Malaki 1

1Na'ayenɛ yelehom sebo n wa'an Malaki poan bo Israeldoma n wana. 2Na'ayenɛ yeti, Mam nɔŋɛ ya mɛ. Te ya soke yeti, Ho nɔŋɛ to la wane? Na'ayenɛ sokere ya yeti, Esau daa dagɛ keema ge bo Yakob? Ge bala zan'an, mam nɔŋɛ la Yakob 3ge mam yaɛ Esau mɛ, bahɛ te Esau sɛla woo sige teŋa, ge dekɛ a yaahe ta bahɛ teŋpɔgɔtia sɛka poan te sanhe bɔna bini. 4Edom teŋadoma me wan pan'ahɛ ba mea yeti, La ban pon wɔnregɛ te teŋa wa paɛ zen'an beene la, te wan lebehe mɛ ka zen'se'ehe woo n wɔnrɛ la. Ge Pɛɛntɛɛnreba Na'ayenɛ la yeti, Ba ta'an le mɛ, ge n me wan gbi. Ba wan yi'ira ba teŋa la yu'urɛ la potodoma teŋa, ba wan dɛ'a nɛreba te Na'ayenɛ sunsunyiim bɔna ba zuo saŋa woo. 5Ya wan nyɛ la ya nini, ge yele yeti, Na'ayenɛ kpe'em mɛ! Sɛba n dagɛ Israeldoma wan lagom nyɛ! 6Bia na'ahere ka sɔ mɛ, te yameŋa na'aha ka daana. Mam han dɛna la ya sɔ, na'ahe seko n sone te ya tare bɔ'ɔra mam la bɛɛ? Mam han dɛna ya daana, na'ahe seko n sone te ya tara bɔ'ɔra mam la bɛɛ? Pɛɛntɛɛnreba Na'ayenɛ la n yele se'em n bala. Yamam malemadoma wa n kɛhere mam yu'urɛ la. N han yele bala, ya sokera yeti, te kɛhere ho yu'urɛ la wane? 7Ya tare la galeŋɔ dia biŋera mam kaanbegɔ daka la zuo. Te ya soke yeti, Te ganlom ho la wane? Ya galeŋɔ dela yan yeti Na'ayenɛ tebole la zuo ka kihi sɛsɛla la. 8Ge te sina ge yɛta Yenɛ yeti, a to'e ya. Yan tare dunhe nini n ka nyɛte kena na kaanbera la, bala dagɛ tuure? Yan tare dunhe n de kɔɔrɔnɔ, la dunhe n tare ban'an kena na kaanbera la, bala dagɛ tuure? Makɛ ya, la ya dekɛ dunhe senhe taaba ta bo ya teŋa zuo kpɛ'ɛndoma ayema behɛ lan wan ana se'em. Pɛɛntɛɛnreba Na'ayenɛ la n yele se'em n bala. 9Ya han tara dunhe senhe taaba kena Na'ayenɛ zen'an na, ge bɔta te a zo'ohɛ ya, a wan sakɛ bo ya? Na'ayenɛ la n soke se'em n bala. 10La wan ane ne soŋa te ya ayema ihege yu' ne Yenɛ Yire kolehe la, te ya da ta'an kɛn' ne mam Yire wa poan na lamehɛ bugum yooro yooro mam kaanbegɔ daka la zuo. Na'ayenɛ yeti, N poorɛ ka pee la ya. N kan to'e ya bo'olom sebo woo te ya zanla ya nu'uhen la. 11Mam yu'urɛ wa wan dɛna yu'urɛ kantɛ bo teŋhe zo'e zo'e te ba na'aha dɛ. Ze'ele wontɛɛŋa n pɔhere zen'an na ta lute zen'an. Mam yu'urɛ wa wan nyɛta na'ahegɔ nɛresɛba woo n boe zen'sena wa poan. Teŋhe woo poan, ba wan tara zun'uhe n tare nyuŋo soŋɔ, la bo'olom n ka tare dɛngerɔ kena na bɔ'ɔra mam yu'urɛ la. Mam yu'urɛ la wan dɛna yu' kantɛ bo teŋhe. Pɛɛntɛɛnreba Na'ayenɛ la n yele se'em n bala. 12Yamam wa tare de sagona mɛ, la yan yeti Na'ayenɛ tebole la pon ganlom mɛ, te de ka le kiha disɛka la. 13Ge ya nya ne yeti, Behɛ tebole wa n de zeero se'em bo to ne sɛ'ɛha mam yan bote se'em. Pɛɛntɛɛnreba Na'ayenɛ la n yele se'em n bala. Yan ne tare duŋse'ehe n pɔgɔlom, bii dunhe n de kɔɔrɔnɔ, bii dunhe n bɛn'ɛnre kena na kaanbera mam la, ya ne bɔta te mam ne to'e kaanbegɔ koŋɔ mea me? Na'ayenɛ n yele se'em n bala. 14Kan'be'o dole hom se'em n pim mam, hom se'em te duŋa bɔna ho dunhe poan dɛna ho dekɛ bo Na'ayenɛ, te ho me biŋe nɔɔrɛ te ho wan dekɛ ka bo Na'ayenɛ, ge nya ta tee dekɛ duŋsɛka n tare dɛngerɔ tare wa'ana kaanbɛ bo Na'ayenɛ la. Pɛɛntɛɛnreba Na'ayenɛ la yeti, Mam dela Nakantɛ te teŋhe zɔta mam yu'urɛ la.

will be added

X\