Amarkɩ 1

1Wonse'eren la daa pɔhɛ wo Yesu Krista se'em n de Yenɛ Dayɔa la yelesone. 2La daa golehɛ nɔtɔgɔha Isaiah gɔŋɔ la poan yeti, Behe ya, n wan tom n bitonoŋa te ka bɔna n nɛŋa maala sore biŋera ho. 3Nɛra n mɔɔle yeti, Maalɛ sore pɔgɔtia la poan te de gan'an tontɔɔ bo to Na'ayenɛ la. 4Yon daa wa'ana bɔna pɔgɔtia bɔ'ɔra nɛreba ko'om soa ge tɔgɔra te ba tee ba potɛn'ɛra ge te a sɔ ba te la pa'alɛ te Yenɛ bahɛ ba be'em bo ba. 5Yudea sɔ'ɔlom la Yerusalem teŋa nɛreba zan'an daa keŋɛ a zen'en, puta ba yelebe'ero, te a bɔ'ɔra ba ko'om soa Yordan Kolaa la poan. 6Yon lɔgɔrɔ daa dela yɔgɔnɛ kɔnberɔ te a yɛɛra, dekɛ la sɛganɛ lo' a sea. A dia me daa dela sonwa'ara la seerom. 7A daa yeti, Nɛra ayema wan wa'an mam poore na ge enŋa tare paŋa gana mam. Mam pɔ'ɛ n pirege a tagara. 8Mam sɔɔre ya mɛ la ko'om wa ge enŋa wan sɔ ya mɛ la Yenɛ Sea. 9La daa dela bala ma'an poan, te Yesu ze'ele Nazaret teŋa poan n boe Galilee teŋa poan keŋɛ Yon zen'an te a sɔ en Yordan Kolaa la poan. 10En ze'ele ko'om la poan dɔɔra na la a nyɛ' te saŋgbanɛ yo'ɛ, te Sea la sigera a zuo na wo dayene la. 11Te konkore n boe saazuo yeti, Hom n de mam dayɔba'arɛ, te mam nintegɛ. Mam tare popeelom la hɔ. 12Bilam bilam, te Yenɛ Sea la tare en keŋɛ pɔgɔtia poan. 13A boe la pɔgɔtia la poan dapihinaahe, te Dima la makɛ en behɛ. A bo mɛ la mɔɔdunhe, te Na'ayenɛ soŋoreba tona bɔ'ɔra en. 14Pooren to ban daa nyɔkɛ Yon tare en ta pagɛ en, te Yesu nya keŋɛ Galilee teŋa poan daa ta tɔgɔra Yenɛ yelesoma la yeti, 15De daarɛ la paɛ ya te Yenɛ Sɔ'ɔlom la pɔnrɛ. Tee ya ya potɛn'ɛra ge sakɛ bo Yenɛ Yelesoma la. 16Bala ma'an, te Yesu n dole Galilee mɔgɔrɛ zen'en tɔla la, a nyɛ' la zim lɔbereba bayi', Simon, la a yebega Andrew. Ba tare la yoka lɔbera zim mɔgɔrɛ la poan. 17Yesu yele ba yeti, Doohe ya mam, te n bahɛ te ya de'a zim lɔbereba sɛba n wan tara nɛreba bɔ'ɔra mam. 18Bilam bilam, te ba dekɛ ba yogohe la bahɛ ge dɔla en. 19Yesu n daa le keŋɛ fiin wa, a nyɛ' Zebedee dayɔɔhe Yames la a yebega Yon maala ba yogohe ɔɔnrɔŋɔ poan. 20Bilam bilam, te a yi' ba te ba bahɛ ba sɔ Zebedee la ba yamehe ɔɔnrɔŋɔ la poan ge doohe en. 21Yesu la a dɔlɔba la daa keŋɛ Kapernaum teŋa poan. Vo'ohogo Daarɛ la n paɛ, te ba kɛn' zamehegɔ yire te a bɔna bini pa'ala. 22A pa'alegɔ la eŋɛ nɛreba la pakerɛ. Se'ere n sɔe la, a pa'alɛ ba mɛ la paŋa. A ka pa'alɛ wo nɛresɛba n pa'alɛ pa'alegɔ la. 23Se'em ma'an te ba bɔna zamehegɔ yire la, boraa kayema te bonbɛ'ɛhe bɔna la n kɛn' bini na ge nyabera yeti, 24Yesu, Nazaret teŋa boraa wa, ho bote la bene to zen'en? Ho wa'ana te ho sagom to mɛ? Mam baŋɛ hon de se'em. Ho dela Na'ayenɛ yelemɛŋɛrɛ bitonoŋa. 25Yesu tanhɛ bonbe'a la yeti, Go'e voole, ge yehe a zen'en. 26Te bonbe'a la damɛ boraa la ge kaahe kekeko ge nya yehe a zen'en. 27La eŋɛ ba pakerɛ te ba sɔkera taaba yeti, Bene n wana? La dela pa'ale paalega seko n kpe'em. A tanhɛ la bonbɛ'ɛhe, te ba nam a nɔɔrɛ. 28Te la ka yue te a yele yeregɛ zen'an woo Galilee teŋa poan. 29Ban daa kɔ'ɔn yehe zamehegɔ yire la, Yesu la Yon la Yames doohe la Simon la Andrew keŋɛ ba yire. 30Ba yele Yesu te Simon dɛɛnpɔka n gan' gbe'era la ɔɔrɔ. 31Te a keŋɛ pɔka la zen'en ta gin' a nu'o vi'e en ihege te a ɔɔrɔ la bahɛ en. Ge te a la yuɛ ko'om bo ba. 32Yene n ta ma'ɛn, te nɛreba tare ban'ahedoma la sɛba te bonbɛ'ɛhe daana, wa'an a zen'en na, 33te teŋa la nɛreba zan'an lagahera yire la zanɔɔren. 34A tebɛ ban'ahe buuri buuri ge sa'ahɛ bonbɛ'ɛhe kekeko te ba yehe nɛreba zen'enhe. A bahɛ bonbɛ'ɛhe la te ba kan nyaŋɛ voole. Se'ere n sɔe la, ba baŋɛ en. 35Yiimbeere, Yesu daa ihege la bolika yu'uŋyu'uŋɔ yehe yire la poan keŋɛ mɔen ta soha Yenɛ. 36Simon, la sɛba n boe la en la yehe ɛɛra en, 37nya nyɛ' en ge yele en yeti, Nɛra woo eere ho mɛ. 38Te a lebehe yele ba yeti, Bahɛ ya te to keŋɛ teŋse'ehe n ka zaen la te n ta mɔɔlɛ yelesoma. Wana wa zuo te mam wa'ana. 39Te a nya keŋɛ Galilee teŋhe zan'an ta mɔɔla Yelesoma la bɔ'ɔra ba zamehegɔ yiya la poan ge sa'aha bonbɛ'ɛhe la. 40Boraa n de konkone wa'ana dɔnbelɛ Yesu nɛŋan belom en yeti, Ho wan ta'an tebɛ mam, ho han bɔta ho tebɛ mam. 41Te ninbɔn'ɔn nyɔkɛ en te Yesu tɛɛn a nu'o kalom en ge yeti, Mam bote. N wan tebɛ ho. 42Bilam bilam, te konkom la bahɛ en ge te a eŋɛ som 43te Yesu daa bahɛ te a keŋɛ ge kan'an en yeti, Mina te ho wan dekɛ dɛ yɛta nɛra. 44Keŋɛ malemadaana la zen'en ta dekɛ ho mɛŋa pa'ale en, ge tare ban'an ba'ahega bo'olom sebo, te Moses bo nɔɔrɛ te ba tara kena na la, te la dɛna aseradaana bo ba. 45Ge, boraa wa daa yehe la dekɛ yetɔgom la yeregɛ zen'an woo. Bala, te Yesu ka le ta'an kɔ'ɔn lilige a mɛŋa teŋa poan, ge a boe la yeŋa pɔgɔtia poan. Ge te nɛreba la zɛ'ɛta bɔbɔrɛ woo kena a zen'en na.

will be added

X\