Malaki 3

1Behe ya, n wan tom n bitonoŋa te ka bɔna n nɛŋa maala sore biŋera mam. Daana la te ya gura la wan wa'ana zin'ire a Yire la poan. Bitonoŋa la te ya suunre kɛn' la wan wa'ana mɔɔlɛ nɔbiŋere la. Behɛ enŋa kene na la. Pɛɛntɛɛnreba Na'ayenɛ yele se'em n bala. 2Ge ane n wan ta'an ŋmibe a kenɛ dabaherɛ na la poan? Ane n wan ta nyaŋɛ ze'ele a nɛŋan daanse'ere daarɛ te a yɛ'a na la? A yeti a ana mɛ wo kuta bugum la. A yeti a ana mɛ buruŋa la. 3A yeti a wa'an me na la bugum wo ban nyɛlegere sanlema la se'em la. A wan pee Levidoma la. A wan nyɛlegɛ ba, paahɛ dɛngerɔ woo ba poan bahɛ, ge te ba ana fa'a wo sanlema te ba ne nyɛlegɛ yehe dagerɔ ba poan gee ba se'em fa'a la. Bala te Na'ayenɛ wan nyɛ tontɔɔ nɛreba n wan bɔ'ɔra bo'olom la tontɔɔ. 4La kan yuue te Yuda la Yerusalem teŋa bo'olom wan paara Na'ayenɛ nɛŋan wo lan yuum pon ana se'em la. 5Bala, n wan vuruge lɛm ya na gankɛ ya. N wan lebehe yɔ sɛba n bogore bakolo la, sɛba n tone kabonhe tooma, ponpɔrɔŋdoma, sɛba n faanre tontoneba yɔɔrɛ, sɛba n namehere pɔkɔnpa, keebehe, faanra saama yelemɛŋɛrɛ ka zɔta mam la, n wan lebehe yɔ ba kalom. Pɛɛntɛɛnreba Na'ayenɛ la n yele se'em n bala. 6Mam Na'ayenɛ ka tare teere. Bala zuo te yamam Yakob yaahe wa kan nyɛ sagaŋɔ. 7Pɔhɛ ya yaabdoma na paɛ zina, ya bire ya pɔya la bala bahɛ mam nɔbiŋ'a la. Ya ka dole a. Na'ayenɛ yeti, nya ŋmɛregɛ ya lebe n zen'an na, te mam me ŋmɛregɛ lebe ya zen'an na. Ge ya wan soke yeti, Te ŋmɛregɛ wane wane lebe ho zen'an na? 8La ane soŋa te asaala fan' Na'ayenɛ? Ge ya soke yeti, To faanre Na'ayenɛ la wane? Ya faanre mam la ya pia porogerɛ bo'olom la ya bo'olom poan. 9Bala zuo, ya teŋa wa zan'an boe la kan'be'o poan yan faanre mam la. 10Tare ya ya pia porogerɛ bo'olom la n zone se'em la zan'an wa'an Yenɛ yire baanrɛ la poan na, te dia zo'e bɔna mam yire la poan. Makɛ ya mam bahɛ n han ka yu'uhɛ saahe te se ka'ɛ kan'somɔ bahɛ ya zuo na, te ya nyɛ lɔgɔrɔ gaŋɛ te fole ka bɔna wan biŋe to. 11N wan gu' te bonyoora kan obe ya dia te ya borɛ. Sabeeo kan sɔe ya tiihe dia bahɛ yoo. Pɛɛntɛɛnreba Na'ayenɛ la n yele se'em n bala. 12Teŋhe woo wan yi'ira ya kan'somɔ teŋadoma. Ya teŋa la wan dɛna teŋsoŋa. Pɛɛntɛɛnreba Na'ayenɛ la n yele. 13Na'ayenɛ yeti, Ya tɔgɛ mam la yetɔgɔyooro. Ge ya soke yeti, Yetɔgɔyooro tone te to tɔgɛ hɔ? Ya yetɔgɔyooro la dela, 14Ya yeti la dela yoo te to tone bɔ'ɔra Yenɛ wa. Tomam n nane a nɔɔrɛ wa, nameha a nɛŋan tare la bene? 15Nananawa, nɛreyooro la n ton nyɛ kan'somɔ. Toomfɛn'ɛhadoma n ton tara ban bote sɛla, te sɛba n pagare la Na'ayenɛ ka nameha. 16Bala te sɛba n zote Na'ayenɛ la nya tɔgɔra la taaba lan ane se'em. Te Na'ayenɛ wom ba tɔgom la. Te gɔŋɔ seko poan te ba golehɛ sɛba n zote Na'ayenɛ yɛla eŋɛ ko poan la lakɛ gan'an Na'ayenɛ nɛŋan te ko tɛɛn Na'ayenɛ ba yele. 17Pɛɛntɛɛnreba Na'ayenɛ la yeti, Ba wan dɛna mam nɛreba daanse'ere daarɛ te n wan gbirige la. N wan zɔ ba ninbɔn'ɔn wo nɛra bia n ne tue en te a zɔ a ninbɔn'ɔn ge bahɛ en se'em la. 18Ya wan nyɛ tontɔɔdoma la toonfɛn'ɛhadoma la n boe yema yema se'em. Sɛba n dole Yenɛ la sɛba n ka dole Yenɛ n boe yema yema se'em.

will be added

X\