, ba yehe Yudea 8la Yerusalem la Idumea la teŋse'ehe n boe Yordan kolaa yakenɛ la Tire la Sidon teŋhe keŋɛ a zen'en. 9Te nɛreba la zo'e gaŋɛ mɛ ge a ka bote ba mike en. Bala zuo, a daa yele a dɔlɔba la te ba maahom ɔɔnrɔŋɔ bo en. 10Se'ere n sɔe la, a daa tebɛ ban'ahedoma kekeko. Bala te sɛba n tare ban'ahe la mikera te ba kalom en. 11Bonbɛ'ɛhe la han ne nyɛ' en, ba ne lu' la a nɛŋan nyabera yeti, Ho dela Yenɛ Dayɔa. 12Ge a tanhɛ ba te ba da bahɛ te nɛreba la baŋɛ n de se'em. 13Yesu daa zom zoore zuo ge yi' nɛresɛba te a bɔta la, te ba wa'an a zen'en na. 14Te a ganhɛ ba pia la bayi' segɛ ba tontoneba te ba wan bɔna la en, te a ta tona ba te ba yehe ta mɔɔla a yɛla, 15ge bo ba paŋa te ba sa'aha bonbɛ'ɛhe la. 16Nɛreba pia la bayi' la te a daa ganhɛ la daa dela Simon se'em te a daa segɛ a yu'urɛ Peter 17la Zebedee dayɔɔhe Yames la a yebega Yon sɛba te a daa segɛ ba yu'ura te Boanerges, vɔnrɛ la n de Saadameŋa Dayɔɔhe, 18la Andrew la Filip la Bartolomu la Matu la Tomas la Alpaeus dayɔa Yames la Tadaeus la Simon se'em n daa tɔgɔre te a to'e Yudoma teŋa bahɛ 19la Yudas Iskariot se'em n daa ŋma' Yesu la. 20Te Yesu daa nya kɛn' yire, te nɛrekooŋɔ le lagahɛ a zen'en te enŋa la a dɔlɔba la ka nyaŋɛ di'. 21Nɛreba n ta yeti, A yirihe mɛ. A nɛreba n wom bala nya keŋɛ te ba ta nyɔkɛ en. 22Pa'alegɔ pa'aleba basɛba n ze'ele Yerusalem teŋa wa'ana la yeti, Beelzebul, bonbɛ'ɛhe naba la n yagɛ a zuo. Bala n sɔe, te a tana sa'aha bonbɛ'ɛhe wa. 23Te Yesu yi' ba paɛ a zen'en dekɛ makerɛ yele ba yeti, Dima ka sa'ahe Dima. 24Bala mea, teŋa kayema nɛreba han zabɛ yelege taaba, teŋkaŋa kan ta'an ze'ele. 25Bii, yire deyema nɛreba han zabɛ yelege taaba, yire denɛ kan le ta'an ze'ele. 26Bala la, Dima han ihege zabɛ yelege a mɛŋa, a kan le ta'an ze'ele, ge a yi' la ba'ahegɔ. 27Nɛra kan ta'an kɛn' paŋadaana yire ta zun' a lɔgɔrɔ han dagɛna a nyaŋɛ la paŋadaana la ge nya ta'an zun' a yire lɔgɔrɔ la. 28N yeti ya la yelemɛŋɛrɛ, te yelebe'seto woo la tose'a woo te nɛreba eta bɔ'ɔra Yenɛ la, a wan bahɛ bo ba. 29Ge, hon se'em woo n to' Yenɛ Sea la, be'em bahega ka boe bɔ'ɔra en. Enŋadaana ton la toonbe'seto n ka tare ba'ahegɔ. 30Yesu n yele wana wa dela ban yeti bonbe'a n yagɛ a zuo la. 31Yesu ma la a yebehe la daa nya paɛ a zen'en ta ze'a yeŋa ge tom te ba ta yi' en na. 32Nɛrekooŋɔ zin'an kae en ge yele en yeti, Ho ma la ho yebehe n boe yeŋa sɔkera ho yele wa. 33Te a lebehe ba yeti, Bane n de mam ma la mam yebehe? 34Te a nya behɛ sɛba woo n zin' kae en la ge yeti, Mam madoma la mam yebehe n wana. 35Baŋɛ ya te sɛba n tone Yenɛ potɛn'ɛrɛ n bote se'em la n de mam yebehe la mam tanpa la mam madoma.

will be added

X\