Aluki 9

1Yesu daa yi' a dɔlɔba pia la bayi' la lagahɛ te a bo ba paŋa te ba digera bonbɛ'ɛhe zan'an n dole nɛresɛba ge la ba me tebera ban'ahedoma. 2Ge a nya tom ba te ba yehe la ba ta mɔɔla yɛhera Na'ayenɛ Sɔ'ɔlom la ge la ba tebera nɛreba. 3N tone ba bala la, a yele ba mɛ te, Da zegere ya te ya zi' lɔgɔrɔ kekeko wo dɔya la tapɔtɔ la dia la ligiri la futo toyi' toyi' keŋɛ ya sɔrɔɔ mea. 4Ge yire se'ere woo te ya paɛ, kɛn' ya bini la ya bɔna te ya yɛhega daarɛ ta paɛ te ya le togoha zen'en kayema me. 5Ge zen'an woo te ya paɛ te ba ka to'e ya peehe ya ya na'ma pa'ala te ba zagahɛ la Na'ayenɛ yelehom. 6Bala te ba keŋɛ dɔla teŋhe poan mɔɔla Na'ayenɛ yɛla bɔ'ɔra nɛreba ge tebera nɛreba zen'an woo. 7Ge bala ma'an, Naba Herod n daa ta wom sɛla woo n eŋɛ la, la daan en. Se'ere n sɔe la, nɛreba basɛba n daa yete Yon vo'e a kum la poan mɛ. 8Te basɛba me yete la dela Eliya n lebe le wa'ana. Sɛba me daa yete la dela nɔtɔgɔheba sɛba n pon ki' la ayema n vo'e a kum poan. 9Ge Herod daa yeti, Han dɛna Yon mam pon bahɛ te ba fike a zuo dabahese'a ha. Ge te la nya wan dɛna la ane me n bala te n wona yele ana wa yɛhera a yele wa? Depooren te a bɔta ta tɔgɛ la nɛre'ena wa daana. 10Ge sɛba te Yesu daa tom la n lebe Yesu zen'en na la, ba yele en sɛla te ba eŋɛ. Bala te a tare ba ba ma'an te ba keŋɛ teŋa te ba yi'ira Betsaida. 11Ge nɛrekooŋɔ la n baŋɛ te a keŋɛ la teŋa la poan la, ba bɛn' la a pore. Ban paɛ la, a to'e ba ge tɔgɛ bo ba yɛhera Na'ayenɛ sɔ'ɔlom la ge tebɛ sɛba n bɛn'ɛnre la. 12Ge yenɛ ta luta mɛ te a dɔlɔba pia la bayi' la daa wa'an Yesu zen'en na yele en yeti, Bahɛ te nɛrekooŋɔ la keŋɛ teŋse'ehe n lɛm kalam wa la ba behɛ ba dia la ba gan'aregɔ zen'en. Te ton boe kalam wa, to ka pɔnre yire yire. 13Ge a yele ba yeti, Yamam mɛhe behɛ dia bo ba te ba di'. Te ba lebehe yeti, To tare la boroboro banuu la zim iyi' ma'an kalam. Bala la, to ye keŋɛ teŋa poan ta da' dia na bo ba? 14Se'ere n sɔe la, ba de wo nɛreba tuha anuu la. Bala te Yesu yele a dɔlɔba la te, Bahɛ ya te ba zin'ire ya teŋa mɔɔ la poan pihinuu pihinuu. 15Te ba bahɛ te ba zan'an zin'ire bala. 16Te a dekɛ boroboro banuu la la zim iyi' la ge gorege saazuo bo Yenɛ fara. N bo fara la ba'ahɛ la, a nya daa gɛn'ɛnhɛ ba mɛ dekɛ bo a dɔlɔba la te ba tɔnrɛ nɛrekooŋɔ la. 17Te ban tɔnrɛ ba la, nɛra woo daa di' tegɛ mɛ ge te ba vaɛ disɛka n ge la eŋɛ pitɔ pia la toyi'. 18Yesu daa wa bahɛ nɛrekooŋɔ la zen'en mɛ ge keŋɛ zen'an kayema a ma'an te a sohɛ Yenɛ. Te a dɔlɔba la me lagom bɔna la en mɛ. Ge a wa soke ba yeti, Nɛreba yete mam dela ane? 19Te ba lebehe yeti, Nɛreba basɛba yete ho dela Yon Ko'sɔɔra la. Basɛba me yete ho dela Eliya, te sɛba me yɛ'ɛha yete ho dela nɔtɔgɔheba sɛba n pon ki' la ayema n vo'e a kum poan. 20Te a yele ba yeti, Ge yamam tɛn'ɛhɛ te mam dela ane? Te Peter lebehe yeti, Ho dela Krista, Se'em te Yenɛ Loe La. 21Ge a yele kan'an ba te ba da yele nɛra yele dena wa. 22A yeti, La dela Asaala Dayɔa nyɛ' namehegɔ. Yudoma kpɛ'ɛndoma, malema keendoma, la pa'alegɔ pa'aleba la me wan zagahɛ mam ge ko' mam. Ge dabeha atan' poan, n wan vo'e n kum mea poan. 23Ge te a yele bama la zan'an, Hon se'em n bote ho dɔla mam sore la dela a zagahɛ a mɛŋa da gangɛ a namehɛ mam zuo ta ki'. 24Te hon se'em n gangɛ ho vom zuo wan bɔregɛ dɛ. Ge hon se'em n ka gangɛ ho vom zuo mam zuo kan bɔregɛ dɛ. 25Te bene yɔɔrɔ te nɛra wan nyɛ' a han tara sɛla woo n bo teŋa wa zuo ge kan tara vom sebo n ka tare ba'ahegɔ Na'ayenɛ zen'en la? 26Bala hon se'em te vi' tara hɔ la ho sakɛ bo mam la mam yelehom la, Asaala Dayɔa me wan ta tara vi' la en teŋa ba'ahegɔ daarɛ la. A han ta lebe na la a soŋa la, la a Sɔ' paŋa la, la a toolom soŋoreba paŋa la. 27Ge n yete ya la yelemɛŋɛrɛ wa. Te ya sɛba boe ze'a kalam n kan ki' han dagana la ba ta nyɛ' mɛ te Na'ayenɛ sɔna behera teŋa wa zuo na. 28La ta ana wo dabeha anii n tole te Yesu n yele yele ana wa la, a tare la Peter la Yon la Yames keŋɛ zoore zuo te ba sohɛ Yenɛ. 29Te n ta soha la, Na'ayenɛ bahɛ te a nɛŋa tee mɛ bɔna kayema. A futo me pelege mɛ yere yere ge nyagera. 30Te bala ma'an la, te boraahe seyi' n yuun boe bini tɔgɔra la en, ba dela Moses la Eliya 31ba ze' mɛ nyagera, ge tɔgɔre la en yɛhera n wan ki' Yerusalem teŋa poan se'em. 32Ge dena wa n nan kelom eta la, Peter la bana bayi' la gin'ihe mɛ. Ge ban ta nɛɛ la, ba nyɛ' te Yesu nyagera ge te boraahe seyi' la ze'a la en. 33Te boraahe seyi' la n ta bahera a zen'en la, Peter yele Yesu yeti, Naa, la ane soŋa te to bɔna kalam. Bahɛ te to tin' pagahe setan'. Hon ayema, Moses ayema, Eliya me ayema. Ge a ka baŋɛ sɛla te a yɛta la vɔnrɛ n de se'ere. 34Te n ta yɛta Yesu wana wa la, bilam bilam te saŋgbana wa pin'. Lan eŋɛ bala la, dabeem kɛn' Peterdoma. 35Bilam te konkore tɔgɛ saŋgbana la poan na te, Ena wa n de mam Dayɔa se'em te n loe te a fan' nɛreba la. Bala kelehera sɛla te a yɛta. 36Te Na'ayenɛ n ta tɔgɛ ba'ahɛ la, ba nyɛ' te Yesu ma'an ze' bini. Ge ban nyɛ' yele ana wa woo la ba tare dɛ la ba ma'an. Ba ka yele nɛnɛra sɛla te ba nyɛ' la. 37Yiimbeere te ba ze'ele zoore la zuo sige na la, nɛrekooŋɔ n to'ohɛ ba. 38Te boraa kayema nɛrekooŋɔ la poan nyabegɛ te, Pa'ala n bene ho mɛ te ho wa'ana behɛ n dayɔyeŋa ma'an wa. 39Te bonbe'a n ne tona la en te a luta kilenki'ire. A bahere te a ne kɔ'ɔn kaaha mɛ ge te nɔtɔɔnrom ne ta gala na, ge saŋa woo ka namehɛ en la bala. 40Mam me daa belom ho dɔlɔba la te ba dige en. Ge ba ka nyaŋɛ tebɛ en. 41Te Yesu lebehe yeti, Yamam nanana nɛreba wa dela pɔtɔpa ge ka nam mam! Dabeha wane te ya bɔta te n bɔna la ya ge te ya nya sakɛ bo mam? Bahɛ te ho dayɔa la wa'an kalam na. 42Ge bodibila wa n kene na la bonbe'a la gbirige en mɛ ge bahɛ en te a lu' teŋa gbe'era. Ge Yesu tanhɛ bonbe'a la ge tebɛ bodibila la. N tebɛ en la, a nya bahɛ en mɛ te a lebe a sɔ zen'en. 43La daa eŋɛ nɛra woo la pakerɛ la Na'ayenɛ paŋkana wa. Ba zan'an n nan kelom ze'a yɛla la sɛla te a eŋɛ la, a yele a dɔlɔba la te, 44Bahɛ te yele ana wa bɔna ya suunre poan. Te ba yete ba dekɛ Asaala Dayɔa mɛ tehɛ yelebe'erodoma nu'uhen. 45Ge ba ka bɔkɛ sɛla te a yele ba la vɔnrɛ ge Yesu ka lilige yelehom wa vɔnrɛ bo ba te ba ta'an bɔkɛ dɛ. Te dabeem me tare ba te ba soke en yelehom la vɔnrɛ n de se'em. 46Ge te ba pin'ilom gangera la taaba yɛhera la ba se'em ba poan n gane zan'an. 47Ge Yesu n baŋɛ ba potɛn'ɛra n tɛn'ɛre sɛla la, a nyɔkɛ la bia ze'ele a zen'en 48ge yele ba te, Hon se'em n to'e bikana wa soŋa soŋa mam zuo, me to'e mam soŋa soŋa mɛ. Te hon se'em n to'e mam me to'e la se'emdaana n tom mam na la. Hon se'em n pɔ'ɛ ya zan'an poan n de se'em n seren gane zan'an Na'ayenɛ nɛŋan. 49Te Yon lebehe en yeti, Pa'ala, to nyɛ' te boraa kayema yi'ira ho yu'urɛ digera bonbɛ'ɛhe nɛreba zen'en. N ete bala la, to mam dige en mɛ te a da eta bala. Se'ere n sɔe la, a ka lagom dɛna tomam ayema dɔla hɔ. 50Ge Yesu lebehe yele en te, Da digere ya en. Te se'em n dagɛ to diŋdaana dela to zɔ'. 51Dabeha n pɔnre te Yesu ki' ge lebe saazuo ha la, a eŋɛ a potɛn'ɛrɛ te a keŋɛ Yerusalem teŋa poan. 52Bala te a tom nɛreba te ba diŋɛ a nɛŋa. Sɛba te a tom la keŋɛ la teŋa n boe Samaria teŋa poan te ba maahom sɛla woo ge gura en. 53Ge nɛreba la bini la ka maahom te ba to'e en soŋa soŋa a han paɛ na. Se'ere n sɔe la, bama Samaria teŋa nɛreba ka bote nɛresɛba n kene dɔla Yerusalem teŋa poan. 54Ge Yames la Yon n nyɛ' Samaria teŋa nɛreba n eŋɛ se'em la, ba yeti, To Daana, ho bote to bahɛ te bugum ze'ele saazuo na di' ba? 55Te a ŋmɛregɛ yele ba te a ka bote te ba eŋɛ bala. 56Ge te ba keŋɛ tole teŋa kayema. 57Ban bo sore zuo yɛ'a la, boraa kayema n wa yele Yesu te, Mam wan doohe ho keŋɛ zen'en woo te ho yɛ'a. 58Te a lebehe yele en te, Piini tare ba yogoro mɛ kɛn'ɛra gan'ata, ge te niihe me tara tekoro kɛn'ɛra gan'ata. Ge Asaala Dayɔa ka tare gan'aregɔ zen'an. 59Ge a yele nɛra ayema yeti, Dɔla ma. Ge nɛra la yeti, N Daana, bahɛ te n keŋɛ ta pin' n sɔ wa yia ge lebe na dɔla hɔ. 60Ge a yele en te, Bahɛ te kum la laɛ kum la, sakɛ Na'ayenɛ yelehom la wo enŋa wa la tona ba tooma. Ge han de'a la hon tɔka, hon keŋɛ la ho mɔɔla bɔ'ɔra nɛreba yɛhera Na'ayenɛ Sɔ'ɔlom la. 61Nɛra ayema me yele Yesu yeti, To Daana, n wa dɔla ho, ge bahɛ te n keŋɛ ta keehe n yiredoma yia ge wa'ana dɔla hɔ. 62Te a yele en te, Hon se'em n gorɛ kunre kɔɔra ge gɛleha behera poore kan ta'an tom Na'ayenɛ Sɔ'ɔlom la poan.

will be added

X\