Amarkɩ 10

1Yesu daa bahɛ zen'kaŋa ge keŋɛ Yudea teŋhe n yakɛ Yordan Kolaa la. Te nɛrekooŋɔ le keŋɛ a zen'en, ge a pa'ale ba wo n ne pon eta se'em la. 2Pariseedoma basɛba wa'an a zen'en na te ba bɛnrɛ en behɛ nya soke en yeti, La de ma'an te boraa lebehe a pɔga? 3Te a lebehe ba yeti, Moses daa bo ya a nɔɔrɛ la yeti bo? 4Te ba yeti, Moses yeti te boraa golehɛ pɔgɔlebehegɔ gɔŋɔ ge tare en ta lebehe. 5Yesu lebehe yele ba yeti, Nɛreba n daa zagahɛ Na'ayenɛ nɔɔrɛ la zuo n sɔe te Moses dekɛ pa'alekona wa bo ya. 6Ge pin'ileŋɔ poan, Yenɛ naam la boraa la pɔka. 7Yele dena wa zuo, boraa wan bahɛ ka sɔ la ka ma, ge dekɛ ka mɛŋa naɛ boyena la ka pɔga, 8te ba bayi' la lebege bonyenɛ. Bala la, ba ka le de'a bayi', ge ba dela boyena. 9Bala te la ka ane soŋa te nɛra se'em yelege sɛba te Na'ayenɛ dekɛ lagom taaba. 10Yesu la a dɔlɔba la n daa kɛn' yire la poan te a dɔlɔba daa soke en wana wa vɔnrɛ. 11A lebehe ba yeti, Se'em n lebehe a pɔga ge di' kayema, a ton la kabonhe bɔ'ɔra pɔgɔsɛka te a lebehe la. 12Le yɛ'ɛha pɔka me han bahɛ a sera ge maan ele boraa kayema, a ton la kabonhe. 13Nɛreba basɛba daa tare kɔma kena Yesu zen'en na, te a kalom ba ge te a dɔlɔba la daa ka sakerɛ. 14Yesu n nyɛ' wana wa, a sunsunya nyie mɛ. Te a yele ba yeti, Bahɛ ya te kɔma la wa'an n zen'en na, ge da digere ya ba. Se'ere n sɔe la Yenɛ sɔ'ɔlom la dela kɔma ane wo bana wa denɛ. 15Mam yeti ya la yelemɛŋɛrɛ te se'em woo n ka to'e Yenɛ sɔ'ɔlom wo bia n to'ore se'em la, a kan ta'an kɛn' dɛ poan. 16Ge te a nyɔkɛ kɔma la dekɛ a nu'uhe pagalɛ ba zuto nya kan' som bo ba. 17Yesu n daa bahɛ bilam ge bɔna bini te a keŋɛ, te boraa kayema zɔ' keŋɛ a zen'en ta dɔnbelɛ a nɛŋa soke en yeti, Pa'ala Somɔ, n wan eŋɛ la wane ta'an nyɛ' vom sebo n ka tare ba'ahegɔ Yenɛ zen'en la? 18Yesu lebehe en yeti, Wane te ho yi'ira mam te Somɔ? Nɛra ka boe dɛna somɔ han dagɛna Yenɛ ma'an. 19Ho mi' pa'alegɔ la: Da ko' nɛra. Da gan'anrɛ la ho tadaana pɔga bii ho tadaana sera. Da zun'. Da parona. Da pina. Bɔ'ɔra ho sɔ la ho ma na'ahegɔ. 20Boraa la yele en yeti, Pa'ala, mam pon dɔla bana zan'an la bonbilome ha. 21Yesu behɛ en ge te a suunre daa kɛn' en te a yele en yeti, Pa'alegɔ koyena ma'an n gee te ho ka dɔla. Keŋɛ ta koohe sɛla woo te ho tara la, ge dekɛ ligiri la bo nahadoma. Bala la ho wan dɛna bontata Yenɛ zen'en. Ho han eŋɛ dena wa ho nya ta'an doohe mam. 22Boraa wa n wom dena wa la, a poa ka pee ge a suunre sagom, te a keŋɛ. Se'ere n sɔe la a dela bontata. 23Te Yesu daa behɛ ba kae ge yele a dɔlɔba la yeti, La tɔe bo bontata te a kɛn' Yenɛ sɔ'ɔlom la poan! 24Te la daa eŋɛ a dɔlɔba la pakerɛ la n yele se'em la, te Yesu le yele ba yeti, N kɔma, la tɔ mɛ te nɛra kɛn' Yenɛ Sɔ'ɔlom la poan! 25La tɔe bo bontata te a kɛn' Yenɛ sɔ'ɔlom poan, gana yɔgɔnɛ doohe fupinho yoko poan yehe. 26Te la eŋɛ ba la pakerɛ te ba tɔgɔra bɔ'ɔra taaba yeti, Te ane n nya wan nyɛ' faanrɛ? 27Yesu behɛ ba ge yele ba yeti, Wana wa asaala kan nyaŋɛ eŋɛ ge la ka tɔe bo Yenɛ. Sɛla ka boe tɔna bo Yenɛ. 28Peter daa yele Yesu yeti, To bahɛ sɛla woo mɛ la to ta'an doohe hɔ. 29Yesu lebehe en yeti, Mam yeti ya la yelemɛŋɛrɛ, te se'em woo n bahɛ a yire bii a keendoma la a yebehe bii a tanpa bii a ma bii a sɔ bii a kɔma bii a va'am, mam la zuo la yelesoma la zuo, 30wan ta to'e yiya la keendoma la yebehe la tanpa la madoma la kɔma la va'am ge nɛreba wan ta namehe ho. A wan to'e bana wa woo zo'e zo'e zina ge te yuunse'a n kena la, a wan to'e vom sebo n ka tare ba'ahegɔ. 31Nɛresɛba n boe nɛŋa la, wan ta lebe pooren, ge te poorendoma ta tole nɛŋa. 32En daa yele wana la, ba daa yɛ'a Yerusalem teŋa ge Yesu tole ba nɛŋa ge la daa eŋɛ a dɔlɔba la pakerɛ. Dabeem me daa kɛn' sɛba n daa dole en la. Te a tare a Pia La Bayi' la lebe kenkɛleŋa te a le yele ba sɛla woo n yeti la eŋɛ en la. 33A yeti, To ye' la Yerusalem teŋa poan ge te ba wan ta ŋma' Asaala Dayɔa bo malema keendoma la pa'alegɔ pa'aleba la te ba nyɔkɛ en. Ba wan tɔgɛ te ba ko' en ge ba wan dekɛ en bo sɛba n dagɛ Yudoma la. 34Ba wan to' en ge tobehɛ nɔtɔɔnrom en ge ŋmɛ' en ge nya ko' en. Ge, dabeha atan' daarɛ poan a wan vo'e a kum la poan. 35Te Zebedee dayɔɔhe Yames la Yon nya keŋɛ a zen'en ta yele en yeti, Pa'ala, sɛla n boe te to bɔta te ho eŋɛ bo to. 36A soke ba yeti, Ya bote n eŋɛ la bene bo ya? 37Ba lebehe en yeti, Ho han ta zin'an ho na'am gɔŋɔ la zuo, bahɛ te tomam ayema zin'ire ho zuɔ te ayema me zin'ire ho gɔbega. 38Yesu yele ba yeti, Ya ka mi' yan sokere sɛla yele. Ya wan ta'an namehɛ namehe seko te n wan nyɛ' la? 39Ba lebehe en yeti, To wan nyaŋɛ. Yesu yele ba yeti, Ya wan seren namehɛ namehe seko te n wan nyɛ' la, 40ge yan zin'ire n zuɔ bii n gɔbega la, dagɛ mam toonɛ te n tom. Zen'sena wa boe bo la sɛbadoma te ba maahom gura ba la. 41A dɔlɔba pia la n daa wom dena wa, ba poore daa ka pee la Yames la Yon. 42Yesu yi' ba te ba wa'an a zen'en yele ba yeti, Ya mi' te teŋhe sese'ehe nadoma zɛnkerɛ la ba mɛhe, ge te ba teŋa mea kpɛ'ɛndoma la me pɛnregere nɛreba te ba eta sɛla woo te bama bɔta. 43Wana wa ka boe yamam zen'an. Ge se'em woo n bote te a dɛna ya kpɛ'ɛma, a dɛna ya yameŋa. 44Ge te se'em n bote te a bɔna nɛŋa, a dɛna ya zan'an da'aberɛ. 45Ge Asaala Dayɔa la ka wa'ana te ba tona bɔ'ɔra en mɛ. A wa'ana te a ton tona bɔ'ɔra nɛreba ge dekɛ a vom yɔ' to'e nɛreba kekeko yelebe'ero bahɛ. 46Ban daa kene la, Yesu la a dɔlɔba la daa doohe Yeriko teŋa poan yɛ'a tɔla. Bama la nɛrekooŋɔ la n bahɛ teŋa la, ba nyɛ' fowa te ba yi'ira Bartimaeus se'em n de Timaeus dayɔa, zin'an sore nɔgbenɛ soha. 47N ta wom te la dela Yesu Nazaret nɛra la n kena la, a yi'ira mɛ te, Yesu, David dayɔa, zɔ' n ninbɔn'ɔn! 48Nɛreba kekeko tanhɛ en te a go'e vole ge a malom yi' gaŋɛ bala te, David dayɔa, zɔ' n ninbɔn'ɔn! 49Yesu ze'ele yele ba yeti, Yi' ya en na. Te ba yi' fowa la yele en yeti, Tara popeelom! Ihege! A yi'ire ho mɛ. 50Fowa la lobe a fugɔbega bahɛ ge ihege keŋɛ Yesu zen'en. 51Yesu soke en yeti, Bene te ho bɔta n eŋɛ bo ho? Fowa la lebehe en yeti, Naa, n bote ho bahɛ te n nyɛta mɛ. 52Yesu yele en yeti, Kena. Hon nam mam la zuo n sɔe te ho ban'an wa bahɛ wa. Bilam, te a nini la pekɛ te a ze'ele sore la zuo doohe en.

will be added

X\