Malaki 2

1Kan'aŋɔ kona wa dela yamam malemadoma denɛ. 2Ya han ka kɛleha mam, ya han ka lo' ya suunre te ya na'aha mam yu'urɛ la, n wan tom kan'be'o bahɛ ya zuo. N wan kan' be'em bahɛ ya som zuo. Yelemɛŋɛrɛ, n pon kan' la be'em bahɛ ya som lɔgɔrɔ poan, la yan ka maahom ya sunya te ya na'ahɛ mam. 3Yamam zuo, n wan zagahɛ ya yaahe. N wan vaɛ ya kaanbegɔ dunhe bino la te ya ka'ahɛ bahɛ la fɔnbɛ ya nɛhe ge dige ya te ya fɔnregɛ n nɛŋan. 4Bala te ya wan baŋɛ te mam n bo ya kan'aŋɔ kona, ge te n biŋere la Levidoma la wan bɔna la bala yɛ'ɛha. Pɛɛntɛɛnreba Na'ayenɛ la n yele se'em n bala. 5Mam biŋe la n nɔɔrɛ la n de dela sunma'ahom nɔbiŋere te mam dekɛ bo en. Wana dela a na'aha mam, te me seren na'aha mam, ge zɔta mam yu'urɛ kantɛ wa. 6Yelemɛŋɛrɛ pa'alegɔ ma'an n boe a nɔɔrɛn. Tuure ka ze'ete a nɔgbanɛ poan yɛha na. A kene la mam mɛ la sunma'ahom la birikinte ge ŋmɛregɛ be'emdoma zo'e zo'e te ba yehe ba be'em poan. 7Malemadaana nɔɔrɛ tare la toolom yɛla ma'an. Nɛreba wan ɛɛra pa'alegɔ a zen'an. Se'ere n sɔe la, a dela Pɛɛntɛɛnreba Na'ayenɛ tontona. 8Ge yamam bahɛ sore la mɛ ge te ya pa'alegɔ bahɛ te nɛreba zo'e zo'e lu. Ya ganlom nɔbiŋere la te Pɛɛntɛɛnreba Na'ayenɛ biŋe Levi la mɛ. 9Bala zuo te mam eŋɛ ya te nɛreba ka nana ya, te ya me dagana sɛsɛla nɛreba nɛŋan. Se'ere n sɔe la ya ka doohe mam sore la. Ya pa'alɛ la yamam n bote sɛla mam pa'alegɔ yɛla la poan. 10To zan'an sɔ dagɛ la sɔyenɛ? Dagɛ Yenɛ deyena n maale tɔ? Wane te to nana taaba, nya ganlom pa'alegɔ wa n pon bɔna to sɔyaabdoma saŋa na wa? 11Yuda teŋa le dagana birikina teŋa. Israel la Yerusalem tom la toonfɛn'ɛhegɔ te ko ka tara makerɛ. Se'ere n sɔe la, Yuda teŋa dekɛ a mɛŋa naɛ la sateŋa yenɛ. 12Nɛra se'em woo n ete wana, Na'ayenɛ ŋmaɛ en ŋma en Yakob sogora wa poan bahɛ, la n pon tara bo'olom kena na bɔ'ɔra Pɛɛntɛɛnreba Na'ayenɛ wa la. 13Yele deyema te ya eta dela, ya ma'alɛ Na'ayenɛ kaanbegɔ daka la mɛ la nintam. Ya ne ta kaaha mɛ ge sin'ina, la en ka to'e ya bo'olom la bii a poorɛ pee la ya, te a to'e ya bo'olom la. 14Ya wan soke bene n sɔe bala? Se'ere n sɔe la dela, Na'ayenɛ n de aseradaana bo hom la ho pɔga sɛka te ho pɔhɛ di la, te ho sina ge kɔ' ho birikinte la ka, ge mina te kaŋa n de sɛka te ho maalɛ ka yɛla te ka dɛna ho pɔga. 15Na'ayenɛ eŋɛ ba te ba dɛna la boyena ba iŋganɛ la ba sea poan. Ba dela enŋa Na'ayenɛ denɛ. Bene zuo te a dekɛ ba te ba naɛ taaba la? La dela Na'ayenɛ bote ba dɔgɛ la kɔmsɛba n wan zɔta enŋa Na'ayenɛ. Bala zuo la, gu' ho mɛŋa sea poan, la ho da bahɛ ho pɔgɔsɛka te ho di yia la. 16Na'ayenɛ Israel Yenɛ yeti, Mam yaɛ pɔgɔlebehegɔ. Pɛɛntɛɛnreba Na'ayenɛ la yeti, Mam suunre nyie mɛ la se'em n dekɛ gbirigere eŋɛ a fuo yɛ. Gu' ho mɛŋa sea poan soŋa da kɔ' ho birikinte la. 17Ya kpeti la Na'ayenɛ toba la ya yetɔgom la. Ge ya wan soke yeti te kpeti a toba la wane? Ya kpeti a toba dela yan voole te sɛba woo n pon tona be'em la kelom dɛna la Na'ayenɛ nɛreba la, ge ne le yeti Yenɛ la n de yelemɛŋɛrɛ Yenɛ la bɛɛ la.

will be added

X\